काठमाडौं- आफ्नो ‘फ्लाइङ करिअर’मा ९ हजार घन्टाभन्दा बढी समय आकाशमा उडेका हेलिकोप्टर पाइलट रामेश्वर थापाको संस्मरण 'बारुदमाथि उड्दा' सार्वजनिक हुने भएको छ। सञ्चार उद्यमीसमेत रहेका थापा माओवादी ‘जनयुद्ध’को कहालीलाग्दो समयमा जोखिम मोलेर घाइते सुरक्षाकर्मीहरूको उद्धारमा खटिएका थिए।
_x000D_
_x000D_
‘जनयुद्ध’का अधिकांश भिडन्तलगत्तै घटनास्थलमा पुगेर उद्धार कार्यमा जुटेका थापाले पुस्तकमा युद्धस्थलका आला घटना, छटपटाइरहेका घाइतेका चित्कार तथा आगोको मुस्लो र बारुदको धुवाँले रङ्मङ्गिएको बखतका उद्धारको वर्णन गरेका छन्।
_x000D_
_x000D_
नेपाल प्रहरीका पूर्व एआइजी राजेन्द्रबहादुर सिंहले क्याप्टेन थापाका बारेमा पुस्तकको भूमिकामा भनेका छन्, 'माओवादीले दोस्रोपटक खारा आक्रमण गर्दा सेनाका पाइलटले पनि खारामा थप एमुनेसन र फौज झार्न नसक्दा भिडन्त भइरहकै अवस्थामा क्याप्टेन थापाले अवतरण गरेका थिए । वरिपरि फाइरिङ भइरहेकै अवस्थामा जोखिम मोलेर थप सैन्य शक्ति र एमुनिसन पुर्याई घाइतेहरूको उद्धार गर्न सक्नुभयो। उहाँ नभएको भए सायद खारामा सेनाले ठूलै मूल्य चुकाउनुपर्थ्यो। त्यस बेलामा व्यवसायभन्दा पनि राष्ट्रको संवेदनशीलता बुझेर थापाले हेलिकप्टर उडाई हामीलाई सहयोग गर्नुभएको हो।'
_x000D_
_x000D_
पुस्तकमा रुकुमको खारा आक्रमणदेखि दैलेखको नौमुले र रामेछापको बेथानदेखि सिन्धुलीको भिमाद आक्रमण लगायतका चालीसभन्दा बढी स्थानको घटनाको तात्कालिक अवस्था र उद्धारको रोचक चित्राङ्कन क्याप्टेन थापाले गरेका छन्। साथै, काभ्रेपलाञ्चोकको सामान्य किसान परिवारमा जन्मेर हेलिकप्टर पाइलट बन्नका लागि गरेको मेहनत र सङ्घर्ष तथा जीवनमा उठाएका जोखिम र त्यससँग सम्बन्धित घटना र परिघटनाले उनको दुस्साहसपूर्ण चरित्रको समेत चित्राङ्कन पुस्तकमा गरिएको छ।
_x000D_
_x000D_
क्याप्टेन थापाको संस्मरण ‘जनयुद्ध’का दौरान सँगालेका दुर्लभ र जोखिमपूर्ण अनुभवको एरियल न्यारेटिभ हो।
_x000D_
_x000D_
अन्नपूर्ण पोस्टका पूर्व सम्पादक एवम् पत्रकार राजाराम गौतमले सम्पादन गरेको पुस्तकको आवरण प्रकाशन संस्था बुक-हिलले शनिबार सार्वजनिक गरेको छ। पुस्तक मंसिरको तेस्रो साता बजारमा आउने बुक-हिलले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
