काठमाडौं– विश्वकपमा गोल्डेन बलका दुई दाबेदार खेलाडीबीचको भिडन्त मंगलबार राती हुदैछ।
नेपाली समयअनुसार राती पौने एक बजे हुने खेलमा अर्जेन्टिना र क्रोएसिया फाइनल प्रवेशका लागि एक पल्ट फेरि भिड्दै छन्।
अर्जेन्टिना जहाँ विश्व फुटबलका लोकप्रिय खेलाडी लिओनल मेसीको नेतृत्वमा उत्रिदै छ भने क्रोएसियालाई लुका मोड्रिचले प्रतिनिधित्व गर्दै छन्। यी दुवै कतारमा जारी विश्वकपको ‘गोल्डेन बल’ का दाबेदार हुन्।
दुवैले आफ्नो टोलीलाई सेमिफाइनलको यात्रा गराइसकेका छन्। दुवै खेलाडीको यो अन्तिम विश्वकप पनि मानिएको छ। मेसी पाँचौ विश्वकपको आफ्नो सहभागितालाई सार्थक तुल्याउन कुनै पनि हालतमा क्रोएसियालाई पराजित गर्न चाहन्छन् भने मोड्रिच पनि गत विश्वकपको फाइनल पुगेर पराजय भोग्नु परेको इतिहासलाई उल्ट्याउन चाहन्छन्।
मोड्रिचको पनि यो अन्तिम विश्वकप मानिएको छ। ३७ वर्षको उमेरमा पनि उनी लयमा देखिन्छन्।
सबैभन्दा रोचक कुरा, यी दुवै खेलाडी यसअघिको विश्वकपका ‘गोल्डेन बल’ विजेता हुन्। अर्जेन्टिना फाइनल पुगेको सन् २०१४ को विश्वकपमा मेसीले ‘गोल्डेन बल’ जितेका थिए। २०१८ को विश्वकपमा फाइनल पुगेको क्रोएसियाबाट मोड्रिच ‘गोल्डेन बल’ विजेता बनेका थिए।
आजको खेलमा जुन टिम फाइनल पुग्छ, त्यही टोलीको खेलाडी ‘गोल्डेन बल’ विजेता बन्ने लगभग पक्का छ। यद्धपि मोरक्कोका असरफ हाकिमी र हाकिम जियच तथा फ्रान्सका केलियन एमबाप्पे पनि गोल्डेन बलको दौडमा समावेश छन्।
अर्जेन्टिनाले गत विश्वकपको बदला लिन आज क्रोएसियाली डिफेन्सको कडा सामना गर्नुपर्ने छ। रुसमा भएको विश्वकपमा क्रोएसियाले ३–० गोलले अर्जेन्टिनालाई स्तब्ध तुल्याएको थियो।
समग्रमा यो विश्वकपमा यी दुई देशबीच तेस्रो पल्ट भिडन्त हुदैछ। सन् १९९८ मा क्रोएसियलाई १–० गोलले पराजित गरेयता विश्वकपमा अर्जेन्टिना जितको खोजीमा छ।
क्रोएसियामा सेन्ट पीटरवर्गबाट खेल्ने डेन्जेन लोर्भेन, सेल्टिकका जुरानोभिच, याेस्काे ग्वार्दिओल जस्ता बलिया डिफेन्डर समावेश छन्। उनीहरूलाई मिडफिल्डबाट अनुवभी मोड्रिच, कोभासिच र ब्रोजोभिच जस्ता खेलाडीले सहयोग गर्ने कारण क्रोएसियाको डिफेन्स लाइन–अप निकै बलियो देखिन्छ।
मिडफिल्डका यी तीनै खेलाडी लामो समयदेखि राष्ट्रिय टोलीमा रहेर खेलिरहेका छन्। रियल मड्रिडबाट व्यवसायिक फुटबल खेल्ने मोड्रिच, चेल्सीका कोभासिच र इन्टर मिलानका ब्रोजेभिचका कारण अग्रपंक्तिमा इभान पेरिसिच बलियो अवस्थामा देखिन्छन्। उनी भर्खरै क्रोएसियाबाट सर्वाधिक ३३ गोल गर्ने खेलाडी बनेका थिए।
