काठमाडौं- ३८ क्विन्टल तथा साढे ३३ किलो सुन तस्करीको आरोपमा काठमाडौं र मोरङ जिल्ला अदालतमा दायर भएको मुद्दामा ६ आरोपितमाथि सर्वोच्चमा सुनुवाइ हुँदैछ। शुक्रबार एकैदिन दुई न्यायाधीशको इजलासमा उनीहरुको पेशी रहेको छ।
काठमाडौ र मोरङ जिल्ला अदालतमा दर्ता भएको सुन तस्करी, कर्तव्य ज्यान तथा संगठित अपराध मुद्दामा उक्त अदालतको आदेशलाई चुनौती दिँदै उनीहरु सर्वोच्च पुगेका थिए।
३८ सय किलो सुन तस्करी र सनम शाक्य हत्या प्रकरणमा उच्च अदालत विराटनगर र जिल्ला अदालत मोरङको आदेशलाई चुनौती दिँदै दायर भएका चार थान मुद्दा न्यायाधीशद्वय केदारप्रसाद चालिसे र पुरुषोत्तम भण्डारीको इजलासमा पेशी रहेको थियो।
आरोपितहरु डिएसपी संजयबहादुर राउत, तुलाराम थारु, रामकुमार तिवारी र गोविन्दप्रसाद निरौलाको मुद्दा उक्त इजलासमा सुनुवाइ हुँदै छ। यसअघि पनि सोही इजलासले फाइल मगाउने आदेश गरेको थियो। एकै विषयमा दुई पटक मुद्दाको सुनुवाइ गर्ने परम्परा नभएपछि पछिल्ला समयमा केही विवादस्पद र आर्थिक चलखेल हुने मुद्दा हेर्न थालिएको छ।
मोरङ जिल्ला अदालतको आदेशविरुद्ध सात आरोपितले सर्वोच्चमा निवेदन दिएका थिए। सरकारी पक्षले पनि दुई जनाविरुद्ध निवेदन दर्ता गराएको छ। उनीहरुको निवेदनमा पहिलो सुनुवाइ भइसकेको छ। दोस्रो सुनुवाइमा सामान्य धरौटीमा छोड्ने विषयमा आदेश गर्न आरोपितहरुले चलखेल गरिरहेका छन्। यही चलखेल अन्तर्गत पटकपटक एकै न्यायाधीशको इजलासमा पेशी तोकिँदै आएको छ।
सर्वोच्च पुगेका अधिकांश आरोपितलाई जिल्ला अदालतले थुनामा राख्ने आदेश गरेको थियो। त्यसविरुद्ध उनीहरू उच्च अदालत समेत पुगेका थिए। तर उच्चले पनि केही आरोपितलाई थुनामुक्त गर्न अस्विकार गरेपछि उनीहरु सर्वोच्च पुगेका हुन्। यसअघिको सुनुवाइमा सर्वोच्चले फाइल मगाएकाले आजको सुनुवाइमा थुनामा राख्ने निर्णयको बारेमा तल्लो अदालतले दिएको आदेशको वैधानिकता जाँच गर्नेछ।
सुन तस्करी प्रकरणमा जिल्ला र उच्च अदालतले धरौटीमा रिहा गर्न अस्वीकार गरेपछि डिएसपी राउत, थारु, तिवारी, सम्बिर तोलाङ्गे, हेमन्त गौतम, राजन थापा दम्बा सान्डु तामाङलगायत सर्वोच्च पुगेका थिए।
जिल्ला र उच्च अदालतको आदेशलाई चुनौती दिँदै उनीहरूले सर्वोच्चमा १७ नम्बरको निवेदन दिएका हुन्। तल्लो अदालतको आदेश चित्त नबुझे माथिल्लोमा जान पाउने सुविधाअन्तर्गत उनीहरू सर्वोच्च आएका हुन्।
करिब डेढ महिना लामो अनुसन्धानपछि गत बैसाख २६ गते जिल्ला सरकारी वकिलको कार्यालयले बहालवाला प्रहरी अधिकृतसहित २९ जनालाई पक्राउ गरी अदालतमा पेस गरेको थियो। उनीहरूविरुद्ध संगठित अपराधअन्तर्गत आपराधिक समूह स्थापना गरी सुन चोरीपैठारी र निकासी गरेको, अपहरण तथा शरीर बन्धक बनाएको र कर्तव्य ज्यान मुद्दामा आरोपपत्र दायर भएको थियो।
साढे ३३ किलोका दुई आरोपितको सुनुवाइ
साढे ३३ किलो सुन तस्करी मुद्दामा आरोपितहरु श्यामकृष्ण श्रेष्ठ र गुप्तलाल भुसालको मुद्दामा न्यायाधीशद्वय ईश्वरप्रसाद खतिवडा र प्रकाशमानसिंह राउतको इजलासमा सुनुवाइ भइरहेको छ।
श्रेष्ठ विमानस्थलका कर्मचारी हुन् भने भुसाल व्यवसायी हुन्। त्रिभुवन विमानस्थलबाट अवैधरुपमा साढे ३३ किलो सुन ल्याएको घटनामा संलग्न भएको भन्दै प्रहरीले ३३ जनाविरुद्ध २०७३ फागुन २२ गते मुद्दा दायर गरेको थियो।
नेपाल प्रहरीको केन्द्रीय अनुसन्धान ब्युरो (सिआइबी) ले पक्राउ परेका १२ जना र फरार सूचीमा रहेका २१ जनाविरुद्ध काठमाडौं जिल्ला अदालतमा मुद्दा दायर भएको थियो।
पुस २१ गते विमानस्थलबाट साढे ३३ किलो अवैध सुन सिआइबीले नियन्त्रणमा लिएको थियो। सुन तस्करीमा संलग्न रहेको भन्दै सिआइवीले विमानस्थलमा कार्यरत एसएसपी श्याम खत्रीलाई समेत पक्राउ गरेको थियो। यस्तै त्रिभुवन अन्तराष्ट्रिय विमानस्थलमा तथ्यांक अधिकृतको रुपमा कार्यरत श्रीनारायण यादवसमेत पक्राउ परेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791271370.png)
-1786602170.png)
