काठमाडौं– काठमाडौंको गैह्रीगाउँ सामूहिक हत्या प्रकरणको मुद्दा जिल्ला अदालत काठमाडौंमा दर्ता भएको छ। २५ दिन लामो अनुसन्धान सकेर जिल्ला प्रहरी परिसर काठमाडौंले पठाएको अनुसन्धान प्रतिवेदनअनुसार जिल्ला सरकारी वकिल कार्यालयले अदालतमा मुद्दा दर्ता गरेको छ।
२५ दिन लामो अनुसन्धानका क्रममा विभिन्न प्रमाणहरु जुटाएर फाइल पठाएको छ। हत्या गरेर भाग्दै गरेको सीसीटीभी फुटेजदेखि संकलित अन्य अन्य प्रमाणहरु पेस गर्दै जन्म कैदको सजाय मागदाबी गर्दै मुद्दा दर्ता गरिएको छ। जसअनुसार प्रहरीले डीएनए (परीक्षण) समेत गराएर यो घटनामा थप प्रमाण जुटाएको छ।
‘सीसीटीभी फुटेज मात्रै होइन हामीले यो घटनामा डीएनए समेत गराएर पुष्टि गरेका छौं,’ जिल्ला प्रहरी परिसर काठमाडौंका एसपी तथा प्रवक्ता कुमोध ढुंगेलले भने।
प्रहरीले हत्या अभियोगमा सञ्जय भण्डारीलाई पक्राउ गर्दा उनको साथबाट हत्यामा संलग्न भनिएको खुकुरी समेत बरामद गरेको थियो। उक्त खुकुरीको बिडमा रतको टाटा बाँकी नै थियो। उक्त रगतको डीएनए हत्या गरिएकामध्ये १ जना नवीन राईको डीएनएसँग मेल खाएको प्रहरी स्रोतले जानकारी दियो।
त्यसैगरी अभियुक्तको टिसर्ट र पाइन्टमा पनि रगतको टाटा भेटिएको थियो। उक्त रगतको डीएनए पूर्णबहादुरको डीएनएसँग मेल खाएको प्रवक्ता ढुंगेलले जानकारी दिए। वैज्ञानिक प्रमाणबाट समेत यो घटनालाई पुष्टि गरिएको प्रहरीले जनाएको छ।
त्यसैगरी यो घटनामा प्रहरीले पहिलोपटक ब्रेन म्यापिङ टेस्ट समेत गरेको थियो। बयानका क्रममा अभियुक्त भण्डारीले अन्य हत्याका घटनाहरु समेत आफूले गराएको दाबी गरेका थिए। त्यसपछि अनुसन्धन अधिकारी नै रनभुल्लमा परेका थिए। अनेक बयान दिएपछि उनको मानसिक अवस्था ठिक भए/नभएको भन्ने प्रश्न उठेको थियो।
त्यसपछि प्रहरीले भण्डारीको ब्रेन म्यापिङ गराएको थियो। भण्डारीलाई केन्द्रीय कारागार सुन्धारा लगेर ब्रेन म्यापिङ गराइएको थियो। स्वास्थ्य तथा जनसंख्या मन्त्रालयले केन्द्रीय कारागारमा मनोचिकित्सकको टिमसहित ब्रेन म्यापिङ केन्द्र स्थापना गरेको छ। सोही ठाउँमा लगेर भण्डारीको ब्रेन म्यापिङ गराइएको थियो।
अपराध अनुसन्धानका लागि नेपालमा ब्रेन म्यापिङको पहिलोपटक प्रयोग गरिएको प्रहरीले जनाएको छ। ब्रेन म्यापिङमार्फत् मानसिक अवस्था ठिक भए/नभएको पत्ता लगाउने गरिन्छ। जसअनुसार भण्डारीको मानसिक अवस्था ठिक रहेको पुष्टि भएको थियो।
अनुसन्धानका क्रममा भण्डारीले आफूले नक्साल, रोतोपुल, सिन्धुपाल्चोकमा अझै केही व्यक्तिको हत्या गरेको बताएका थिए। थप व्यक्तिको समेत हत्या गरेको बताएपछि प्रहरीले भण्डारीलाई लिएर घटनास्थल देखाउन समेत लगाएको थियो। उनले रातोपुल क्षेत्रमा आफूले हत्या गरेर फालेको भनिएको ठाउँमा केही समय पहिला १ महिलाको शव भेटिएको थियो। भण्डारीले कतिपय घटनासँग मिल्दोजुल्दो बयान दिएपछि प्रहरी अधिकारी चकित परेका थिए।
