नागोया, जापान– वरिष्ठ खेल पत्रकार नवीन अर्यालको बहुप्रतीक्षित पुस्तक ‘नेपाल–जापान खेल सम्बन्ध’ जापानको नागोयास्थित दियालो रेस्टुरेन्टमा विमोचन भएको छ।
अर्यालको पुस्तक जापानका लागि नेपाली कार्यवाहक राजदूत हरिहरकान्त पौडेलले एक समारोहबीच विमोचन गरेका हुन्।
विमोचन कार्यक्रममा गैरआवासीय नेपाली संघ (एनआरएनए) का वरिष्ठ उपाध्यक्ष रोविनप्रसाद गौचन, नेपाल सफ्ट टेनिस संघका अध्यक्ष तथा अन्तर्राष्ट्रिय सफ्ट टेनिस संघका मानार्थ अध्यक्ष विनय विक्रम शाह, पूर्वकराते खेलाडी देव घिमिरे, आईएसकेएका विश्व च्याम्पियन अविरल घिमिरे, मोना आईसीसी उपाध्यक्ष दीपक केसी, गैरआवासीय नेपाली संघ (एनआरएनए) जापानका महासचिव श्याम शीतल श्रेष्ठ तथा एनआरएनए जापान नागोया क्षेत्रीय समितिका संयोजक योमन देवानको उपस्थिति थियो।
विमोचन कार्यक्रममा ‘नेपाल–जापान खेल सम्बन्ध’ पुस्तकबारे आफ्नो धारणा राख्दै कार्यवाहक राजदूत पौडेलले पुस्तकमार्फत नेपाल र जापानबीचको सम्बन्ध बुझ्न सहज हुने बताए।
‘नवीन अर्यालको पुस्तकको माध्यमबाट नेपाल र जापानबीचको सम्बन्ध बुझ्न सहज हुनेछ। जापानसँग हाम्रो कूटनीतिक सम्बन्ध स्थापना हुनुभन्दा पाँच वर्ष अगाडि नै खेलमार्फत हामी जोडिसकेका थियौँ भन्ने जानकारी यही पुस्तकबाट थाहा पाएँ,’ उनले भने।
उनले पुस्तक नेपाल–जापान सम्बन्धका लागि कोशेढुंगा साबित हुने विश्वास व्यक्त गरे।
कार्यक्रममा एनआरएनएका वरिष्ठ उपाध्यक्ष गौचनले पुस्तकमार्फत नेपाल–जापानको खेल सम्बन्ध बुझ्ने अवसर दिएकोमा लेखक अर्याललाई धन्यवाद दिए। उनले अर्यालको पुस्तक नेपालका लागि मात्र नभई जापान सरकारका लागि समेत उत्कृष्ट दस्तावेज भएको बताए।
‘जापानमा बसिरहेका हामी नेपालीलाई नेपाल–जापानबीचको खेल सम्बन्ध उजागर गरिदिनुभएकोमा लेखक अर्याललाई धन्यवाद भन्न चाहन्छु। पुस्तकमा दुई देशको मित्रतालाई खेलकुदको माध्यमबाट उजागर गर्न खोजिएको छ,’ उनले भने।
नेपाल र जापानबीच ७५ वर्षअघि खेल सम्बन्ध स्थापना भएको थियो। यही तथ्यलाई लेखक अर्यालले आफ्नो पुस्तकमा समेटेका छन्।
जापानी समयअनुसार साँझ ७ बजेदेखि सुरु भएको कार्यक्रममा गलकोट समाज जापानका उपाध्यक्ष भेषनाथ गौतम, व्यवसायी डिलाराम खरेल, बुद्धिजीवी एवं एनआरएनए जापान नागोया क्षेत्रीय समितिका पूर्वउपसंयोजक नवराज चापागाईं, एनआरएनए जापान नागोया क्षेत्रीय समितिका उपसंयोजक यामबहादुर पाइजा मगर, स्थानीय पत्रकार कविकिरण न्यौपाने र निसान राणाको पनि उपस्थिति थियो।
कार्यक्रम पत्रकार कान्ता गिरीले सञ्चालन गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
