अनुसन्धान

मणिपाल घटना१५ पटकसम्म प्रहरी हिरासत पुगेका व्यक्ति नै डाक्टर आक्रमणमा, भाडामा प्रयोग भएको आशंका!

नारायण अधिकारी मंगलबार, असोज २३, २०८० १३:५९

काठमाडौं– पोखराको मणिपाल शिक्षण अस्पतालमा डाक्टरमाथि भएको आक्रमण र तोडफोडमा संलग्नको आरोपमा पक्राउ परेकाहरु यसअघि नै विभिन्न आपराधिक घटनामा जोडिएर १५ पटकसम्म प्रहरी हिरासतमा पुगेका व्यक्ति रहेको खुलेको छ।

डाक्टरमाथि आक्रमण र अस्पताल तोडफोडमा उत्रिएका ९ जनालाई जिल्ला प्रहरी कार्यालय कास्कीले पक्राउ गरेर अनुसन्धान गरिरहेको छ। सो क्रममा पक्राउ परेका अधिकांश व्यक्तिहरु पटक–पटक विभिन्न कसुरमा पक्राउ परेर मुद्दा चलेकाहरु रहेको खुलेको हो। कतिसम्म भने १ जना व्यक्तिविरुद्ध १५ पटकसम्म मुद्दा चलेको खुलेको छ।

असोज ८ गते उपचारको क्रममा लमजुङको सुन्दरबजार नगरपालिका–६ घर भएकी ५७ वर्षीया सुकमाया दुराको मृत्यु भएको थियो। दुराको मृत्यु भएपछि डाक्टरमाथि आक्रमण र अस्पताल तोडफोड भएको थियो।

आक्रमण र तोडफोडमा उत्रिएकाहरुमध्ये विभिन्न मितिमा जिल्ला प्रहरी कार्यालय कास्कीको टोलीले ९ जनालाई पक्राउ गरेर अहिले अनुसन्धान गरिरहेको छ।

पक्राउ पर्नेमा पोखरा महानगरपालिका–४ का सञ्जय पीडित भनिने सुजित मुल्मी, पोखरा महानगरपालिका–५ मालेपाटनका अभिनाश गुरुङ, पोखरा महानगरपालिका–५ प्रस्याङका अरुण गुरुङ, पोखरा–९ नयाँबजारका नितेश गुरुङ, पोखरा–११ फूलबारीका प्रदीप गुरुङ, पोखरा–१७ हुनमान टोलका छावा भनिने सुशील कार्की, पोखरा–५ मालेपाटनका विनय गुरुङ, मनिष थापा र विजय गुरुङ छन्।

उनीहरुमध्ये मनिष र विजयबाहेक सबैको आपराधिक पृष्ठभूमि देखिएको छ। प्रहरीको सीआरएस (क्रिमिनल रेकर्ड सिस्टम) मा नाम उल्लेख गरिएका ७ जनाको आपराधिक पृष्ठभूमि देखिएको हो। सुजित मुल्मी यसअघि १५ पटकसम्म पक्राउ परेर मुद्दा चलेका व्यक्ति भएका खुलेको छ।

मुल्मी पछिल्लोपटक गत वर्षको असारमा लागु औषधसहित पक्राउ परेका थिए। मुल्मीसहित त्यतिबेला ३ जनालाई कास्की प्रहरीले डाइजापाम ६५ एम्पुल, फेनेरागन ६५ एम्पुल, नुर्फिन ६५ एम्पुल गरी १९५ एम्पुल र कालो छालाको दापभित्र राखिएको धारिलो हतियारसहित पक्राउ गरेको थियो।

यसअघि उनी सार्वजनिक अपराधको केशमा १० पटक, ज्यान मार्ने उद्योगको कसुरमा १ पटक, बैंकिङ कसुर (कर्जाको दुरुपयोग) मा १ पटक र लागु औषधमा ३ पटक गरी १५ पटक पक्राउ परेर मुद्दा समेत चलेका व्यक्ति रहेको खुलेको छ।

