काठमाडौं- चिनी उद्योग अत्यधिक घाटामा गएकाले सरकारले तोकेको मूल्य पुनर्विचार नभए चिनी उद्योग संचालन गर्न नसकिने स्पष्टीकरण चिनी उद्योगीहरुले दिएका छन्। नेपाल चिनी उद्योग महासंघका अध्यक्ष शशीकान्त अग्रवालले अत्यधिक घाटामा गएकाले चिनी उद्योग संचालन गर्न सकिने अवस्था नरहेको प्रष्टयाएका हुन्।
बुधबार संघीय संसद्को उद्योग तथा वाणिज्य र श्रम तथा उपभोक्ता हित समितिको बैठकमा बोल्दै उनले चिनीको यथार्थपरक मूल्य नतोक्ने हो भने उखु कृषकको बक्यौता रकम तिर्न नसक्ने बताएका थिए। उखु किसानको बक्यौता रकम तिर्न संसदीय समितिले पटक-पटक उद्योगीलाई सचेत गराउँदै आएको छ।
महासंघका अध्यक्ष अग्रवालले चिनी घाटामा बिक्री गर्नु परेकाले किसानको बक्यौता रकम दिन नसकिने बताए। 'सरकारले प्रतिकेजी चिनीको मूल्य ५५ रुपैँया तोकिदिएको छ। सोही मूल्यमा चिनी बिक्री गर्दा उद्योग मारमा पर्छन्,' उनले भने।
प्रतिकेजी चिनीको उत्पादन लागत नै ५५ रुपैयाभन्दा बढी पर्न जाने भन्दै तत्काल चिनीको मूल्य यथार्थपरक बनाउन पनि सरकारसँग उनको माग थियो।
उखु किसानहरुको बक्यौता रकम तीर्न संसदीय समितिले पटक–पटक चिनी उद्योगहहरुलाई सचेत गराउँदै आएको छ।
यसअघि उद्योग, वाणिज्य तथा आपूर्ति मन्त्री मातृकाप्रसाद यादवले चिनी उद्योग संचालनका लागि उद्योगीहरुलाई आग्रह गरेका थिए।
मन्त्री यादवले चिनी उद्योग संचालनका लागि चिनी व्यवसायीहरुसँग आवश्यक छलफल गर्न सरकार तयार रहेको पनि स्पष्ट पारे।
मन्त्री यादवले चिनी र उखुको मूल्य २ दिन भित्र तोक्ने तयारी भईरहेको पनि समितिलाई जानकारी दिए। उद्योगीहरुकै सल्लाहमा प्रधानमन्त्री केपी शर्मा ओलीले चिनीको आयातमा प्रतिबन्ध लगाएको पनि उनले स्मरण गराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
