काठमाडौं– भारतले नेपालका लागि नयाँ राजदूतमा वरिष्ठ कूटनीतिज्ञ सुधाकर दलेलाको नाम प्रस्ताव गरेको छ।
तत्कालिन राजदूत नवीन श्रीवास्तवको कार्यकाल सकिएसँगै भारतले उनको स्थानमा वरिष्ठ कूटनीतिज्ञ सुधाकर दलेलालाई नयाँ राजदूतका रूपमा प्रस्ताव गरेको हो ।
दलेलाको एग्रिमो (राजदूतका रूपमा स्वीकार गर्ने औपचारिक सहमति) का लागि भारतबाट पत्र आएको परराष्ट्र मन्त्रालय स्रोतले जनाएको छ।अब नेपाल सरकारले उनको नाममा एग्रिमो स्वीकृत गरेपछि नियुक्तिको प्रक्रिया अघि बढ्नेछ।
नेपालका लागि प्रस्तावित दलेला भारतीय विदेश सेवा (आईएफएस) का सन् १९९३ ब्याचका अधिकारी हुन्। उनी हाल भारतीय विदेश मन्त्रालयमा आर्थिक सम्बन्ध सचिवका रूपमा कार्यरत छन्। उनले सन् २०२५ सेप्टेम्बरदेखि उक्त जिम्मेवारी सम्हाल्दै आएका छन्।
आर्थिक कूटनीति, बहुपक्षीय सम्बन्ध र छिमेकी मुलुकसँगको सम्बन्ध व्यवस्थापनमा लामो अनुभव भएका दलेलालाई भारतले महत्वपूर्ण जिम्मेवारी दिँदै आएको छ। उनी सन् २०२६ मा भारतको अध्यक्षतामा नयाँदिल्लीमा सम्पन्न १८औँ ब्रिक्स सम्मेलनमा भारतका ‘शेर्पा’ अर्थात् उच्चस्तरीय मुख्य वार्ताकारका रूपमा समेत सक्रिय थिए।
दलेलाको नेपालसँगको सम्बन्ध पनि पुरानो छ। भारतीय विदेश मन्त्रालयको उत्तर महाशाखामा निर्देशक तथा पछि संयुक्त सचिवका रूपमा कार्यरत रहँदा उनले नेपाल र भुटानसँगको सम्बन्ध हेरेका थिए। सन् २०१६ देखि २०१९ सम्म उनले उत्तर महाशाखाको संयुक्त सचिवका रूपमा नेपालसम्बन्धी मामिला हेरेको भारतीय विदेश मामिला तथा कूटनीतिक अध्ययनसम्बन्धी संस्थाको विवरणमा उल्लेख छ।
यसअघि उनले सन् २०२२ देखि २०२५ सम्म भुटानका लागि भारतीय राजदूतका रूपमा काम गरेका थिए। त्यसअघि उनी अमेरिकाको वासिङ्टनस्थित भारतीय दूतावासमा उपनियोग प्रमुख, शिकागोका लागि भारतीय महावाणिज्यदूत तथा भारतीय प्रधानमन्त्रीको कार्यालयमा निर्देशकका रूपमा समेत जिम्मेवारीमा थिए।
दलेलाले भारतको विश्व व्यापार संगठन (डब्लूटीओ) स्थित स्थायी नियोगमा समेत काम गरेका छन्। सन् २०१४ देखि २०१६ सम्म उनी डब्लूटीओमा भारतका उपस्थायी प्रतिनिधिका रूपमा कार्यरत थिए। व्यापार नीति, आर्थिक सम्बन्ध र विकास साझेदारीमा उनको अनुभवका कारण पछिल्लो जिम्मेवारीमा उनले भारतको आर्थिक कूटनीति, ग्लोबल साउथसँगको विकास साझेदारी र बहुपक्षीय आर्थिक सम्बन्ध हेर्दै आएका छन्।
नेपाल सरकारले पनि भारतसहित विभिन्न मुलुकका लागि नयाँ राजदूत सिफारिस गरिसकेको छ।
दलेला नेपालका लागि राजदूत बनेमा नेपाल–भारत सम्बन्धका साथै व्यापार, आर्थिक सहकार्य, विकास साझेदारी र सीमा तथा पूर्वाधारसम्बन्धी विषयमा उनको अनुभव उपयोगी हुने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
