धनगढी– कैलालीको धनगढीमा सूचना प्रविधि प्रदर्शनी मेला (क्यान इन्फोटेक) २०७९ हुने भएको छ। कम्प्युटर एशोसिएसन नेपाल कैलालीको आयोजनामा फागुन १६ गते देखि २० गतेसम्म प्रदर्शनी सञ्चालन हुने सोमबार पत्रकार सम्मेलनमार्फत् जानकारी दिइएको हो।
प्रदर्शनीको यो दोस्रो संस्करण हो। धनगढीमा २०७२ सालमा ओम प्यालेसमा प्रथम प्रदर्शनी सुरु भएको थियो। क्यान कैलालीका अध्यक्ष यज्ञराज ओझाले दोस्रो संस्करण २०२० मै सञ्चालन गर्ने भनिएपनि कोभिड महामारीका कारण गर्न नसकिएको बताए।
सात वर्षपछि सञ्चालन हुन लागेको मेलालाई प्रविधिका सामग्री खरिद बिक्रीभन्दा पनि सूचना, जानकारी तथा प्रविधिको विकासमा जोड दिइने छ। मेलामा सूचना प्रविधिको बारेमा जानकारी दिने, नवीनतम प्राविधिक सामग्रीको प्रदर्शनी गरिने, साइबर सेक्युरेटी सम्बन्धी जानकारी दिइने मुल आयोजक समितिका संयोजक नरेन्द्रसिंह धामीले बताए।
इन्फोटेक मेला मुल संयोजक नरेशसिंह धामीका अनुसार देश विदेशमा भित्रिएका नवीनतम प्रविधिको बारेमा मेलामा जानकारी दिइने छ। त्यसैगरी, सबै प्रकारका प्रविधिहरुको एउटै ठाउँमा प्रदर्शनी गरिने छ। यसका साथै प्राविधिक शिक्षा अध्ययनरत विद्यार्थीलाई लक्षित गरेर सेमीनारको पनि आयोजना गरिने छ।
‘पछिल्लो समय सामाजिक सञ्जालदेखि सरकारी वेबसर्भरमा साइबर आक्रमण हुन थालेको छ,’ धामीले भने, ‘त्यसबाट कसरी बच्ने र सुरक्षाका उपाय कसरी अपनाउने भन्ने बारेमा सूचना प्रबिधि मेलामा जानकारी गराइने छ।’
प्रविधिको प्रयोगसँगै बालबालिका मोबाइल तथा कम्युटरमा बढी समय व्यतित गर्ने गरेको अवस्थामा उनीहरुलाई गलत बाटोमा जानबाट कसरी रोक्ने भन्ने बारेमा पनि मेलामा जानकारी गराइने इन्फोटेक २०२३ का निर्देशक टेकराज पनेरुले बताए।
‘अहिले बालबालिकाले धेरै समय मोबाइल र कम्प्युटरमा बिताउने गरेका छन्,’ उनले भने, ‘बालबालिकाले त्यसमा कस्ता साइट हेर्ने गरेका छन् भनेर कसरी पत्ता लगाउन भन्ने बारेमा पनि मेलामा जानकारी गराइने छ, ती साइट कसरी हटाउने भन्ने बारेमा पनि जानकारी गराइने छ। त्यसैले इन्फोटेक २०२३ सबै नागरिकका लागि महत्त्वपूर्ण हुनेछ।’
कार्यक्रममा नेपाल टेलिकम धनगढीका प्रमुख बलराम जोशीले प्रविधिको प्रयोगसँगै नागरिकको दैनिकी पनि प्रविधिमा निर्भर हुने गरेको बताए। तर, प्रविधिको बढ्दो प्रयोगसँगै त्यसमा केही विकृति देखापरेको भन्दै उनले त्यसबाट कसरी बच्ने भन्ने बारेमा जानकारी पाउनु सबैका लागि अपरिहार्य रहेको बताए। उनले सूचना प्रविधिलाई लक्षित गरेर सञ्चालन हुने हरेक क्रियाकलापमा नेपाल टेलिकमले सघाउने गरेको बताए।
कम्प्युटर एशोसिएसन नेपाल महासंघका उपाध्यक्ष हर्क सेठ्ठीले मेला सामान बेच्नका लागि मात्र नभई सूचना प्रविधिका बारेमा धेरै जानकारी पाउने स्थान हुने बताए।
उनले उद्योगी र शिक्षाको सम्बन्ध कसरी जोड्ने भन्ने बारेमा पनि मेलामा जानकारी गराइने बताए। उद्योग सञ्चालन गर्दा अझै पनि प्राविधिक जनशक्तिको कमि रहेको भन्दै उनले मेलाले त्यो समस्या कसरी समाधान गर्ने भन्ने बारेमा पनि छलफल हुने बताए।
क्यानका प्रदेश अध्यक्ष धनबहादुर बोगटीले चुनौति धेरै भएपनि आँट गरेर मेला सञ्चालनको तयारीमा जुटेको बताए। उनले मेला सफल बनाउन सबैको सकारात्मक सहयोगको अपेक्षा रहेको बताए। क्यानले काठमाडौंपछि धनगढीमा मेला सञ्चालन गर्ने तयारी गरेको बताउँदै उनले धनगढीपछि देशका अन्य प्रदेशमा पनि मेला आयोजना गर्ने योजना रहेको बताए।
मेलामा विद्यार्थीले उत्पादन गर्ने प्राविधिक सामग्रीको पनि प्रदर्शनी हुने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
