काठमाडौं- नेपाली नागरिकलाई भुटानी शरणार्थी बनाएर अमेरिका पठाउने भन्दै १ अर्ब बराबरको रकम ठगी गरेको प्रकरणमा संलग्न भएको आरोपमा पक्राउ पूर्जी जारी भएका नेकपा एमालेका सचिव तथा पूर्वउपप्रधानमन्त्री समेत रहेका सांसद टोपबहादुर रायमाझी अहिलेसम्म फरार छन्।
बुधबार पक्राउ पूर्जी जारी भए पनि आइतबार बितिसक्दा समेत प्रहरीले रायमाझीको भेउ पाउन सकेको छैन। बुधबार अर्घाखाँखाँचीको एक कार्यक्रममा विशेष अतिथि बनेर पुगेकाले पक्राउ पूर्जीबारे जानकारी पाएपछि कानुनलाई सहयोग गर्ने बताएका थिए। तर अहिलेसम्म प्रहरीको सम्पर्कमा आउनुको साटो उनी फरार छन्।
अर्घाखाँचीको कार्यक्रम सकेर उनी त्यसै दिन राति काठमाडौं आउने तयारीमा थिए। सोही अनुसार उनले भैरहवाबाट काठमाडौं आउनका लागि प्लेनको टिकटसमेत काटेका थिए।
तर, उनी एकाएक सम्पर्कविहीन भए। राति ९ बजेको फ्लाइटमा काठमाडौं आउने टिकट भएपछि जिल्ला प्रहरी परिसर काठमाडौंको टोली रायमाझीलाई पक्राउ गर्न भन्दै त्रिभुवन अन्तर्राष्ट्रिय विमानस्थलको आन्तरिक उडानतर्फको कक्षमा गएर बसेको थियो।
‘हामीले उहाँलाई लोकेट गरिरहेका थियौं। उहाँका गाडी पनि हाम्रै निगरानीमा थियो। प्लेन चढ्न भनेर उहाँ विमानस्थलतर्फ अघि बढेको पनि देखिएको थियो। त्यति नै बेला छोरा पक्राउको विषय सार्वजनिक भएपछि उहाँ वेपत्ता हुनुभयो,’ स्रोतले भन्यो।
मोबाइल लोकेसनअनुसार रायमाझी र उनका छोरा सन्दीप भैरहवामा नजिकै थिए। तर जब छोरालाई प्रहरीले पक्राउ गर्यो त्यसपछि उनी फरार भए। ‘रायमाझीलाई भैरहवामै पक्राउ गर्न सकिन्थ्यो। तर हामीले मन्त्रीसमेत भइसकेका उच्च तहका नेता, त्यहाँमाथि आफैंले कानुनलाई सघाउने बताएपछि भैरहवामा पक्राउ नगरी काठमाडौं आएपछि नियन्त्रणमा लिने तयारी गर्यौं। तर छोरो पक्राउको सूचना पाएपछि उहाँ फरार हुनुभयो।’
त्यसयता रायमाझी फरार छन्। उनको मोबाइलसमेत अफ छ। प्रहरी स्रोतका अनुसार रायमाझी काठमाडौं नै प्रवेश गरेका छैनन्। बिहीबार आफैं प्रहरी कार्यालयमा उपस्थित हुने बताए पनि उनी फरार नै भए। यता प्रहरीलाई आफैं उपस्थित हुन्छु भनेर विश्वास दिलाउने र फरार हुनेतिर रायमाझी लागेको प्रहरीको बुझाइ छ।
अर्घाखाँचीको कार्यक्रममा जाँदा रायमाझीले पर्सनल सेक्युरेटी अफिसर (पीएसओ) काठमाडौं छाडेर गएका थिए। बिहीबार साँझ रायमाझीको गाडी र चालक भैरहवाबाट काठमाडौं आइपुगे पुगेका थिए। तर उनी भने आएनन्।
रायमाझी अहिलेसम्म पक्राउ नपर्नुमा एमाले अध्यक्ष केपी शर्मा ओली र प्रधानमन्त्री पुष्पकमल दाहाल प्रचण्डबीच बिहीबार भएको भेटपछिको विकसित घटना हुनसक्ने पनि विश्लेषण गरिएको छ।
एमाले अध्यक्ष ओलीले सांसद रायमाझीलाई बाटोबाटै पक्राउ गर्न खोज्नु रहस्यमय भन्दै सार्वजनिक रुपमा आपत्ति जनाएका थिए। त्यसपछि पनि प्रधानमन्त्री प्रचण्डसँग भेट गर्दै ओलीले निरन्तर दबाब दिँदै आएका छन्।
यो प्रकरणमा अहिलेसम्म ८ जना पक्राउ परेका छन्। एमाले नेता रायमाझीका छोरा सन्दीप, सचिव टेकनारायण पाण्डे, एमाले नेता तथा तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, ललितपुर महानगरपालिका–२३ घर भएका ५० वर्षीय सानु भण्डारी, मोरङको पथरी शनिश्चरे नगरपालिका–१० घर भएका ४९ वर्षीय केशवप्रसाद दुलाल र पाँचथरको फिदिम नगरपालिका–७ घर भएका ४५ वर्षीय टंककुमार गुरुङ, दाङ घर भएका सन्देश शर्मा, मोरङको पथरी शनिश्चरे नगरपालिका–१० का पूर्ववडाध्यक्ष सागर राई पक्राउ परेका थिए।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए।
तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसबापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको थियो।
तीमध्ये अधिकांश वास्तविक भुटानी शरणार्थी नभई नेपाली नागरिक रहेको खुलेको थियो। नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन भने अहिले पक्राउ परेको गिरोहको हातमा पुगेको थियो। उनीहरुले त्यही प्रतिवेदनमा ४४६ जना नेपाली नागरिकको नाम समेट्दै उनीहरुलाई अमेरिका लैजाने भनेर रकम उठाउने गरेको पाइएको छ। यो गिरोहले करिब १ अर्ब रुपैयाँ ठगी गरेको पाइएको छ।
सम्बन्धित समाचार
गाडी, चालक र पीएसओ काठमाडौंमा, तर भेटिँदैनन् एमाले सचिव टोपबहादुर!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
