काठमाडौं– जनवरी अन्तिम साता अमेरिकाको अलास्काको आकाशमा एक चिनियाँ बेलुन देखियो। मौसमको तथ्यांक संकलनका लागि छाडिएको उक्त बेलुन अमेरिकी आकाशमा पुगेपछि चीनले जासुसी गर्नका लागि अमेरिका आकाशमा बेलुन पठाएको भन्दै अमेरिकामा सनसनी मच्चियो।
राष्ट्रपति जो बाइडेनको निर्देशनमा उक्त बेलुन अमेरिकी सेनाले फाइटर जेटको प्रहारबाट खसाल्यो। त्यसपछि चीन र अमेरिकाबीच केही तनाव उत्पन्न भयो। चीनले भने भूलवस उक्त बेलुन अमेरिकी आकाशमा पुगेको र त्यो बेलुन कुनै जासुसी गर्नका लागि नभई मौसमी तथ्यांक संकलनका लागि छाडिएको स्पष्टीकरण दिनुपर्यो।
उक्त बेलुनलाई अमेरिकी फाइटर जेट एफ–२२ ले ४ फेब्रुअरीमा नष्ट गरेको थियो। तर पछिल्लो तीन दिनमा अमेरिकी वायु सेनाले तीनवटा अज्ञात वस्तु खसालेको छ। तीन तीनवटा अनआइडेन्टीफाइड अब्जेक्ट (यूएफओ)बारे अमेरिकाले आधिकारिक रुपमा कुनै जानकारी दिएको छैन। तर, अमेरिकी आकाशमा उडिरहेका एक कार आकारका ती वस्तुले उडान प्रभावित पारेको भन्दै वायुसेनाले फाइटर जेटमार्फत् खसालेको हो।
खसालिएका फ्लाइङ अब्जेक्टमध्ये पहिलो अलास्कामा, दोस्रो क्यानडाको यूकोन प्रान्त र तेस्रो अमेरिकाको मिशिगनमा हो। तर यी अब्जेक्ट कुनै पक्षी, प्लेन, ड्रोन या एलियन(परग्रही) जहाज के हुन् भन्नेबारे कुनै जानकारी दिइएको छैन।
रोचक त के भने अमेरिकामा यस्ता अज्ञात उडनतस्तरी देखिएको यो पहिलोपटक भने होइन। बेला–बेला अमेरिकाले उडनतस्तरीको शिकार गरेको खबरहरु आउँछन्। या त त्यस्ता तस्बिर वा भिडियो पनि लिक हुन्छन्।
तर अमेरिकाले कुनै बेलुन या त सैन्य अभ्यासका क्रममा गरिएका मिशन भन्दै टार्ने गरेको छ। एलियन विशेषज्ञले अमेरिकाले सूचना लुकाउने गरेको आरोप लगाउने गरेका छन्। केही समयअघि त एरिया–५१ मा अमेरिकाले एलियनसँग मिलेर संयुक्त खोज गरिरहेको पनि समाचार सार्वजनिक भएका थिए। त्यस सम्बन्धमा अमेरिकाले अहिलेसम्म कुनै आधिकारिक जवाफ दिएको छैन। न एरिया–५१ मा के चलिरहेको छ भन्ने जानकारी नै।
आखिर अमेरिका विश्वसँग कुन रहस्य लुकाउँदैछ? एक्स्ट्रा टेरिस्टेरियल लाइफबारे अनुसन्धान गरिरहेकाहरु अमेरिकाले परग्रहीबारे सूचना विश्वसामु लुकाउँदै आएको आरोप लगाउँछन्।
फाइटर जेटमार्फत् सिधा खसाल्न बाइडेनको निर्देशन
९ फेब्रुअरीमा ग्राउन्ड राडारमार्फत् अमेरिकी सीमामा एक फ्लाइङ अब्जेक्ट भित्रिएको जानकारी प्राप्त भयो। उक्त अनआइडेन्टीफाइ अब्जेक्ट (यूएफओ)को पिछा गर्न अधिकारीहरुले एफ–३५ विमानलाई पछि लगाए। यो यूएफओ करिब ४० हजार फिटको उचाइमा उत्तरपश्चिम दिशातर्फ उडिरहेको थियो।
