बैतडी– २१ वर्षीय माया लुहारले प्रतिनिधि सभा र प्रदेश सभा निर्वाचनमा म्यादी प्रहरी भएर आफ्नो जिम्मेवारी पूरा गरिन्। उनको सपना केही दिनका लागि खटाइने म्यादी मात्र होइन प्रहरी बनेर सधैं समाजको सुरक्षा गर्ने थियो।
तर, उनको सपनामाथि सुरक्षा निकायकै मान्छेबाट तुसारापात भयो। उनको सपना मात्रै सकिएन, सँगै सकियो श्वास पनि। भौतिक संसारबाट उनी त बिदा भइसकिन् तर उनकी आमा भने अझै छोरी कुरिरहेकी छिन्।
बैतडीको पञ्चेश्वर गाउँपालिकामा बस्ने आमा रमा लुहार छोरीको हत्या भएदेखि नै अचेत छिन्। छोरी माया लुहार (भुरी)को घाँटी रेटेर हत्या भएपछि रमा होसमा छैनिन्।
बैतडीको पञ्चेश्वर गाउँपालिका–४ फ्याउलेकी मायाको हत्यापछि अहिले गाउँ शोकमा डुबेको छ। छोरीको हत्याको खबर पाएलगत्तै रन्थनिएर बेहोस भएकी रमा अहिले होसमा आउनेबित्तिकै छाती पिटेर रुन थाल्छिन्। होसमा आउनेबित्तिकै छोरीलाई खोज्छिन्।
छोराहरुको अगाडि रुँदै रमा भन्छिन्, ‘माया कब आउने हई’। छोराहरुले मायाँ आउँछे भन्दै थम्थम्याउँछन्। चार दिनदेखि रमाले अन्नको दाना मुखमा हालेकी छैनन्। ५५ वर्षीया रमाको मानसिक अवस्थासमेत बिग्रँदै गइरहेको छ। मायाकी बहिनी टिकु लुहार भन्छिन्, ‘दिदीको हत्यापछि आमाको अवस्था खराब बन्दै गएको छ। जतिबेला नि दिदीकै नाम लिएर बर्बराउनुहुन्छ।’
आरोपी सशस्त्र प्रहरी जवान फरार
२१ वर्षीया माया लुहारको हत्यामा संलग्न रहेको भन्दै पीडित परिवारले एक प्रहरी जवानको नाममा किटानी जाहेरी दिएका छन्। मृतकका आफन्तले शिवनाथ गाउँपालिका–४ सोलपला घर भएका सशस्त्र प्रहरी जवानसमेत रहेका भरत राम कोलीको नाममा किटानी जाहेरी दिएका हुन्।
आरोपित कोलीले केही दिन अगाडि मायाको मोबाइल खोसेको र मोबाइल लैजान बोलाएर हत्या गरेको मृतकका परिवारले दाबी गरेको छ। आरोपित सशस्त्र प्रहरी जवान भरत कोलीले नै बहिनीको हत्या गरेको मृतक मायाका दाईले बताए।
माया लुहार मंगलबार घरबाट कुलाउ बजार गएकी थिइन्। तर घर नफर्केपछि खोजी गर्दै जाँदा बुधबार शिवनाथ गाउँपालिका ६ स्थित शिवनाथ मन्दिर नजिकै घाँटी रेटी हत्या गरेको अवस्थामा उनको शव फेला परेको थियो। उनीसँगै कुलाउ गएकी मृतककी भदै नेहा लुहार घाँटीमा धारिलो हतियार प्रयोग गरी घाइते बनाइएको अवस्थामा फेला परेकी थिइन्।
उनी शिवनाथ र पञ्चेश्वर गाउँपालिकाको सिमाना लामाडाँगा भन्ने स्थानमा फेला परेकी थिइन्। अहिलेसम्म दोषीलाइ पक्राउ गर्न नसकेको भन्दै स्थानीयले आक्रोश पोखेका छन्। प्रहरी प्रशासनले आरोपित पक्राउ गर्न ढिलाई गरिरहेको भन्दै स्थानीयले आन्दोलन गर्ने चेतावनी दिएका छन्।
आरोपी कोलीको खोजी भइरहेको जिल्ला प्रहरी कार्यालय बैतडीका डिएसपी प्रेम शाहीले बताए। घटनाको अनुसन्धान भइरहेकाले धेरै कुरा भन्न नमिल्ने उनको भनाइ छ।
एक वर्षमै चार पीडादायी घटना
छोरीको वियोगमा विक्षिप्त बनेकी रमाको घरमा एक वर्षकै अवधिमा चारवटा पीडादायी घटना भएका छन्। श्रीमान र जेठी छोरीको मृत्युको पीडा सेलाउन नपाउँदै कान्छी छोरीको हत्याले उनी विक्षिप्त भएकी हुन्।
उक्त घटनामा गम्भीर घाइते भएकी नातीनी नेहा लुहार अस्पतालको शय्यामा छटपटाइरहेकी छिन्। माया दिदीका छोराछोरीका लागि कपडा किनर ल्याउँदै भन्दै भदैनीलाई साथमा लिएर बजार गएकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787755124.jpg)
-1786602170.png)
-1786513116.png)
