रामेछाप। उज्यालो नेपाल पार्टीका अध्यक्ष कुलमान घिसिङले पार्टीलाई देशको प्रमुख राजनीतिक शक्तिका रूपमा स्थापित गर्ने घोषणा गरेका छन्।
उज्यालो नेपाल पार्टी रामेछापको जिल्ला कमिटी पुनर्गठन गर्दै चिना लामाको अध्यक्षतामा ७५ सदस्यीय जिल्ला कमिटी घोषणा गरिएको अवसरमा शुक्रबार मन्थलीस्थित तीनलाल पार्कमा आयोजित संगठन विस्तार बैठकलाई सम्बोधन गर्दै घिसिङले यस्तो बताएका हुन्।
उनले उज्यालो नेपाल पार्टी अब ‘विकल्प’मा माक्र सीमित नरहने दाबी गर्दै आगामी दिनमा देशको ‘मेनस्ट्रिम’ राजनीतिक शत्ति बन्ने बताए। ‘अबको विकल्प होइन, अबको मेनस्ट्रिम पार्टी नै उज्यालो नेपाल पार्टी बन्छ,’ उनले भने।
घिसिङले पार्टी गठन भएदेखि नै आफूहरूलाई असफल बनाउन विभिन्न षड्यन्त्र भइरहेको दाबी गरे। जातीयतासहित विभिन्न आरोप तथा लाञ्छना लगाएर पार्टीलाई राजनीतिक रूपमा किनारा लगाउने प्रयास भएको उनको भनाइ थियो।
राष्ट्रिय स्वतन्त्र पार्टी (रास्वपा)सँगको एकता १२ दिनमै टुटेको प्रसङ्ग उल्लेख गर्दै घिसिङले आफूहरू विगतमा पनि यस्ता षड्यन्त्रमा परेको बताए। अब भने कुनै पनि प्रकारका षड्यन्त्रमा नफस्ने प्रतिबद्धता उनले व्यक्त गरे।
‘हाम्रो पार्टी गठन भएदेखि नै यस्ता षड्यन्त्रहरू रचिएका छन्। हामी एक पटक त्यस्ता षड्यन्त्रमा फसिसकेका पनि छौँ। त्यसबाट हामीले धेरै कुरा बुझेका छौँ,’ उनले भने, ‘अब फेरि पनि त्यस्ता षड्यन्त्रमा कुनै पनि हालतमा फस्ने छैनौँ भन्ने फ्रतिबद्धता व्यक्त गर्दछु।’
नयाँ राजनीतिक शत्तिको नारासहित आएको रास्वपा नेतृत्वको सरकारले समेत जनताको अपेक्षाअनुसार काम गर्न नसकेको घिसिङले टिप्पणी गरे। सरकार गठन भएको छ महिना बितिसकेकाले यसको कामको समीक्षा गर्न पर्याप्त समय भइसकेको उनको दाबी थियो।
‘अब तपाईँहरूले नयाँ पनि देख्नुभयो, नयाँको काम पनि देख्नुभयो। ६ महिना भनेको एकदमै लामो समय हो। छ महिनामा कस्ता काम हुनुपर्थ्यो, अहिले नयाँ सरकारका गतिविधि सबै देखिएकै छन्,’ उनले भने।
घिसिङले उज्यालो नेपाल पार्टीको नेतृत्वमा सरकार बने हरित क्रान्ति र हरित रूपान्तरणमार्फत देशको आर्थिक तथा सामाजिक रूपान्तरण गर्ने दाबी गरे। हरित रूपान्तरणलाई देशको समृद्धिसँग जोड्दै आर्थिक तथा सामाजिक विकासलाई गति दिने पार्टीको दृष्टिकोण रहेको उनले बताए।
यसैबीच, उज्यालो नेपाल पार्टी रामेछापले चिना लामाको अध्यक्षतामा ७५ सदस्यीय जिल्ला कमिटी पुनर्गठन गरेको छ। मन्थली नगरपालिकाकी चिना लामा अध्यक्षमा सर्वसम्मत चयन भएकी हुन्।
लिखु तामाकोशीका दामोदर तामाङ उपाध्यक्ष, खाँडादेवीका मोतीलाल घिसिङ सचिव तथा मन्थलीका सागर थापा, दोरम्बा शैलुङका अर्जुन घिसिङ र सुनापतिका तेन्जिङ लामा उपसचिव चयन भएका छन्। गोकुलगंगाका देव रुम्बालाई कोषाध्यक्षको जिम्मेवारी दिइएको छ।
यसअघि गत पुस ७ गते अञ्जान घिसिङलाई जिल्ला संयोजकको जिम्मेवारी दिँदै जिल्ला कमिटी गठन गरिएको थियो। संगठनको नेतृत्व गठन भएको करिब सात महिनापछि शुक्रबार आयोजित संगठन विस्तार बैठकमार्फत नयाँ नेतृत्वसहित जिल्ला कमिटीलाई पूर्णता दिइएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
