प्रतिकात्मक तस्बिर: एआई
काठमाडौं– नेपाल प्रहरीको जवान पदमा कार्यरत रहेका अजयसिंह (नाम परिवर्तन) काठमाडौं उपत्यकाकै एक युनिटमा ट्राफिक प्रहरीका रुपमा कार्यरत थिए। ट्राफिकमा कार्यरत रहे बापत आउने थप अतिरिक्त मासिक भत्ता र तलबले समेत उनको परिवार धान्न धौ–धौ भयो।
त्यसपछि अजयसिंहले सोचे– अब विदेशिन्छु। ट्राफिकमै कार्यरत रहँदा उनको चिनजान थियो तेह्रथुमका शंकर लिम्बूसँग। चिनजानकै क्रममा लिम्बूले सुनाएका थिए–विदेश मान्छे पठाउने काम गर्छु। अजयसिंहले अब शंकरमार्फत् विदेशीने योजना बनाएर उनलाई धुम्बाराहीमा भेटे। त्यसपछि के–के भयो ? उनै ट्राफिक अजयसिंहले ट्राफिकदेखि रसियन आर्मी बनेको र त्यहाँबाट कसरी बेचेर नेपाल फर्किएको भन्नेसम्म कहानी सुनाएका छन्।
अजयसिंहको बयान:
म नेपाल प्रहरीमा नोकरी गरी उपत्यकाकै एक कार्यालयमा ट्राफिक जवानको रुपमा कार्यरत रहेको बेलामा शंकर लिम्बूसँग भेट भयो। उक्त भेटमा शंकरले आफू रसियामा भिजिट भिसामा मान्छे पठाउने, कमाइ र बसाइ समेत सहज हुने र अहिलेसम्म धेरै नेपालीलाई पठाइसकेको बताए।
शंकरले रसियामा प्रतिमहिना ३ लाख जति कमाइ हुन्छ भनी भनेकोमा उक्त कुराबाट म आकर्षित भएँ। मैले के काम हो रसिया भनि सोधेँ। उनले औद्योगिक क्षेत्रमा फ्याक्ट्रीहरूमा काम गर्नुपर्छ भनी आश्वस्त बनाएका थिए। के कति खर्च लाग्छ भन्दा भिसा प्रोसेस समेत गरी नेपाली ३ लाख ५० हजार र रसिया पुगेपछि हाम्रो मान्छे एयरपोर्टमा रिसिभ गर्न आउँछ र उसलाई ४०० अमेरिकन डलर दिनुपर्छ भने। उनको कुरामा म इच्छुक भइ सुरुमा २० हजार शंकर लिम्बूलाई नगद दिएँ।
त्यसपछि टिकटको लागि १ लाख १० हजार नगद दिएँ। अध्यागमन मिलाउन भनेकाले १ लाख ४० हजार र दुबईसम्म जान भिसाको लागि १ लाख समेत गरी ३ लाख ७० हजार नेपालमा नगदै दिँए। तीजको दिन मलाई सबै प्रक्रिया मिल्यो। अब रसिया उड्नुपर्छ भनेकाले म परिवारसँग बिदाई गरी २०८० साल असोज १ गते म रसिया उडेँ।
त्यसरी रसिया पुगेपछि शंकरले भनेका व्यक्ति मलाई लिन रसियाको मस्को एयरपोर्ट आउनुभयो। रसियामा काम लगाइदिने भन्दै ४०० अमेरिकन डलर लिइ काम लगाईदिन्छु भनी मस्कोमा आर्मीको अफिसमा लानुभयो। मलाई झुक्याइ रसियन आर्मीको क्याम्पमा छिराइ उहाँ फर्किनुभयो। त्यसपछि सम्पर्कविहीन हुनुभयो। त्यसपछि बल्ल थाहा पाए म रसियन आर्मीमा भर्ती भएको रहेछु।