विभिन्न केसमा १५ पटकसम्म पक्राउ परेका व्यक्ति नै पुनः डाक्टरमाथि आक्रमण र तोडफोडमा उत्रिनुले उनीहरुलाई कसैले भाडामा प्रयोग गरेको हुनसक्ने आशंका गरिएको छ। त्यसमाथि उनीहरु मृतक दुराको कुनै आफन्त समेत नरहेका प्रहरी अनुसन्धानबाट खुलेको छ। आपराधिक पृष्ठभूमि र दुराको परिवारसँग कुनै सम्बन्ध नभएका व्यक्ति आक्रमणमा उत्रिनुले शंका गर्ने ठाउँ रहेको भन्दै कास्की प्रहरीले यसतर्फ पनि अनुसन्धान अघि बढाएको छ।

पक्राउ परेका अर्का आरोपी अभिनाश गुरुङ पनि यसअघि ८ पटकसम्म पक्राउ परेर मुद्दा चलेका व्यक्ति रहेको खुलेको छ। उनी विभिन्न मितिमा सार्वजनिक अपराधमा ५ पटक, अपहरण तथा शरीर बन्धकमा १ पटक, ज्यान मार्ने उद्योगमा १ पटक र लागु औषधमा १ पटक गरी ८ पटक पक्राउ परेर मुद्दा चलेको व्यक्ति रहेको पाइएको कास्कीका प्रहरी प्रमुख, प्रहरी उपरीक्षक (एसपी) मोहन थापाले जानकारी दिए।

अभिनाश गुरुङ पनि सार्वजनिक अपराधको कसुरमा ४ पटक पक्राउ परेर मुद्दा चलेको सीआरएस सिस्टमले देखाएको छ। नितेश गुरुङ भने यसअघि १ पटक अभद्र व्यवहारको कसुरमा पक्राउ परेर मुद्दा चलेका व्यक्ति हुन्।
अर्का प्रतिवादी प्रदीप गुरुङ भने सार्वजनिक अपराधको कसुरमा ४ पटक र अपहरण तथा शरीर बन्धकको कसुरमा १ पटक गरी ५ पटक पक्राउ परेर मुद्दा चलेका व्यक्ति रहेको खुलेको छ।

छावा भनिने सुशील कार्की ज्यान मार्ने उद्योगमा ३ पटक पक्राउ परेर मुद्दा चलेका व्यक्ति रहेका खुलेको छ। पछिल्लोपटक २०७८ कात्तिक २९ गते छावालाई कास्की प्रहरीले बुटवलबाट पक्राउ गरेको थियो। ज्यान मार्ने उद्योगको कसुरमा फरार रहेका छावालाई पक्राउ गरेर प्रहरीले मुद्दा चलाएको थियो।

मृतक दुराको ज्वाइँ नाता पर्ने विनय गुरुङ भने योभन्दा अघि सार्वजनिक अपराधको कसुरमा २ पटक पक्राउ परेर मुद्दा चलेका व्यक्ति रहेको पाइएको प्रहरीले जनाएको छ।

२५ जनाविरुद्ध पक्राउ पूर्जी, १६ अझै फरार
मणिपाल प्रकरणमा २५ जनाविरुद्ध पक्राउ पूर्जी जारी भएको छ। अहिलेसम्म यो प्रकरणमा ९ जना पक्राउ परेका छन्। ९ जना पक्राउ परे पनि १६ जना भने फरार भएका छन्। उनीहरुको खोजी कार्य भइरहेको प्रहरीले जनाएको छ।

फरार रहेका १६ जनामध्ये १० जनाको पनि आपराधिक पृष्ठभूमि देखिएको छ। उनीहरु विभिन्न अपराधको कसुरमा यसअघि पनि पक्राउ परेर मुद्दा चलेका व्यक्ति रहेको खुलेको छ। पक्राउ पर्न बाँकी रहेका (फरार) व्यक्तिको विवरण भने प्रहरीले गोप्य राखेको छ।

