काठमाडौं– प्रधानमन्त्री केपी शर्मा ओलीले निर्मला पन्तको बलात्कारपछि भएको हत्याको घटना सम्पूर्ण मानवीय सभ्यता र चिन्तनकै लागि घिनलाग्दो चुनौति भएको बताएका छन्।
मंगलबार काठमाडौंको प्रज्ञा भवनमा आयोजित ‘बालबालिकासँग प्रधानमन्त्री’ नामक अन्तरक्रिया कार्यक्रममा उनले घटना सरकारले नगराएको बताए। 'यस्तो घटना हुनैहुँदैनथ्यो', उनले भने, 'तर, त्यो घटना सरकारले गराएको त होइन। अपराधीहरुले गरे। तर अपराधीले छुट पाउनुहुँदैन। अपराधीको खोजी गर्नुपर्छ र अपराधीलाई कारबाही गर्नुपर्छ भनेर सरकार लागि परेको छ।'
प्रधानमन्त्रीले अहिलेसम्म धेरैवटा टिमहरु बनाएर पठाएको बताउँदै अनुसन्धान कार्य भइरहेको पनि बताए। 'त्यहाँ प्रहरीले सुरुमा केही गल्तीहरु गरेको देखिन्छ। त्यसपछि त्यो गल्ती किन र कसरी भयो समेतको खोजी र प्रहरीको अरु टिमहरु पठाएर अनुसन्धान कार्य भइरहेको छ। पछिल्लो समयमा एआइजीको नेतृत्व सम्मबाट छानबिनका लागि पठाइएको छ', उनले भने।
प्रधानमन्त्रीले यस प्रकरणमा आश्चर्यजनक कुराहरु भइरहेको बताए। 'केही मानिसहरु अपराध आफूले यसरी गरेको हो भनेर बयान दिन्छन्, तर डिएनए मिल्दैन। केही रहस्यपूर्ण कुराहरु छन् त्यसमा, डिएनए मिल्दैन', उनले भने।
निर्मलाका न्यायका निम्ति चलेका अभियानप्रति पनि उनले असन्तुष्टि जनाए। 'यस घटनाको छानबिन गर्ने संस्थाले स्वतन्त्र ढंगले छानबिन गर्न पाएको अवस्था छैन', उनले भने, 'त्यसभित्र कतिपय शक्तिहरुले आफ्नो स्वार्थ त्यसभित्र मिसाएर त्यसलाई झन्डा बनाएर कुदेको पनि देखिन्छ।'
प्रधानमन्त्रीले निर्मलाको घटनापछि पनि प्रहरी धेरै अपराधीलाई पत्ता लगाएको बताए। 'तर, दुख लाग्दो र आश्चर्यजनक कुरा निर्मला पन्तको अझै यथार्थ अन्तिम रुपमा टुंगो लागेको छैन। कडा निर्देशन यस सन्दर्भमा दिइएको छ। म विश्वस्त छु, अलिकति ढिलोचाँडो भए पनि यस घटनाको अपराधीहरुलाई कुनै पनि हालतमा पत्ता लगाउने, कानुनको दायरामा ल्याउने र सजायको भागीदार बनाउने कुरामा विश्वस्त छौं। त्यसमा सरकार लागिरहेको छ', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
