काठमाडौं– कारागारमा रहेका गुण्डा नाइके समीरमान सिंह बस्नेत समूहको एक जनासहित एक दर्जन व्यक्तिलाई प्रहरीले पक्राउ गरेको छ। प्रहरीको केन्द्रीय अनुसन्धान ब्युरो (सिआइबी)को टोलीले उनीहरुलाई पक्राउ गरेको हो।
पक्राउ पर्नेमा रोहित मगर भनिने पूर्णबहादुर पुलामी, सलिना शेर्पा भन्ने संगीता राई, विवेक दनुवार भन्ने धनेश्वरकुमार दनुवार, पवन विक, सन्तोष लामा, मनिष ढुंगाना, सुरेश राई, मनोज लामा, समीर लामा, सरोज भन्ने सरोजकुमार घिसिङ, सागर राई र डिएसपी लोप्साङ भनेर चिनाउने जगत योञ्जन छन्।
उनीहरुले संगठित रुपमा समूह बनाएर लामो समयदेखि ठगी गर्दै आएको सिआइबीले जनाएको छ। नक्कली नोट, नक्कली डलर देखाएर ठगी गर्ने गरेका उनीहरु पछिल्लो समय नक्कली सुनलाई सक्कली भन्दै ४० लाख रुपैयाँ ठगी गरेको आरोपमा पक्राउ परेका छन्। उनीहरुले रकम ठगी गरेपछि दामासाहीका हिसाबले बाँड्ने गरेका छन्।
यसरी ठगी भयो ४० लाख
अन्जु शर्मा न्युरोडमा सुनचाँदी पसल सञ्चालन गर्छिन्। उनको सम्पर्क यो समूहका पवन विक नाम गरेका युवासँग हुन्छ। भेटघाटकै क्रममा एक दिन पवनले अन्जुलाई भन्छन्, ‘बजारमा सुनको अभाव छ। म एक किलो सुन भएको मान्छे भेटाइदिन्छु। मिलाएर दिन्छु लिनू।’
५०/५५ लाख रुपैयाँ किनबेच गर्ने गरे पनि एक किलो सुन अन्जुलाई ४० लाख रुपैयाँमै दिलाइदिने वचन विकले दिन्छन्।
सस्तैमा सुन पाउने भएपछि मख्ख हुँदै अन्जु पैसा निकाल्न बैंक अफ काठमाडौंको न्युरोड शाखा जान्छिन्। एकैपटक एक जनाले ४० लाख रुपैयाँ निकाल्न नमिल्ने। त्यसपछि उनले पवन र बैंकमा आएका अन्य मान्छको सहयोगमा ४० लाख रुपैयाँ निकाल्छिन्।
४० लाख पैसाको झोला बोकेकी अन्जुलाई विकले स्कुटरमा राखेर बौद्ध पुर्याउँछन्।
बौद्धको एक होटल। जहाँ सलिना भनिने संगीता राईसहित तीन जना हुन्छन्। संगीताले नाता जोड्दै भन्छिन्, 'केटाहरुको भर पर्नु हुँदैन। म सस्तोमा तिमीलाई सुन दिन्छु।'
ती कुरा भएपछि अन्जुलाई होटलको माथिल्लो तलामा लगिन्छ।
४० लाखको बिटो संगीताले बुझ्छिन्। त्यसपछि प्लास्टिकको एउटा पोको अन्जुलाई थमाउँदै संगीताले भन्छिन्, ‘यहाँ वरपर नखोल्नू। प्रहरीका सिआइडी पनि हुन सक्छन्। घरमा लगेर मात्रै खोल्नू। कसैलाई नदेखाउनू। लुटिन पनि सक्छ।’
संगीताको सल्लाह मनन गर्दै अन्जु आफ्नो न्युरोडको सुन पसलतिर लाग्छिन्।
प्लास्टिकको पोको। त्यसभित्र पनि कालो टेपले बेरेको पोको फुकालिन्छ। सुनको काम गरेर अभ्यस्त भइसकेकी उनलाई सुन चिन्न खासै गाह्रो भएन। तैपनि जाँच गरिन्। उनको अनुमान मेल खायो। ठगीको यो समूले अन्जुलाई सक्कली भन्दै ४० लाख रुपैयाँमा नक्कली सुन बेचेका थिए।
ठगिएको थाहा पाएपछि गत कात्तिक १६ गते उनले सिआइबी गएर उजुरी गरिन्। उनकै उजुरीको आधारमा सिआइबीले नक्कली सुनलाई सक्कली भन्दै ठगी गर्ने यो समूहका १२ जनालाई पक्राउ गरेको छ। उनीहरुलाई काठमाडौं, काभ्रे, ललितपुर लगायतका जिल्लाबाट पक्राउ गरिएको सिआइबी स्रोतले जानकारी दियो। पक्राउ परेका उनीहरुलाई आज मंगलबार अदालत पेश गरिएको छ।
