काठमाडौं– एनसेलको सेयर होल्डर कम्पनी सुनभेरा क्यापिटलले कर छली गरेको विवादमा अन्तिम सुनुवाइका लागि सोमबार पेसी तोकिएको छ।
न्यायाधीशद्धय केदारप्रसाद चालिसे र पुरुषोत्तम भण्डारीको इजलाशमा पेसी रहेको छ।
एनसेलबाट २० प्रतिशत सेयर गैरआवसीय नेपाली संघ (एनआरएनए)का पूर्व अध्यक्ष उपेन्द्र महतोको कम्पनी ‘सिनर्जी’सँग खरिद गर्दा लाभकर नतिरेको र अन्य करको दायित्वसमेत छलेको भन्दै ठूला करदाता कार्यालयले दाबी गरेर थप कर निर्धारण गरेपछि श्रेष्ठ २०७४ कात्तिक २२ गते सर्वोच्च पुगेका थिए।
उनीभन्दा पहिला महतोको कम्पनी ‘सिनर्जी’ अदालत पुगेको थियो। पहिलो सुनुवाइ मै ‘सिनर्जी’बाट तत्काल कर असुल नगर्न अन्तरिम आदेश भएपछि निरज गोविन्द श्रेष्ठ अदालत पुगेका थिए।
एनसेलको सेयर बिक्रीमा श्रेष्ठसँग निर्धारण भएको कर असुल नगर्न कात्तिक ५ मा वर्तमान प्रधानन्यायाधीश ओमप्रकाश मिश्र र न्यायाधीश डम्बरबहादुर शाहीको संयुक्त इजलासले ठूला करदाता कार्यालय हरिहर भवनको नाममा अन्तरिम आदेश जारी गरेको थियो। महालेखा परीक्षकको कार्यालयले उल्लेख गरेको बेरुजुमा ब्याज र हर्जाना जोड्दा श्रेष्ठको दायित्व ६ अर्ब १५ करोड रुपैयाँभन्दा माथि देखिएको थियो। उक्त रकम असुल हुुनपर्ने भन्दै महालेखाले बेरुजुमा राखेपछि ठूला करदाता कार्यालयले असुल गर्न लागेको थियो।
सर्वोच्चमै महतो, एनसेल र ‘रिनोल्ड होल्डिङ्स’ले हालेको मुद्दा पनि विचाराधीन छ। करीब ६५ अर्ब लाभकर विवादमा एनसेल र रिनोल्ड सर्वोच्च पुगेका थिए। महतोको कम्पनी ‘सिनर्जी’ कूल १६ हजार ५ सय ८४ रुपैयाँ प्रतिकित्ता बजारमूल्य भएकोमा आफूखुसी मूल्य निर्धारण गरी प्रतिसेयर १ हजार रुपैयाँ मात्र देखाएर बिक्री गरी १५ प्रतिशत लाभकर तिरेपछि ठूला करदाताको निगरानीमा परेको थियो। सोही आधारमा उसको थप कर दायित्व निर्धारण भएको थियो।
७ पुस २०७२ मा एनसेल प्रालिको सेयर होल्डर ‘रेनोल्ड होल्डिङ्स’को ८० प्रतिशत सेयर ‘टेलियासोनेरा नर्वे नेपाल’ले मलेसियाको ‘आजियटा ग्रुप बेहार्द’लाई बिक्री गरेको थियो। करिब एक खर्ब ४० अर्ब रुपैयाँमा उक्त सेयर खरिद–बिक्री भएको थियो। त्यसमा करिब ४० अर्ब रुपैयाँ पूँजीगत लाभकर लाग्ने अनुमान तत्कालीन अवस्थामा गरिएको थियो।
तर, समयमा कर नतिरहेकाले त्यसयता शूल्क, जरिवानासहित त्यस्तो लाभकर करिब ७० अर्ब रुपैयाँ पुगेको दाबी ठूला करदाता कार्यालयको छ। त्यसमध्ये करिब २२ अर्ब रुपैयाँ कर एनसेलले भुक्तानी गरिसकेको छ।
यसबीचमा आजियटाले दुई पटक गरी लाभांसवापतको करिब २४ अर्ब रुपैयाँ नेपाल बाहिर लगिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