यो उचाई सिभिल एअर ट्राफिकका लागि खतरा उत्पन्न हुने मानिन्छ। यसको जानकारी राष्ट्रपति बाइडेनलाई पनि दिइयो। बाइडेनले उक्त यूएफओलाई खसाल्ने आदेश दिए। त्यसपछि १० फेब्रुअरीमा दिउँसो १ बजेर ४५ मिनेटमा क्यानडाको सीमासँग जोडिएको डेड हर्स, अलास्काको तटमा उक्त वस्तु खसालियो।
अमेरिकी सेनाले उक्त यूएफओमाथि आक्रमण गर्नुभन्दा पहिला नै यो कुनै एअरक्राफ्ट नभएको जानकारी दिइएको थियो। न त त्यसमा कुनै मानिस सवार थिए। तै पनि राष्ट्रपतिको निर्देशनमा सेनाले आक्रमण गरेर उक्त वस्तु खसाल्यो।
यस्तै १० फेब्रुअरीकै दिन पेन्टागनलाई एनओआरएडीले अलास्काको आकाशमा यूएफओ उडिरहेको जानकारी दियो।
यो यूएफओ केही घण्टापछि क्यानडाको हवाई क्षेत्रमा प्रवेश गर्यो। पछि क्यानडाको सीएफ–१८ र सीपी–१४० एअरक्राफ्ट उक्त यूएफओको पिछा गर्न पठाइयो। ११ फेब्रुअरीको बिहान ३ बजेर ४१ मिनेटमा फाइटर जेट–२२ले क्यानडाको युकोन प्रान्तनजिक यो यूएफओलाई एआइएम ९एक्स मिसाल प्रहारबाट खसालियो।
क्यानडाका प्रधानमन्त्री जस्टिन ट्रुडोले उक्त घटनाबारे सामाजिक सञ्जाल ट्विटरमा नै जानकारी दिएका छन्। उनले ४० हजार फिटको उचाईमा उडिरहेको उक्त वस्तुले एअर ट्राफिकलाई प्रभावित पार्ने देखिएकाले खसालिएको बताएका छन्। उनले उक्त वस्तुबारे विस्तृत जानकारी नभएको भन्दै खसेका टुक्रा संकलन गरेर अनुसन्धान गरेपछि मात्र भन्न सकिने बताए।
यस्तै १२ फेब्रुअरी उत्तरी अमेरिकामा एनओआरएडीको सूचना पाउनेबित्तिकै अमेरिकन एअरक्राफ्ट एफ–१६ मिशिगन नजिक उडिरहेको यूएफओको पछि लाग्यो। दिउँसो २ बजेर ४२ मिनेटमा अमेरिका र क्यानडाको सीमानजिक ह्यूरन नजिक पुगेको उक्त वस्तुमाथि मिसाइल प्रहार गरियो।
फाइटर जेटका पाइलटलाई सिधै राष्ट्रपति जो बाइडेनले नष्ट गर्न आदेश दिएका थिए। अमेरिकाले उक्त वस्तु २० हजार फिटको उचाईमा उडिरहेको जानकारी दिएको छ। जसले यात्रुवाहक विमानलाई खतरा उत्पन्न गराउन सक्ने भएकाले खसालिएको बताएको छ।
लगातार तीनवटा मानवरहित तीनवटा यूएफओ खसालेको अमेरिकाले यसबारे विस्तृत जानकारी भने दिएको छैन। यता अमेरिकी रक्षा विभागका प्रवक्ता जोन किर्बीले भने चिनियाँ बेलुन र फ्लाइङ अब्जेक्टबीच भिन्नता भएको बताएका छन्। आकार र बनावटमा बेलुनभन्दा फ्लाइङ अब्जेक्ट भिन्न रहेको किर्बीले बताएका छन्। स्पाई बेलुनको तुलनामा यी वस्तुको आकार सानो छ।
यी वस्तुका साइज एक सानो कार आकारको रहेको बताइएको छ। यस्तै बनावटको कुरा गर्दा ह्यूरन लेकमा खसालिएको फ्लाइङ अब्जेक्ट कुनै अक्टेगनल सिलिन्डरजस्तो देखिन्छ।
कहाँबाट आएका थिए यूएफओ?