त्यहाँ अन्य नेपालीहरुलाई सोध्दा तिमीलाई कसले फसायो? अब बाहिर जान पाइँदैन, तलब पनि पाइँदैन र युक्रेनसँग लड्न जानु पर्छ भनेपछि म आचार्य चकित भएँ। भाग्ने प्रयास गर्दा रसियन सेनाले कम्पाउण्ड घेरेको र बाहिर निस्कन समेत नदिइ मलाई बन्धक बनाइयो। १५ दिन तालिम गर्न लगाइ दिइ सिधै युक्रेनको बखमत भन्ने ठाउँमा लगी मेरो इच्छा विपरीत युद्ध लड्न लगायो।
युद्ध लड्ने क्रममा युक्रेनतर्फ अगाडि नबढ्दा रसियन आर्मी कमाण्डरले गोली हान्छु भनि धम्की दिने गरेकाले बाध्यात्मक परिस्थित सिर्जना गरी युक्रेनका विरुद्ध युद्ध लड्न बाध्य पारियो। युद्धस्थलको अवस्था हेर्दा महिनौदेखि मारिएका व्यक्तिहरूका लासहरू यत्रतत्र छरिएको अवस्थामा थियो। मारिएका, मरेका व्यक्तिहरूको अभिलेख समेत नरहेको, चिसो ठाउँ, खाना तथा पानी समेतको कुनै व्यवस्था नभएको, खाली पेट युद्ध लड्नुपर्ने, रसियामा रहँदा कुनै पारिश्रमिक तलब समेत नदिएको अवस्थाले म मानसिक रूपले विक्षिप्त भएको थिएँ।
युद्धकै क्रममा युक्रेनी सेनाले ड्रोनबाट हानेको बम लागि म लगायत अन्य ८ जना साथीहरू घाइते भयौँ। तत्पश्चात मलाई उपचारको लागि भनि रसियाले यूक्रेनको अतिक्रमण गरेको क्षेत्र लोहान्स अस्पतालमा भर्ना गरायो। उपचार पश्चात पुनः युद्ध लड्न लैजाने रसियनहरूको योजना थियो। तर म रसियन आर्मीको पञ्जाबाट भाग्ने योजनाअनुसार रसियनहरूको आँखा छली सादा पोसाक लगाइ उक्त अस्पतालबाट भागेँ।
त्यसको ४ दिनपछि मस्को पुगी नेपाली दूतावासको सम्पर्कमा पुगेँ। सन् २०२३ नोभेम्बर ३० तोरेख (२०८० मंसिर १४ गते) दूतावासको पत्रअनुसार मैले नेपाल फर्की आउन अनुमति पाएँ। त्यसपछि नेपालबाट ९० हजार थप रकम मगाई म नेपाल फर्किन सफल भइ मंसिर १५ गते काठमडौं आइपुगेँ।
यसरी भिजिट भिसामा राम्रो काममा लगाउने भन्दै शंकर लिम्बू, अध्यागमनका शाखा अधिकृत नरवीर खड्का, अन्य व्यक्तिहरु रबीन घिमिरे, गोविन्द रिमालले मलाई ललाइ–फकाइ झुक्काई मानव बेचबिखन गर्ने उद्देश्यका साथ नेपालबाट रसिया पुर्याए।
रसियामा लगि बन्धक बनाइ युद्ध लड्न बाध्य पारी म बाट ४ लाख ९० हजार रकम समेत लिए। यसका ग्राण्ड डिजाइनर शंकर लिम्बू समेतको पूर्ण संलग्नतामा मानव तस्करहरुले मलाई झुक्याएर रसिया पुर्याइ रसियन आर्मीमा भर्ना गराए।
हाल रसिया र युक्रेनबीचको युद्ध भइरहेको युद्धग्रस्त क्षेत्रमा पठाइ दिइ रसियन आर्मीले हामीजस्ता नेपाली युवाहरुलाई बन्धक बनाइ राख्ने युद्ध लड्नु पर्दा रसियन आर्मीभन्दा अगाडि फ्रन्टलाइनमा बसी युद्ध लड्नुपर्ने, फर्कि क्याम आइसकेपछि पुरै रसियन आर्मीले घेरा हाली बन्धक बनाइ दिनमा एक पटक मात्र खाना दिने गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791090469.jpeg)
-1786602170.png)
