काठमाडौं– नक्कली भुटानी शरणार्थी प्रकरणको मुद्दाका अभियुक्त, भुटानी शरणार्थी नेता टेकनाथ रिजाल थुनामुक्त भएका छन्। उच्च अदालत पाटनको आदेशानुसार काठमाडौं जिल्ला अदालतमा धरौटी बुझाएका रिजाल बुधबार थुनामुक्त भएका हुन्।
उच्च अदालतको आदेशानुसार रिजालको परिवारले आइतबार नै काठमाडौं जिल्ला अदालतमा १५ लाख रुपैयाँ धरौटी बुझाएको थियो। नक्कली भुटानी शरणार्थी प्रकरणमा अनुसन्धान गरिरहेको अख्तियार दुरुपयोग अनुसन्धान आयोग र सम्पत्ती शुद्धीकरण विभागमा पनि बयान दिएपछि रिजाल बुधबार रिहा भएका हुन्।
सोमबार र मंगलबार सार्वजनिक बिदा भएका कारण अख्तियार र सम्पत्ती शुद्धीकरण विभागले बुधबार मात्रै रिजालको बयान लिएका थिए। रिजालसँग सम्पत्ती शुद्धीकरण विभागले पनि धरौटी माग गरेको थियो। अख्तियारले भने बयान लिएर तारेखमा रिहा गरेको हो। सम्पत्ति शुद्धीकरण विभागले रिजाललाई माघ १५ गते उपस्थित हुन भनेको छ।
नक्कली भुटानी शरणार्थी बनाएर अमेरिका लगायतका देशमा पठाइदिने भन्दै नेपाली नागरिकबाट रकम उठाएर ठगी गरेको प्रकरण सार्वजनिक भएपछि अनुसन्धानका लागि प्रहरीले रिजाललाई पक्राउ गरेको थियो। काठमाडौं जिल्ला अदालतले थुनछेक आदेशमा रिजाललाई पनि पुर्पक्षका लागि थुनामा पठाएको थियो।
जिल्ला अदालतको आदेशपछि मुद्दाको पुर्पक्षका लागि र त्यसअगाडि प्रहरी अनुसन्धानका क्रममा समेत गरी रिजाल करिब ७ महिना थुनामा रहे। प्रहरीले उनलाई गत जेठ ४ गते पक्राउ गरेको थियो।
नक्कली भुटानी शरणार्थी प्रकरणमा प्रहरी अनुसन्धानबाट ३० जना प्रतिवादी कायम भएका थिए। जसमध्ये १८ जना पक्राउ परेर अभियोगपत्रसँगै अदालतमा पेस भएका थिए। गत असार १ गते थुनछेक आदेश सुनाउँदै काठमाडौं जिल्ला अदालतले १८ जनामध्ये १६ जनालाई पुर्पक्षका लागि थुनामा पठाएको थियो।
थुनामा पठाइएकाहरुले जिल्ला अदालतको आदेशविरुद्ध उच्च अदालत पाटनमा पुनरावलोकन निवेदन दिएका थिए। पुनरावलोकन निवेदनमा फैसला सुनाउँदै उच्च अदालतका न्यायाधीशद्वय जनक पाण्डे र प्रकाश खरेलको इजलासले केही प्रतिवादीसँग धरौटी मागेको थियो भने अन्य ९ जनालाई थुनामै पठाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778588614.png)
-1764146706.png)