यो प्रश्नको जवाफ अमेरिकासँग छैन। या त भन्नुपर्दा अमेरिका जवाफ नै दिन चाहँदैन। यदि कसैलाई जानकारी भए पनि बाहिर आउँदैन। केही गरी यस्ता वस्तुबारे कुनै जानकारी सार्वजनिक भए पनि अमेरिकाले सैन्य अभ्यास या त अन्य कुनै बेलुन भएको जवाफ दिएर टार्ने गरेको छ।
२० हजार फिटभन्दा माथि उडिरहेका तीनवटा वस्तु खसालिएको जानकारी त दिइयो। तर ती वस्तु के हुन्? कहाँबाट आएका हुन्? र यीनको उद्देश्य के हो? भन्ने कुनै जानकारी दिइएको छैन।
अमेरिकी रक्षा विभागले फ्लाइङ अब्जेक्टका कारण हवाई उडान प्रभावित हुनसक्ने खतरा रहेकाले खसालिएको मात्र जानकारी दिएको छ।
यसैबीच राष्ट्रपति बाइडेनले सुरक्षा अधिकारीहरुलाई यस्ता मानवरहित यूएफओबारे पत्ता लगाउन निर्देशन दिएका छन्। यस्ता वस्तुहरु कहाँबाट आएका हुन्? र यीनको उद्देश्य के हो भन्नेबारेमा पत्ता लगाउन उनले निर्देशन दिएका हुन्।
गत ३१ जनवरीमा अमेरिकी आकाशमा स्पाई बेलुन देखिएपछि अमेरिकी एअरफोर्स र रक्षा विभाग अलर्ट भइसकेको थियो। यसपछि बेलुन मात्र होइन अमेरिकी एअरफोर्सले तीनवटा अनआइडेन्टीफाई अब्जेक्ट(यूएफओ) खसाल्यो।
पहिला जुन फ्लाइङ अब्जेक्टलाई एअर स्पेस हुँदै जाने अनुमति दिइन्थ्यो, अब भने त्यसको निगरानी बढाइएको छ। अमेरिकी डिफेन्स कमाण्डले आफ्नो हवाई क्षेत्रमा कुनै पनि घुसपैठलाई रोक्नका लागि आफ्नो राडार सिस्टममा पहिलाभन्दा निकै स्तरोन्नति गरेको छ।
अमेरिकी रक्षा विभागकी अधिकारी मेलिसा डाल्टनले हवाई क्षेत्रमा प्रभावकारी तरिकाले जाँच गरिरहेको बताएकी छन्। उनले भनिन्, ‘यसैको नतिजा हो, केही दिनयता हामीले लगातार यस्ता फ्लाइङ अब्जेक्ट पत्ता लगाएर खसाल्न सफल भएका छौं।’
यस्ता अज्ञात वस्तु हवाई उडानका लागि निकै खतरनाक मानिन्छन्। यसका कारण हवाई दुर्घटनाको जोखिम पनि उत्तिकै रहन्छ। यसका साथै अमेरिकाले आफ्नो देशको जासुसी गर्नका लागि प्रतिस्पर्धी देशले मानवरहित विमान पठाउने गरेको मानेको छ। चिनियाँ बेलुन प्रवेशपछि अमेरिकी अधिकारीहरुले अन्य देशबाट जासुसीका लागि यस्ता वस्तुहरु पठाइएको हुनसक्ने बताएका छन्।
अहिलेसम्म अमेरिकाले यस्ता वस्तुबारे आधिकारिक जानकारी त दिएको छैन। खसालिएका वस्तुका सामग्रीको अध्ययनपछि मात्र जानकारी दिनसक्ने बताइएको छ। तर अहिलेसम्म भएका यस्ता रहस्यमय घटनामा अमेरिकाले यथार्थपरक जानकारी दिएको भने रेकर्ड छैन। किनकी यस्ता घटनामा अमेरिकी सेनाले पहिल्यै घटनास्थल नियन्त्रणमा लिइहाल्छ। त्यहाँ सर्वसाधारण त के अन्य सरकारी अधिकारीहरुसमेत जान पाउँदैनन्।
यस्ता गम्भिर घटनामा सेनाले सिधा राष्ट्रपतिसँग मात्र सम्पर्क गर्ने भएका कारण यूएफओबारे राष्ट्रपतिबाहेक अरु कसैलाई जानकारी हुँदैन। केही समयअघि अमेरिकामा त्रिभुज आकार र गोलाकार वस्तु उडिरहेको भिडियो सामाजिक सञ्जालमा सार्वजनिक भएका थिए। तर यसबारे सरकारी निकायबाट कुनै जवाफ आएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1764580720.png)
-1763721444.png)
-1763559424.jpg)
-1764080971.png)
