काठमाडौं- नेकपा एमालेका सचिव तथा सांसद टोपबहादुर रायमाझीलाई दुई दिनदेखि पक्राउ गर्न खोजिरहेको प्रहरी अझै सफल भइसकेको छैन। प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीचको भेटले तत्काल पक्राउ पर्नेमा संशय पैदा गरिदिएको छ।
नक्कली भुटानी शरणार्थी बनाएर अमेरिका पठाउने गिरोहसँग सांसद रायमाझीकोसमेत मिलेमतो रहेको आरोपमा प्रहरीले अनुसन्धानका लागि पक्राउ गर्न खोजेको हो। सांसद रायमाझीका छोरा सन्दीप बुधबार नै पक्राउ परिसकेका छन्।
उनलाई तीन दिन हिरासतमा राखेर अनुसन्धान गर्न अदालतले अनुमतिसमेत दिएको छ। बुधबारदेखि खोजी तीव्र पारिरहेको प्रहरीले सांसद रायमाझीलाई भने अझै पक्राउ गर्न सकेको छैन।
दिउँसो २ बजे आफैं सम्पर्क आउने बताएको प्रहरीले जनाएको थियो। त्यही अनुसार प्रहरी तयार थियो। यहीबीच प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच भेटवार्ता भएको छ। प्रधानमन्त्री कार्यालयले औपचारिक रुपमा ‘नीति तथा कार्यक्रमका साथै बजेटमाथि छलफल'का लागि रहेको बतायो। तर, एमाले अध्यक्ष ओलीले सांसद रायमाझीलाई बाटोबाटै पक्राउ गर्न खोज्नु रहस्यमय भन्दै सार्वजनिक रुपमा आपत्ति जनाए।
यस विषयमा आफूले प्रचण्डको ध्यानाकर्षण गराएकोसमेत उनले बताए। एमाले अध्यक्ष ओलीले आरोपितमध्येका एक सानु भण्डारीले चैत १३ गते दिएको बयानमा लिइएका नाम सरकारी वकिलको कार्यालयले टिप्न नमानेको विषय उठान प्रचण्डकहाँ गरेका छन्। सत्ता पक्षका केही नेता र उनीहरूका छोराहरुको नाम पनि त्यो बयानमा परेको एमालेको दाबी छ।
उच्च तहको नाम पोलेको भन्दै टिप्न नमानेको गुनासो आरोपितको रहेको नेपाल लाइभले चैत्र २१ गते नै यससम्बन्धी समाचारमा उल्लेख गरेको छ।
त्यसपछिका केही बयानमा सरकारी वकिल कार्यालयलाई समेत संलग्न नगराइएको भन्दै छानबिनको निष्पक्षतामाथि आशंका एमालेको तर्फबाट भएको छ। बिहीबार दिउँसो सिंहदरबारमा प्रधानमन्त्री प्रचण्डलाई भेटेपछि सञ्चारकर्मीहरुसँग कुरा गर्दै उनले उपप्रधानमन्त्री बनिसकेको मान्छे भागेर कतै जान नसक्ने दाबी गर्दै दोषी उम्किन नहुने बताएका थिए।
उनले भने, ‘यो तानेको हो की तनाएको हो भन्ने अध्ययन हामी गर्दैछौं। अध्ययन गरेपछि हामी आफ्नो धारणा बाहिर ल्याउँछौं। निर्दोष पर्नु हुँदैन, दोषी उम्किनु हुँदैन। दोषी उम्काउने हाम्रो प्रयास हुँदैन। निर्दोष फसाउन खोजियो भने हामी सहँदैनौं।'
रायमाझीलाई तीव्र रुपमा खोजिरहेको प्रहरीले त्यसपछि भने उनी आफैं सम्पर्कमा आउने अपेक्षा गरिएको जनाएको छ। राजधानीस्थित उनको निवासलाईसमेत निगरानी गरिरहेको प्रहरीले पक्राउ लागि थप प्रयास गरेको छैन।
सांसद रायमाझीका छोरा सन्दीपको नाममा एक करोड ५० लाख रुपैयाँको चेक काटेर राखिएको बताइएको छ। रायमाझीलाई नदिइएको उक्त चेकसमेत शंकास्पद रहेको ओलीको बुझाइ छ।
अख्तियारका प्रमुख आयुक्तबारे छलफल
पीडितहरुले अख्तियार अनुसन्धान दुरुपयोग आयोगका प्रमुख आयुक्त प्रेमकुमार राईलाईसमेत उक्त प्रकरणमा मुछेका छन्। दलालहरुले आफूहरुसँग तत्कालीन सचिव राईकोसमेत नाम लिएर पैसा उठाएको उनीहरुको भनाइ छ।
अख्तियारमा समेत पीडितहरुले उक्त विषयलाई उठाएर पत्र पठाएका छन्। राईलाई एमाले अध्यक्ष ओली सरकारकै पालामा प्रमुख आयुक्त नियुक्त गरिएको हो।
दलालहरुले पैसा उठाउने क्रममा अख्तियार प्रमुख राईको समेत नाम मुछेपछि उक्त प्रकरणको छानबिनका दायराभित्र ल्याउन प्रहरीलाई सकस परेको छ। उक्त विषयमा प्रधानमन्त्री प्रचण्डसँगसमेत प्रहरीले छलफल गरेको बताइएको छ। प्रचण्ड-ओली भेटमा उक्त विषयमासमेत छलफल भएको छ।
पीडितले आफूसँग दलाले राईको नाम लिएको बताए पनि पक्राउ परेकाहरुले यस विषयमा मुख खोलेका छैनन्। तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राईले उक्त प्रकरणमा इन्कारी बयान दिइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
