धनगढी- धनगढी उपमहानगरपालिकाले निर्माणाधीन मुख्य सडक ट्राफिक चौराहदेखि कैलाली पुलसम्मको चौडाइ फेरि घटाएको छ। एसियाली विकास बैंक (एडीबी) को ऋण सहयोगमा निर्माण भइरहेको मुख्य सडकको चौडाइ घटाएर २१ मिटर बनाइएको हो।
प्रदेश सरकार, केही व्यवसायीहरुले सडक क्षेत्राधिकार भित्र रहेका संरचना भत्काउन आनाकानी गरेपछि सडकको चौडाइ घटाइएको हो।
ठेक्का सम्झौताका क्रममा मुख्य सडकको क्षेत्राधिकार ३० मिटर कायम गरिएको थियो। यद्यपि, निर्माणका क्रममा सो सडकको कालोपत्रे २४ मिटर भित्र गर्ने सम्झौता कम्पनीसँग भएको जनाइएको छ।
कालिका कन्स्ट्रक्सनले निर्माण गर्न लागेको सो सडकको विस्तृत परियोजना प्रतिवेदनमा सडकको क्षेत्राधिकार ३० मिटर उल्लेख छ। एडीबीको ऋण सहयोगमा धनगढीमा पहिलो चरणमा सात वटा सडकको निर्माणका लागि टेण्डर आह्वान गरिएको थियो।
धनगढीका स्थानीयहरुले सडक चौडा गरिनुपर्ने माग राख्दै आएकोमा मुख्य सडकको चौडाइ घटाउने कार्य भइरहेको हो।
धनगढी उपमहानगरपालिकाका इन्जिनियर द्धिजराज भट्टले भने, ‘सडकको क्षेत्राधिकार ३० मिटर हो। अहिले कालोपत्रे भइरहेको क्षेत्र २४ मिटर हो।’ तर उनले भनेको विपरीत सडकको कार्य २१ मिटर भित्र भइरहेको छ। कालोपत्रे, नाली तथा पैदलमार्ग २१ मिटर भित्र निर्माण भइरहेको जनाइएको छ।
नगर प्रमुख गोपाल हमालको जग्गा पनि सडक भित्र परेपछि चौडाइ घटाइएको स्थानीयहरुको आरोप रहेको छ।
प्रदेशको मुख्यमन्त्री तथा मन्त्रिपरिषद् कार्यालयले सडकको मापदण्डअनुसार २१ मिटर (१५ मिटर र ६ मिटर सेटव्याग सहित) २१ मिटर सडकको क्षेत्राधिकार खाली गराउन तत्परता देखाएको नगर प्रमुख गोपाल हमालले बताए।
‘मुख्यमन्त्री कमलबहादुर शाह, प्रमुख सचिव हरिप्रसाद लम्साललगायत मन्त्रीपरिषद् कार्यालयले धनगढी चौराह-कैलाली पुल २१ मिटर सडक क्षेत्र खाली गराउने कामलाई अगाडि बढाइएको छ,’ उनले भने, ‘शुक्रबारदेखि धनगढी उपमहानगरपालिकाको प्राविधिक टोलीले मुख्यमन्त्री एवं मन्त्रिपरिषद्को कार्यालयसँग आवश्यक समन्वय गरेर पुनः २१ मिटर सडक क्षेत्र खाली गराउन सडकमा चिह्न लगाउन सुरु गरेको थियो।’
उपमहानगरपालिकाले एडीबीसँग सम्झौता भएको ४२.९६२ किलोमिटर सडकमध्ये १० दशमलब दुई सय ५० किलोमिटर सडक पहिलो चरणमा निर्माणाधीन रहेको छन्।
धनगढी नगरको आफ्नै संरचना भत्केन
धनगढी नगर विकासका अध्यक्ष हुन् नगर प्रमुख गोपाल हमाल। तर, मुख्य सडकमा रहेको नगर विकासको कार्यालयको भवन अहिलेसम्म भत्काउन सकेका छैनन्।
नगर प्रमुख हमालले मुख्य सडकमा रहेका प्रदेश सरकारका संरचना नहट्दा सडक निर्माणमा समस्या भइरहेको आरोप लगाइरहे पनि आफ्नै संरचना भत्काउन कुनै सुरसार गरेका छैनन्।
बढ्दो सवारी चाप र जनसंख्यालाई मध्यनजर गरी धनगढी चौराहादेखि कैलाली पुलसम्म सडक चौडा बनाउने काममा सम्बन्धित निकायसँग आवश्यक समन्वय गरेर काममा तीव्रता दिने प्रयास भइरहेको उपमहानगरपालिकाले जनाएको छ।
एकै सडकमा फरक-फरक चौडाइ
धनगढीको मुख्य सडकसँगै जोडिएको कैलालीपुलदेखि क्याम्पस रोडसम्मको सडक ३० मिटर बनाइने भएको छ। तर सोही सडकसँग जोडिएको चौराहदेखि कैलालीपुलसम्मको सडक २१ मिटरमा निर्माणाधीन छ।
गत वर्ष उपमहानगरपालिकाले कैलालीपुलदेखि क्याम्पस रोडसम्मको सडक ३० मिटर चौडाइ बनाउने भन्दै सरकारी संरचनामा डोजर चलाएको थियो भने स्थानीयहरुले स्वयं भत्काएका थिए। अहिले सो सडकमा प्रदेश सरकारको लगानीमा नाला निर्माण कार्य भइरहेको छ।
पूर्वाधार विकास कार्यालय कैलालीका अनुसार केएस कन्स्ट्रक्सनसँग ५१ करोड ६८ लाख ७८ हजार ६ सय ४१ रुपैयाँमा ठेक्का सम्झौता भएको थियो। अहिलेसम्म सो सडकमा पाँच करोड ४५ लाख ६२ हजार आठ सय ६८ रुपैयाँ खर्च भएको पूर्वाधार कार्यालयका लेखा अधिकृत नरबहादुर भाटले बताए।
उनले भने, ‘सो सडकमा चालु आर्थिक वर्षका लागि १२ करोड रकम विनियोजन भएको छ। आवश्यक परेको खण्डमा रकम थप्न सकिने छ।’
कैलाली पुलदेखि क्याम्पस चोकसम्मको २ किलोमिटर तीन सय मिटर सडक निर्माण गर्न प्रदेशको भौतिक पूर्वाधार मन्त्रालयले बजेट विनियोजन गरेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786602170.png)
-1786513116.png)