डाक्टरमाथि आक्रमण र अस्पताल तोडफोडमा उत्रिएपछि सीसीटीभी फुटेजमार्फत् प्रहरीले आक्रमण गर्नेको पहिचान गरेको थियो। सोही आधारमा उनीहरुविरुद्ध पक्राउ पूर्जी लिएर प्रहरीले अनुसन्धान अघि बढाएको छ।
उनीहरुविरुद्ध स्वास्थ्यकर्मी तथा स्वास्थ्य संस्था सुरक्षासम्बन्धी ऐनअनुसार कारबाही अघि बढाइने प्रहरीले जनाएको छ। उक्त ऐनविरुद्धको कसुर गर्नेलाई २ वर्षदेखि ५ वर्षसम्म कैद र २ लाख देखि ५ लाखसम्म जरिवाना हुनसक्ने व्यवस्था छ।

यस्तो थियो दुरा मृत्युको घटना
दुराको ढाड दुख्ने र स्वासप्रस्वाससम्बन्धी समस्या देखिएपछि उपचारको लागि उनका आफन्तले पोखरा ल्याएका थिए।

पोखरा महानगरपालिका–११ फूलबारीस्थित मणिपाल शिक्षण अस्पतालमा उनको उपचार सुरु भयो। उपचारको क्रममा दुराको असोज ८ गते दिउँसो करिब १ बजेतिर मृत्यु भएको भन्दै डाक्टरले मृत घोषित गरे। सामान्य बिरामी दुराको उपचारको क्रममा डाक्टरको लापरबाही भएकै कारण मृत्यु भएको आरोप दुराका आफन्तले लगाए।

मृत्युको कारण खुलाउनुपर्ने माग राख्दै आफन्तहरु आन्दोनमा उत्रिए। सो क्रममा चिकित्सक र मृतकका आफन्त पक्षबीच विवाद भयो। त्यसपछि अस्पतालमा तोडफोडदेखि डाक्टर अनिल शाहमाथि कुटपिटसम्मका घटना भए।

कुटपिटको आरोपमा जिल्ला प्रहरी कार्यालय कास्कीको टोलीले तत्कालै पोखरा महानगरपालिका–५ घर भएका ३४ वर्षीय विनय गुरुङलाई पक्राउ गर्‍यो। विनय मृतक दुराको ज्वाइँ पर्छन्। पोखराका स्थानीय गुरुङ नेपाली कांग्रेसको भातृ संगठन तरुण दलमा समेत आबद्ध छन्।

आन्दोलन नियन्त्रणमा लिन फिल्डमा खटिएका इन्टसपेक्टर मदन श्रेष्ठले भीडको अगाडि उभिएर उत्तेजित अभिव्यक्ति दिएपछि उनी अहिले निलम्बनमा छन्। उनले डाक्टरलाई साफ कुटरे आएँ भन्दै भीडको अगाडि अभिव्यक्ति दिएपछि भीडले ताली बजाएको थियो।

त्यसैगरी वडा प्रहरी कार्यालय बगरका डीएसपी वेदप्रकाश जोशीको जिम्मेवारी खोसेर प्रहरी प्रधान कार्यालयमा राख्दै उनको ठाउँमा अर्का डीएसपी राजेन्द्र श्रेष्ठलाई पठाइएको छ। यो घटनाको छानबिन गर्न भन्दै गण्डकी प्रदेश प्रहरी कार्यालयले प्रहरी वरिष्ठ उपरीक्षक (एसएसपी)को नेतृत्वमा छानबिन समिति समेत बनाएर छानबिन सुरु गरेको छ।

यता आन्दोलनरत चिकिस्तक र सरकारबीच ६ बुँदै सहमति भएको छ। सरकारको तर्फबाट उपप्रधान तथा गृहमन्त्री नारायणकाजी श्रेष्ठको रोहबरमा भएको छलफलमा ६ बुँदे सहमति भएपछि आन्दोलित चिकित्सकले गत आइतबारदेखि आन्दोलनका कार्यक्रमहरु फिर्ता लिएका थिए।