काठमाडौं- कपन, सरस्वीतनगरस्थित आफ्नै भाँडा पसलमा मृत भेटिएकी नीरा पाण्डे आचार्य घटनामा तीन शंकास्पद गतिविधि देखिएको छ। अनुसन्धानमा खटिएको प्रहरी टोलीले विभिन्न एंगलबाट अनुसन्धान तथा विश्लेषण गर्ने क्रममा तीन वटा शंकास्पद गतिविधि देखिएका हुन्।
एक साताको अनुसन्धानको क्रममा प्रहरीले आर्थिक पाटोदेखि पारिवारिक पाटोसम्मका शंकास्पद गतिविधिमा केन्द्रित रहेर अनुसन्धान अघि बढाएको छ। घटनाबारे आफूहरुले टेक्निकल पाटोबाट अनुसन्धान गरिरहेको काठमाडौं उपत्यका अपराध अनुसन्धान कार्यालयका एसएसपी डा मनोज केसीले बताए।
नीराको हत्या भएपछि अहिलेसम्म हत्यारा पत्ता नलागेको भन्दै आफन्तहरु सडकमा आउन थालेका छन्। बुधबारबाट यो विषय संसदमा समेत प्रवेश गरेको छ। सांसद गगनकुमार थापाले दिनदहाडै नीरा पाण्डेको हत्या हुँदा पनि अहिलेसम्म प्रहरीले पत्ता लगाउन किन सकेन भन्दै प्रश्न गरेका छन्। सत्यतथ्य पत्ता लगाएर हत्यारालाई तत्काल कानुनी दायरामा ल्याउनुपर्ने सांसद थापाको भनाइ थियो।
सडकदेखि संसदसम्म पुगेको नीरा हत्याकाण्डमा प्रहरी अनुसन्धानको क्रममा अहिलेसम्म देखिएका संकास्पद गतिविधिमाथि प्रहरीले थप अनुसन्धान अघि बढाइरहेको छ।
१. उन्नाइस लाख म्याचुअर्ड भएकै दिन हत्या
नीराले फिक्स्ड डिपोजिटमा १९ लाख रुपैयाँ राखेको पाइएको छ। फिक्स्ड डिपोजिटमा राखेको १९ लाख रुपैयाँ वैशाख ७ गते म्याचुअर्ड भएको थियो। अर्थात् फिक्स्ड डिपोजिटमा राखेको म्याद वैशाख ७ गते सकिएको थियो।
सोही दिन उक्त बैंकबाट १९ लाख रुपैयाँ निकालेर नीराले उक्त रकम अर्को बैंकमा राखेको देखिएको छ। ‘त्यही दिन १९ लाख म्याचुअर्ड हुनु, उक्त रकम अर्को बैंकमा ट्रान्सफर गरिनु र त्यति नै बेला हत्या भएको देखिन्छ,’ अनुसन्धानमा संलग्न एक प्रहरी अधिकृतले भने।
‘म्याचुअर्ड हुने दिनको भाका राखेर कसैलाई रकम दिन्छु भन्नु तर रकम दिनुको साटो अर्कै बैंकमा ट्रान्सफर गरेपछि आवेशमा रकम लिन आएको मान्छेले हत्या गरेको पनि हुन सक्ने आशंका गरेर हामी अनुसन्धान गरिरहेका छौं,’ ती अधिकृतले भने।
२. झोलामा सामान प्याक
नीराको हत्या भएपछि घटनास्थल पुग्दा प्लाष्टिकको झोलामा कप, डाडुलगायतका भाँडाकुँडाहरु प्याक गरेको भेटिएको थियो। उक्त सामान कसका लागि अर्डर गरिएको थियो र प्याक गरेर राखेको अवस्थामा भेटियो? प्रश्न अनुत्तरित छ।
कसैले सामान अर्डर गरेर लिन जाने बहाना बनाएर पसलसम्म पुगी नीराको हत्या गरेको हुन सक्ने आशंका गर्दै प्रहरीले यो कोणबाट पनि अनुसन्धान गरिरहेको छ।