डिएसपीको धाक र समीरमानको रवाफ देखाउँदै ठगी
पक्राउ परेका १२ मध्ये जगत योन्जनले आफूलाई डिएसपी लोप्साङ भनेर चिनाउँदै आएका छन्। नेपाल प्रहरीको डिएसपी भएको नक्कली परिचय दिँदै उनले ठगी गर्ने गरेको सिआइबीले जनाएको छ। नक्कली सुनको कारोबार हुने बेला 'प्रहरीको कुनै डर मान्नु पर्दैन, म पनि डिएसपी हुँ, सबै सेटिङ मिलाएको छु' भन्दै उनले सुन किन्न आउने व्यक्तिलाई आश्वासन दिने काम गर्ने गरेको प्रहरी अनुसन्धानबाट खुलेको छ।
पक्राउ परेका सरोज भन्ने समीरकुमार घिसिङले थुनामा रहेका गुण्डा नाइके समीरमान बस्नतेको समूहको सदस्य भएको सिआइबी अनुसन्धानबाट खुलेको छ। गुण्डा नाइके बस्नेत जेल चलान भएपछि उनी सो समूहबाट अलग भएर छुट्टै समूह खडा गरी ठगी र लुटपाट गर्न थालेको प्रहरीले जनाएको छ।
चोरीका बाइकबाटै ठगीको धन्दा
प्रहरीले उनीहरुको साथबाट ३ वटा चोरीको मोटरसाइकल समेत बरामद गरेको छ। निकै महँगो मानिने ३ वटा केटिएम डुक बाइक प्रहरीले बरामद गरेको हो। उनीहरुले बा ८५ प ५९८ नम्बरको डुक, बा ७५ प ५४७० नम्बरको डुक र बा ७७ प २९३१ नम्बरको चोरीको मोटरसाइकल प्रयोग गर्ने गरेको पाइएको छ। मोटरसाइकल चोरी गरेर उनीहरुले क्रमश: बा ८३ प ८०३३, बा ७८ प ८९७६ र बा ८९प १६१५ नम्बरको प्लेट हालेर प्रयोग गर्ने गरेका थिए।
ठगी गर्न जाँदा उनीहरुले यीनै मोटरसाइकल प्रयोग गर्ने गरेको देखिन्छ। त्यस्तै उनीहरुले सरकारी छाप, दस्तखत समेत नक्कली बनाएर ब्लु बुक समेत बनाएर चलाउने गरेको पाइएको छ।
कहाँबाट आउँछन् नक्कली सुनका बिस्कुट?
पछिल्लो समय प्रहरीले धमाधम नक्कली सुनका बिस्कुटसहित मान्छे पक्राउ गर्दै आएको छ। नक्कली सुनसहित मान्छे पक्राउ परे पनि त्यो सुन कहाँबाट आएको हो भन्ने कुरा अहिलेसम्म प्रहरीले पत्ता लगाउन सकेको छैन। केही समयअघि महानगरीय प्रहरी परिसर काठमाडौंले नक्कली सुनसहित केही मान्छे पक्राउ गरेको थियो। यसबारे नक्कली सुन कहाँबाट आयो भनेर पत्रकार एसएसपी वसन्त लामालाई प्रश्न गर्दा यसबारे अनुसन्धान भइरहेको बताएका थिए।
तर प्रहरीले अहिलेसम्म नक्कली सुनका बिस्कुट कहाँ बन्छ, कहाँबाट आउँछ भन्ने अहिलेसम्म पत्ता लगाउन सकेको छैन। पक्राउ परेका केही व्यक्तिले भारतबाट आउने गरेको बताएका छन् भने केही व्यक्तिले उत्तरी नाका चीनबाट आउने गरेका छन्। प्रहरीले ठगहरुले नेपालमै नक्कली सुनका बिस्कुट बनाउने गरेको अनुमान गरे पनि अहिलेसम्म प्रमाण फेला परेको छैन। जसकारण बारम्बार मान्छे पक्राउ पर्दा पनि नक्कली सुनलाई सक्कली भन्दै ठगी हुने क्रम रोकिएको छैन।
(प्रतीकात्मक तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
