पक्राउ परेका सागर राई र फरार रहेका सन्देश शर्मा।
काठमाडौं– नेपाली नागरिकलाई भुटानी शरणार्थी बनाएर मोटो रकम असुल्दै अमेरिका लैजाने नाममा ठगी धन्दा चलाएको आरोपमा पक्राउ परेकाहरूले उच्च तहका व्यक्तिहरूको पनि संलग्नता रहेको भन्दै बयान दिएका छन्।
करोडौं रुपैयाँ ठगी गरेको आरोपमा पक्राउ परेकाहरूको अहिले जिल्ला सरकारी वकिलसमक्ष धमाधम बयानको काम भइरहेको छ। बयानका क्रममा उनीहरूले उच्च तहका नेतादेखि गृह मन्त्रालयका कर्मचारीसम्मको नामसमेत मुछेका छन्।
गृहका तत्कालीन सचिवहरूदेखि मन्त्री, मन्त्रीका सचिवालयका व्यक्तिहरूकै योजनामा नेपाली नागरिकलाई भुटानी शरणार्थी बनाएर अमेरिका लैजाने काम भएको दाबी गर्दै उनीहरूले बयान दिएको स्रोतले नेपाल लाइभलाई जानकारी दियो। तर, आफूहरूले नाम लिएका व्यक्तिहरूको नाम बयानमा समावेश नै नगरेको भन्दै उनीहरू सरकारी वकिल कार्यालयसँग समेत रुष्ट भएको स्रोतले बतायो।
दाङका मात्रै ८१ जना नेपालीलाई बनाइयो नक्कली भुटानी शरणार्थी
यो गिरोहले दाङका मात्रै ८१ जना नेपाली नागरिकलाई नक्कली भुटानी शरणार्थी बनाएर विदेश पठाउन लागेको खुलेको छ। उजुरी दिएकामध्ये ८१ जना दाङका रहेको पाइएको काठमाडौं उपत्यका अपराध अनुसन्धान कार्यालयका एसएसपी डा मनोज केसीले जानकारी दिए।
उनीलाई नाम भुटानी शरणार्थीमा राखेर रकम अुसलेर ठगी गर्ने काममा दाङकै सन्देश शर्माले मुख्य भूमिका खेलेको पाइएको छ। जो एक वर्षअघि पक्राउ परे पनि शक्तिकेन्द्रको दबाबमा तत्कालै रिहा भएका थिए। हाल उनी अहिलेसम्म पक्राउ गरेका छैनन्। यही गिरोहका अन्य व्यक्ति पक्राउ परेपछि उनी भने फरार भएका छन्।
उनै शर्माले रकम उठाउने र शक्तिकेन्द्रसम्म पुर्याउने गरेको खुलेको छ। स्रोतका अनुसार उनी अहिले फरार भएर भारत पुगेका छन्।
यो गिरोहबाट पीडित भएको भन्दै उजुरी दिनेको संख्या अहिले १४५ पुगिसेको छ। उनीहरूबाट १० लाखदेखि ४० लाख रुपैयाँसम्म लिएर ठगी गरेको पाइएको छ।
पक्राउ परेकाले नै हालेका थिए अख्तियारमा उजुरी
अपराध अनुसन्धान कार्यालयले यो प्रकरणमा ललितपुर महानगरपालिका–२३ घर भई हाल ललितपुरको महालक्ष्मी नगरपालिका–४, सीतापाखा बस्दै आएका ५० वर्षीय सानु भण्डारी, मोरङको पथरी शनिश्चरे नगरपालिका–१० घर भइ ललितपुरको धापाखेल बस्दै आएका ४९ वर्षीय केशवप्रसाद दुलाल र पाँचथरको फिदिम नगरपालिका–७ घर भइ ललितपुरको धापाखेल नै बस्दै आएका ४५ वर्षीय टंककुमार गुरुङलाई पक्राउ गरेको थियो। उनीहरू पक्राउ परेको केही दिनपछि सोही प्रकरणमा संलग्न भएको आरोपमा मोरङको पथरी शनिश्चरे नगरपालिका–१० का पूर्ववडाध्यक्ष सागर राई समेत पक्राउ परेका थिए।
पक्राउ परेकामध्ये सानु भण्डारीले आफू नै पीडित भएको भन्दै ३/४ महिना अघि मात्रै अख्तियार दुरुपयोग अनुसन्धान आयोगमा उजुरी समेत दिएको खुलेको छ। विभिन्न शक्तिको आडमा गृहका कर्मचारीदेखि उच्च तहका नेता तथा मन्त्रीकै मिलेमतोमा शरणार्थी बनाएर विदेश पठाउने भन्दै रकम उठाएर ठगी गरी भ्रष्टाचार गरेकाले छानबिन गरी कारबाही गरिपाउँ भन्दै उनले उजुरी दिएका थिए।
रकम विभिन्न शक्तिकेन्द्रका व्यक्तिले बुझेको, आफूले मध्यस्ताको काम मात्रै गरेकाले पीडितले आफूलाई च्याप्न थालेको भन्दै भण्डारीले अख्तियारमा उजुरी दिएको बताएको स्रोतले नेपाल लाइभलाई जानकारी दियो।
यसरी भएको थियो ठगी
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने सदस्य थिए।
तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसवापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको थियो।
तीमध्ये अधिकांश वास्तविक भुटानी शरणार्थी नभई नेपाली नागरिक रहेको खुलेको थियो। यसरी नेपाली नागरिकलाई नक्कली भुटानी शरणार्थी बनाएर अमेरिका लैजाने र त्यसवापत मोटो रकम असुल्ने योजनामा तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरूले बताएका थिए।
नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन भने अहिले पक्राउ परेको गिरोहको हातमा पुगेको थियो। उनीहरूले त्यही प्रतिवेदनमा ४४६ जना नेपाली नागरिकको नाम समेट्दै उनीहरूलाई अमेरिका लैजाने भनेर रकम उठाउने गरेको पाइएको छ। अहिले पक्राउ परेकाहरूको नेक्सस पनि उच्च तहका नेताहरूसम्म देखिएको छ।
सम्बन्धित समाचार
नक्कली भुटानी शरणार्थी बनाएर अमेरिका लैजाने गिरोहका तीन सदस्य पक्राउ
भुटानी शरणार्थी बनाएर ठगी धन्दा: नेतादेखि कर्मचारी र मन्त्रीका सल्लाहकारसम्म पुग्ला त अनुसन्धान?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