‘केही सामानहरु प्याक गरेको अवस्थामा भेटिएकाले सामान किन्न जाने बहानामा हत्या गरिएको हुनसक्ने आशंका पनि छ,’ अनुसन्धानमा संलग्न एक प्रहरी अधिकृतले भने।
३. श्रीमान्-श्रीमतीबीच देखिएन राम्रो सम्बन्ध
अहिलेसम्मको अनुसन्धानको क्रममा नीरा र उनका श्रीमान् योगेन्द्र आचार्यबीच राम्रो सम्बन्ध नरहेको देखिएको छ। उनीहरुले एकअर्कालाई नै विश्वास गर्दैननथे। एकअर्काबीच विश्वास नभएपछि उनीहरुको सम्बन्ध पनि राम्रो नरहेको पाइएको छ।
जस कारण उनीहरु छुट्टाछुट्टै पसल चलाउँदै आएको पनि पाइएको छ। यी दुईबीच विश्वास नै नभएका कारण उनीहरुका बाहिरी सम्बन्ध पनि रहेको हुन सक्ने आशंकामा प्रहरीले अनुसन्धान गरिरहेको छ।
नीराको हत्यापछि उनका श्रीमान् योगेन्द्रको गतिविधि निगरानी गर्दै प्रहरीले उनीमाथि पनि अनुसन्धान गरिरहेको छ।
हत्या कि आत्महत्या?
प्रहरीले नीराको आत्महत्या नभई हत्या नै भएको निष्कर्ष निकालेको छ। शरीरको अघिल्लोतर्फको भागमा १८/२० ठाउँमा चोट लागेको थियो। धारिलो हतियार प्रहारबाट उनको मृत्यु भएको अहिलेसम्मको अनुसन्धानले देखाएको छ।
प्रहरीले सुरुवाती क्रममा आत्महत्या गरेको पनि हुन सक्ने आंशकामा अनुसन्धान गरेको थियो। शरीरको अघिल्लो भागमा मात्रै चोट लागेकाले आत्महत्या हुनसक्ने आशंका गरिए पनि घटनास्थलमा कुनै हतियार फेला नपरेपछि प्रहरीले नीराको आत्महत्या नभई हत्या भएको निष्कर्ष निकालेको छ।
हत्या नै भएको निष्कर्ष निकाले पनि प्रहरीले अहिलेसम्म कुनै तथ्य उजागर गर्न भने सकेको छैन। घटनास्थलबाट नीराको मोबाइल बरामद भएको छ। मोबाइलबाट धेरै कुरा खुल्न सक्ने अपेक्षा गर्दै फरेन्सिक जाँचका लागि पठाइएको छ।
सीसीटीभीमा शंकास्पद गतिविधि
नीराको पसल तथा त्यस नजिकै सीसीटीभी नभए पनि वरपरका सीसीटीभी फुटेजको अनुसन्धानमा प्रहरी जुटेको छ। सो क्रममा एउटा मोटरसाइकलमा दुई जना आएको र एक जना केही पर ओर्लेर नीराको पसलतर्फ अघि बढेको देखिन्छ।यद्यपि, ती व्यक्ति नीराको पसलमा छिरे/छिरेनन् भन्ने दृश्य सीसीटीभीले कैद गरेको देखिँदैन।
मोटरसाइकलबाट झरेर शंकास्पद रुपमा अघि बढेको देखिएपछि प्रहरीले ती व्यक्तिमाथि अनुसन्धान अघि बढाएको छ। प्रहरी स्रोतका अनुसार ती व्यक्ति पठाओ चढेर त्यहाँ पुगेको पाइएको छ। ‘शंकास्पद रुपमा अघि बढेको देखिएपछि हामीले त्यसतर्फ अनुसन्धान अघि बढाएका छौं। पठाओमार्फत ती व्यक्ति घटनास्थल नजिक पुगेको देखिन्छ। थप बुझ्ने काम भइरहेको छ,’ स्रोतले भन्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