अन्य ठाउँमा पनि हत्या गरेको बयान दिएपछि प्रहरीको अन्तर्राष्ट्रिय संगठन इन्टरपोलसँग समेत सहयोग माग गरिएको छ। त्यसपछि नेपाल प्रहरीको इन्टरपोल शाखाका प्रमुख एसपी अनुपम शमशेर राणा, घटनाका अनुसन्धान गरेका काठमाडौं परिसरका डीएसपी अंगुर जिसी, इन्सपेक्टर कृष्ण गरीले जुममार्फत् इन्टरपोलको हेडक्वार्टरका अधिकारीसँग जुम मिटिङ समेत गरेका थिए।
उक्त मिटिङका क्रममा अनुसन्धान अधिकारीले भण्डारीले दिएको बयानबारे ब्रिफिङ गरेका थिए। उनी बोल्न नसक्ने समेत रहेको, उनले दिएको बयान सत्य हो/होइन कसरी पुष्टि गर्न सकिन्छ भन्दै अपराध अनुसन्धानको अभ्यास र अनुभवबारे सहयोग माग गरिएको थियो।
इन्टरपोल सचिवालयले पनि सक्दो सहयोग गर्ने र आफूलाई पनि यस प्रकारण घटना नौलो भएकाले थप अनुसन्धान गर्नुपर्ने भएको बताएको प्रहरी स्रोतले जानकारी दियो।
गत भदौ २९ गते काठमाडौं महानगरपालिका–३२ गैह्रीगाउँस्थित दिव्य सःमिल एण्ड काष्ठ उद्योगमा ४ जनाको सामूहिक हत्या भएको थियो।
सिन्धुपाल्चोकको बाह्रबिसे नगरपालिका–९ घर भइ काठमाडौं काँडाघारीको वीरेन्द्र चोक बस्ने भण्डारीले गत भदौ २८ गते राति पौने ९ बजेदेखि सवा १० बजेसम्म आधा घण्टाको बीचमा ४ जनाको सामूहिक हत्या गरेर फरार भएका खुलेको थियो। परिसर काठमाडौंको टोलीले भण्डारीलाई प्रहरीले भदौ ३१ गते पक्राउ गरेर सार्वजनिक गरेको थियो।
भण्डारीले उक्त फर्निचरमा बसेर काम गर्दै आएका दोलखाको कालिञ्चोक गाउँपालिका–८ घर भएका ५६ वर्षीय कुमार भुजेल भनिने पूर्णबहादुर भुजेल, उनकी श्रमती ५० वर्षीया अम्बिका भुजेल, आमा ७६ वर्षीया सुभद्रा भुजेल र धनकुटाको भिरगाउँ गाउँपालिका–२ घर भएका १९ वर्षीय नवीन भनिने विशाल राईको हत्या गरेको प्रहरीको अनुसन्धानबाट खुलेको थियो।
सीसीटीभी फुटेजको आधारमा जिल्ला प्रहरी परिसर काठमाडौं र काठमाडौं उपत्यका अपराध अनुसन्धान कार्यालयको टोलीले पक्राउ गरी भण्डारीलाई सार्वजनिक गरेको थियो। जन्मजात बोल्न नसक्ने भण्डारीले नक्सालस्थित बाल मन्दिरबाट सांकेतिक भाषामा कक्षा १२ सम्म अध्ययन समेत गरेका छन्।
हत्या गरेपछि झोलामा खुकुरी बोकेर सिन्धुपाल्चोक जाने तयारीमा रहेका बेला उनी पक्राउ परेका थिए। पक्राउ परेपछि भण्डारीले कपीमा ‘आइ किल्ड फोर पिपुल’ लेखेर हत्या समेत स्वीकार गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763721444.png)
-1763559424.jpg)
-1763559424.jpg)
