काठमाडौं- वैदेशिक रोजगार कार्यालय ताहाचलमा श्रम स्वीकृतिका लागि सेवाग्राहीले घन्टौं लाइन बस्नु परेको छ। कार्यालयमा हुने भीड व्यवस्थापन गर्न कार्यालयले अनलाइन टोकन प्रणाली लागू गरेपनि समस्या झन् विकराल बन्दै गएको देख्न सकिन्छ। सेवाग्राहीको भीड नियन्त्रणमा लिन प्रहरीलाई हम्मे हम्मे परिरहेको छ।
मंसिर १६ गतेदेखि कार्यालयले अनलाइन मार्फत टोकन प्रणालीमा श्रम स्वीकृति जारी गर्न थाले पनि कार्यालय परिसरमा भीड घटेको छैन।
कामदारका रूपमा विदेश जानुपूर्व श्रम स्वीकृति लिनुपर्छ। यही कामका लागि वैदेशिक रोजगार विभाग अन्तर्गतको वैदेशिक रोजगार कार्यालय, ताहाचलमा दैनिक ३ हजारभन्दा बढी सेवाग्राहीको भीड लाग्ने गरेको छ।
सेवाग्राहीको लाइन कार्यालयको गेटबाहिर धेरै परसम्म पुग्ने क्रम तिहारपछि चलिरहेकै छ। अनलाइनबाटै आवेदन दिन पाइने भएपनि कार्यालयले लाइन व्यवस्थापन गर्न सकेको छैन। जसका कारण सेवाग्राही दिन लाइनमा बसेर सास्ती व्यहोर्नु परेको छ।
श्रम स्वीकृति लिन सेवाग्राही राती ४ बजेदेखि नै लाइनमा बस्ने गरेका छन्।
दसैंतिहार मनाउन स्वदेश फर्किएका युवा फर्किन थालेकाले श्रम स्वीकृति लिनेको चाप बढेको कार्यलयका उपसचिव सुरेश जोशी बताए।
कात्तिकको अन्तिम सातादेखि कार्यालयमा सेवाग्राहीको चाप बढिरहेको उनको भनाइ छ। टोकनमाफत नम्बरका आधारमा सेवाग्राही श्रम स्वीकृति लिन नआउँदा भीड नियन्त्रण गर्ने समस्या भइरहेको कार्यलयको भनाइ छ।
अनलाइन प्रणालीबाट आवेदन लिँदा पनि सेवाग्राही व्यवस्थापन गर्न कार्यालय सफल भएको छैन। सेवाग्राहीलाई समस्या नहुने र श्रम स्वीकृतिको लागि आउने सबै सेवाग्राहीले सहज रुपमा श्रम स्वीकृति लिन पाउने व्यवस्था मिलाइएको कार्यलयको दाबी छ।
समयमा श्रम स्वीकृति नपाउदाँ जहाज छुट्यो
साउदीबाट बिदामा आएका सप्तरीका मोहम्मद अलिक मन्सुरको सोमबार साउदी जानुपर्ने टिकट थियो। मन्सुरले आइतबारदेखि लाइनमा बस्दा पनि श्रम स्वीकृति नपाएपछि जहाज छुटेको बताए। बुधबारसम्म साउदी नपुगे १२ वर्षदेखिको बोनस र रोजगारी दुवै गुम्ने उनको गुनासो छ। जहाज छुटेपछि पुनः टिकट काट्नुपर्ने भएको उनले बताए।
महत्तरीका विजय विकको पनि समस्या उस्तै छ। कतारबाट घर बिदामा आएका विजयले बिहिबारसम्म कतार पुग्नै पर्नेछ। उनले भने, 'समयमा पुगेन भने कम्पनीले तलबबाट पैसा अशुल्छ। बिहान ५ बजेदेखि लाइनमा बसेको छु। आज श्रम स्वीकृति पाइएन भने जहाज छुट्छ। बिहिवार बिहानको उडान छ।’
यस्तै, खोटाङका लिला श्रेष्ठ पनि शुक्रबारसम्ममा कुवेत फर्किसक्नु पर्ने बताउँछन्।
उनीहरु त प्रतिनिधि पात्र मात्र हुन्। हजारौं युवाको समस्या उस्तै छ। समयमा श्रम स्वीकृति जारी नहुँदा विमान छुटेर दोब्बर खर्च भइरहेको उनीहरुको गुनासो छ।
कार्यालयमा कर्मचारीको भनसुनमा आएका सेवाग्राहीको काम भने छिटो हुने गरेको उनीहरुको गुनासो छ।
कर्मचारी र दलालको मिलेमतो
कार्यालयमा सेवाग्राहीको चाप बढ्दै गएपछि बिचौलियाले सेटिङमार्फत छिटो काम गरिदिने भन्दै कामदार ठग्ने गरेका छन्।
सेवाग्राही विभाग बाहिर अलपत्र अवस्थामा रहँदा, काम नबन्दा र फ्लाइट छुट्ने समस्या हुँदा बिचौलियाले चलखेल गर्ने गरेका छन्। कार्यालयका ढोका पछाडि बिचौलियाले सेटिङमा काम गराउने गरेका छन्।
लामो लाइन बसेर काउन्टरसम्म पुगेका सेवाग्राही काम नबन्दा भने दिक्क भएर बिचौलियाकै सहयोगमा काम गराउने गरेका छन्। यस्तो अवस्था कुरेर बसेका दलालहरु सेवाग्राहीका सहयोगी बनेर मोलमोलाई गरी निश्चित रकम दिएपछि काम फटाफट हुने गरेको सेवाग्राहीको गुनासो छ।
कर्मचारी र दलालको मिलोमत्तोमा कार्यालयमा आर्थिक ठगी मौलाएको सेवाग्राहीको आरोप छ।
श्रम स्वीकृतिका लागि १५ सयदेखि २ हजारसम्म बिचौलियाले लिने गरेका छन्।
अनलाइन प्रणाली भएपनि सेवाग्राहीको सास्तीमा कुनै कमी आएको छ। घन्टौंको लाइनका साथै कार्यालयमा ठगी मौलाउँदा पनि सरकार रमिता हेरेर बसिरहेको सेवाग्राहीको गुनासो छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
