काठमाडौं- नेपालका घरेलु तथा साना उद्योगमा २४ लाख ६६ हजारले रोजगारी पाएका छन्।
नेपाल घरेलु तथा साना उद्योग महासङ्घका अनुसार देशका दुई लाख बढी उद्योगमा उनीहरुले यसरी रोजगारी पाएका हुन्। महासङ्घका कार्यकारी निर्देशक चुडामणि भट्टराईले अहिलेसम्म नेपालमा ३ लाख ८६ हजार घरेलु तथा साना उद्योग दर्ता भएकामा २ लाख ६४ हजार नवीकरणमा रहेका बताए।
कति उद्योग सञ्चालनमा छन् भन्नेमा यकिन विवरण नभए पनि अनुमानित २ लाख उद्योग सञ्चालनमा रहेका महासङ्घका कोषाध्यक्ष सत्यनारायण प्रजापतिले जानकारी दिए। नेपालमा सञ्चालित उद्योगमा कूल ३५ हजार ३ सय करोड लगानी रहेको भन्दै महासङ्घका कर्याकारी निर्देशक भट्टराईले घरेलु उद्योगको विकासमा सरकारको कम ध्यान पुगेको बताए।
विसं २०४७ मा सङ्घको रुपमा स्थापना भएको संस्था २०५३ सालमा महासङ्घ बनेको थियो । महासङ्घका ३५ हजार सदस्य रहेका छन्। महिला मात्रै ११ हजार छन्। उत्पादनमूलक सहकारी एसोसिएट सदस्य हुने व्यवस्था र १९ वस्तुगत सङ्घ रहेका जनाइएको छ। औद्योगिक व्यवसाय ऐन २०६३ अनुसार ५ लाख पूँजी र ९ जना कामदार भएका तथा २० किलोवाटभन्दा कम विद्युत् खपत गर्ने उद्योग यसमा पर्छन्।
घरेलु उद्योगमध्ये सेवामूलक उद्योगमा ४५ प्रतिशत रहेका कार्यकारी निर्देशक भट्टराईले बताए। ऊर्जा र सञ्चार क्षेत्रमा भने न्यून लगानी छ। सबैभन्दा बढी प्रदेश ३ मा ३७ प्रतिशत उद्योग सञ्चालनमा छन्। प्रदेश ५ मा १७, प्रदेश १ मा १४, प्रदेश ४ मा ९ सुदूरपश्चिममा ६ र गण्डकी प्रदेशमा ९ प्रतिशत उद्योग सञ्चलालनमा छन्।
अमेरिकाले नेपालका ७७ वस्तुमा सन् २०२५ सम्म भन्सार नै नलिने घोषणा गरेको जानकारी दिँदै उनले अहिले पस्मिनालगायत न्यून मात्रै वस्तु निर्यात भइरहेको बताए। महासङ्घले साना तथा घरेलु उद्योगको लगानीको वातावरण प्रभावकारी हुन नसकेको बताएको छ। कर्जा लिनदेखि विभिन्न काममा साना उद्योगीलाई समस्या परिरहेको महाङ्घको भनाइ छ।
महासङ्घका कोषाध्यक्ष सत्यनारायण प्रजापतिले ‘समृद्ध नेपाल, सुखी नेपाली’ बनाउन साना तथा घरेलु उद्योगको विकास जरुरी हुने औंल्याउँदै ‘नेपाली वस्तुको प्रयोग गरौं, नेपाली भएकोमा गर्व गरौं’ भन्ने नारालाई देशव्यापी बनाउनुपर्नेमा जोड दिए।
'साना तथा घरेलु उद्योगीलाई वित्तीय पहुँच नहुनु ठूलो समस्या छ,' प्रजापतिले भने, 'ऋण पाउन र व्यापार प्रवद्र्धनमा समेत हामी सक्तनौं, समस्यामा पर्छौं।' उद्योगमा सिप र दक्ष कामदारको सधै अभाव रहने गरेको महासंघको भनाइ छ। नेपाल नविकरणीय उर्जा परिसंघका सल्लाहकार तथा पूर्वमन्त्री गणेश शाहले देशलाई परनिर्भरताबाट स्वावलम्वी बनाउन उद्यमशिलताको विकास जरुरी रहेको औंल्याए।
नयाँ प्रविधिको विकाससँगै प्रविधिको उच्चतम प्रयोग गर्नुपर्नेमा जोड दिंदै शाहले दाता आउँदा खुसी हुने नभई रोजगारदाता आउँदा खुसी हुने अवस्था सिर्जना गर्नुपर्नेमा जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