टोटेनहामका यी अनुभवी स्ट्राइकर पनि कतारमा लयमै देखिन्छन्।
क्रोएसियाको तुलनामा अर्जेन्टिनाको डिफेन्स लाइन–अप युवा देखिन्छ। नेदरल्याण्ड्सविरूद्ध गोल हान्ने नावेल मोलिना, टोटेनहामबाट खेल्ने सर्जियो रोमेरोको यो पहिलो विश्वकप सहभागिता हो। सेन्टर–ब्याकको भूमिकामा देखिने रोमेरोले १७ अन्तर्राष्ट्रिय खेल मात्र खेलेका छन्। प्राविधिक रूपमा राम्रो देखिए पनि रोमेरोमा अनुभवको कमि छ। त्यसैले धेरै पल्ट अर्जेन्टिनी डिफेन्स दबाबको बेला चिप्लिएको देखिन्छ।
जारी विश्वकपको ५ खेलमा अर्जेन्टिनाले १० गोल गर्नुको साथै ५ गोल पनि खाएको छ। अर्जेन्टिनाका लागि यो नै सबैभन्दा चिन्ताको विषय हो। टिममा निकोलस ओटामेन्डी र लिजान्द्रो मार्टिनेज जस्ता प्रभावशाली डिफेन्डर पनि सहभागी छन्। उनीहरूको प्रदर्शन आज कस्तो हुन्छ, यसले पनि खेलको दिशा तय गर्नेछ।
क्रोएसियाले जारी विश्वकपको ६ खेलमा ६ गोल नै खाएको छ। र, उसले ६ गोल फर्काएको छ।
अर्जेन्टिको मिडफिल्डमा आज एञ्जल डि मारिया फर्किने सम्भावना बलियो छ। ह्यामस्ट्रिङका कारण नेदरल्याण्ड्सविरूद्धको खेलमा उनी अन्तिम समयमा मात्र मैदान प्रवेश गरेका थिए।
उनी टोलीमा फर्किएको खण्डमा मिडमा मेसीलाई केही सहज हुने देखिन्छ। नभए यसअघि मिडमा सबैभन्दा बढी दबाब मेसीले नै खेप्दै आएका थिए। युवा मिडफिल्डरद्धय रोड्रिगो डि पल र एलेक्सिस म्याक एलिस्टरबाट अर्जेन्टिनाले ठूलो आशा राखेको छ। तर, उनीहरूले चर्चा अनुसारको प्रदर्शन गर्न सकिरहेका छैनन्। यसले दबाब मेसीमा थपिएको छ।
आजको खेलमा फेरि पनि मेसीको खेलले अर्जेन्टिनाको भाग्य निर्धारण हुने पक्का छ। गोलकिपरमा एमिलियो मार्टिनेजबाट अर्जेन्टिनाले फेरि एकपल्ट उत्कृष्ट प्रदर्शनको आशा राखेको छ। नेदरल्याण्ड्सविरूद्ध २ वटा पेनाल्टी जोगाउदै मार्टिनेजले आफ्नो टोलीलाई सेमिफाइनल पुर्याएका थिए।
उनी ‘गोल्डेन ग्लोब्स अवार्ड’ को बलियो दावेदार पनि हुन्। उनलाई क्रोएसियाकै गोलकिपर डोमिनिक लिभाकोभिचले कडा टक्कर दिइरहेका छन्। लिभाकोभिचले नकआउट चरणमा जापानविरूद्ध अन्तिम १६ को खेलमा ३ वटा पेनाल्टी जोगाएका थिए। उनले क्वाटर फाइनलमा ब्राजिलका रोड्रिगोले हानेको पेनाल्टीलाई पनि जोगाएका थिए।
त्यसैले आजको खेललाई मेसी र मोड्रिचबीच मात्र नभई मार्टिनेज र लिभाकोभिचविरूद्धको प्रतिस्पर्धाको रूपमा पनि हेरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
