काठमाडौं– कतारमा जारी विश्वकप फुटबलमा आज राति अर्जेन्टिना र क्रोएसियाबीच सेमिफाइनल खेल भइरहेको छ। फाइनल प्रवेशका लागि हुने महत्वपूर्ण खेलमा अहिले पनि सुपरस्टार लियोनल मेसीको कप्तानीमा रहेको अर्जेन्टिनाको अलि बढी पल्ला भारी हुने अधिकांश फुटबल पण्डितले बताइरहेका छन्।
चार वर्षअघि रुसमा भएको विश्वकपमा पनि यस्तै अनुमान थियो। सो विश्वकपको समूह ‘डी’मा अर्जेन्टिना र क्रोएसियासँगै नाइजेरिया र आइसल्याण्ड थिए। यो समूहका तीनवटै खेल जितेर अर्जेन्टिना सजिलै अन्तिम १६ मा जाने अपेक्षा थियो। तर, त्यो अनुमान भारी अन्तरले उल्टियो। पहिलो खेलमा स्टार खेलाडीले भरिएको अनुभुवी अर्जेन्टिना नवप्रवेशी आइसल्याण्डसँग १–१ गोलको बराबरीमा रोकियो। निर्णायक पेनाल्टीमा मेसी चुक्दा अर्जेन्टिनाले अप्रत्यासित नतिजा भोग्नुपरेको थियो।
त्यसपछि दोस्रो खेलमा अर्जेन्टिना लुका मोड्रिचको कप्तानीमा रहेको क्राएसियासँग जित्दैपर्ने दबाबसहित मैदानमा उत्रिएको थियो। मध्यान्तरअघि अर्जेन्टिनाले सिर्जना गरेका केही सुन्दर अवसर खेर गएका थिए। यसपछि खेल मध्यान्तरसम्म ०–० को अवस्थामा रह्यो। तर, दोस्रो हाफको सुरुवातीमै अर्जेन्टिनी गोलकिपर विल्फ्रेडो काबलेरोले गम्भीर गल्ती गरे। त्यसको फाइदा उठाउँदै एन्टे रेबिचले ५३ औँ मिनेटमा गोल गरे। त्यस लगत्तै अर्जेन्टिनाका इनो पेरेजले पाएको सुनौलो अवसर खेर फाले। यसले गर्दा अर्जेन्टिनाका खेलाडी थप ‘नर्भस’ हुन पुगे। यसबाट क्रोएसियाका खेलाडी थप हौसिए। कप्तान मोड्रिचले ८० औँ मिनेटमा लामो दूरीबाट सुन्दर गोल गरे।
यसपछि त अर्जेन्टिनाका खेलाडीहरू आत्मसमर्पण गरेको अपराधीजस्तै भएका थिए। यसको फाइलदा उठाउँदै क्रोएसियाले अतिरिक्त समयमा पनि एक गोल थप्यो। ९२ औँ मिनेटमा गोल इभान राकेटिकले गोल गरेपछि क्राएसियाले खेल ३–० ले जित्यो। यसलाई विश्वकप इतिहासकै अप्रयासित नतिजा मानिएको छ।
दुई खेलमा खराब नतिजा निकाल्नका बाबजुद अर्जेन्टिना नाइजेरियालाई २–१ ले हराउँदै उपविजेताको रूपमा अन्तिम १६ मा पुग्यो। क्रोएसियाले आइल्याण्डलाई हराएपछि अर्जेन्टिनाको भाग्य खुलेको थियो। तीनवटै खेल जितेको क्रोएसिया समूह विजेता बन्दै अन्तिम १६ मा गयो। र, पछि फाइनलसम्म नै पुग्यो।
हालसम्म अर्जेन्टिना र क्राएसियाबीच पाँचपटक भिडन्त भएको छ। जसमा दुवैले दुई–दुई खेल जितेका छन्। पहिलो खेल सन् १९९४ मा भएको थियो। उक्त मैत्रीपूर्ण खेल ०–० मा टुंगिएको थियो। यसपछि १९९८ को विश्वकपको समूह चरणको खेलमा अर्जेन्टिनाले नवप्रवेशी क्रोएसियालाई १–० ले हराएका थियो। र पछि क्रोएसिया सेमिफाइनलमा पुग्दै तेस्रो भयो।
यस्तै, यी दुई टोलीबीच २००६ मा मैत्रीपूर्ण खेल भएको थियो। सो खेल क्रोएसियाले ३–२ ले जितेको थियो। मेसीले अर्जेन्टिनाको सिनियर टोलीका लागि पहिलो गोल गरेका थिए। तर, उनको टोली पराजित भयो।
यसपछि यी दुई टोलीबीच २०१४ मा अर्को मैत्रीपूर्ण खेल भयो। सो खेल अर्जेन्टिनाले २–१ ले जितेको थियो। त्यसमा पनि मेसीले गोल गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
