काठमाडौं- अख्तियार दुरुपयोग अनुसन्धान आयोगले जिल्ला कृषि विकास कार्यालय, दैलेखका प्रमुख वरिष्ठ कृषि विकास अधिकृत डा नरहरिप्रसाद घिमिरेसहित १३ जनाविरुद्ध विशेष अदालतमा भ्रष्टाचार मुद्दा दायर गरेको छ।
कृषि बीउ तथा बिजन वितरणमा अनियमितता गरेको, कृषि सामग्री खरिद नै नगरी खरिद गरेको देखाई ढुवानीसमेत गरेको नक्कली बिल भरपाई बनाई भ्रष्टाचार गरेको अभियोग अख्तियारले लगाएको छ।
उक्त बिल भरपाई सदर गरी भुक्तानी लिनेदिने कार्य गर्ने, बीउ खरीद गर्ने र प्रयोग गर्ने प्रयोजनलाई कार्यालयका कर्मचारी तथा ठेकेदारसँग मिलेर भ्रष्टाचार गरेको पाइएकाले मुद्दा दायर गरिएको आयोगले जनाएको छ।
आयोगले तत्कालीन कार्यालय प्रमुख डा घिमिरेले १० लाख ५० हजार ९ सय ६१, बागवानी विकास अधिकृत सूर्यनाथ योगीविरुद्धले १८ लाख ३६ हजार ४००, कृषि प्रसार अधिकृत नरेन्द्रबहादुर थापाले १० लाख तीन हजार २ सय ६३ रुपैयाँ भ्रष्टाचार गरेको भन्दै मुद्दा दायर गरेको हो। यसैगरी, लेखा अधिकृत ढालबहादुर हमालले १२ लाख ४६ हजार ४८१, प्राविधिक सहायक गमानसिंह थापाले दुई लाख २४ हजार ४३१, बागवानी विकास अधिकृत भुवनबहादुर मल्ल र नायब सुब्बा नमराज थापाले ८ लाख १२ हजार १७८ भ्रष्टाचार गरेको अभियोग लगाएको छ।
यस्तै, लेखापाल रामकुमार शाहले १६ लाख ९१ हजार ७ सय १७, प्राविधिक सहायक मिमबहादुर शाहीले एक लाख ७५ हजार २ सय ६२, नायब प्राविधिक सहायक रङ्गबहादुर वपालले ३९ हजार ४५०, प्राविधिक सहायक पूर्णबहादुर थापा, सबइञ्जिनीयर रामप्रसाद शर्माले १० लाख २७ हजार ४ सय २ र ताजा तरकारी उत्पादन समूह दैलेखका अध्यक्ष प्रेमबहादुर शाहीलाई २२ हजार बराबरको भ्रष्टाचार गरेको अभियोग आयोगले लगाएको छ। उनीहरूविरुद्ध बिगो असुल गरी कैद सजायको समेत माग गरिएको आयोगका प्रवक्ता रामेश्वर दङ्गालले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
