एलन मस्क बने ट्विटरको मालिक, सीईओ अग्रवाल बाहिरिए

सूचना-प्रविधि

नेपाल लाइभ शुक्रबार, कात्तिक ११, २०७९ ०८:३२

काठमाडौं– माईक्रो ब्लगिङ साइट ट्विटरको स्वामित्व एलन मस्कले लिएका छन्। मस्कले ४४ अर्ब अमेरिकी डलरमा ट्विटरको स्वामित्व खरिद गरेका हुन्।

मस्कले स्वामित्व लिएसँगै ट्विटरका उच्च अधिकृतहरु बाहिरिएका समाचार अमेरिकी सञ्चारमाध्यमहरुले लेखेका छन्। समाचारहरुमा जनाइएअनुसार ट्विटरका सीईओ पराग अग्रवाल, चिफ फाइनान्सियल अफिसर नेड सेगल, लिगल एन्ड पोलिसी एक्जुकेटिभ विजय गाडे र सल्लाहकार सिन एजेड बाहिरिएका छन्। उनीहरुले आफैं राजीनामा दिएका हुन् वा मस्कले बर्खास्त गरेका हुन् भन्नेबारे भने केही खुलाइएको छैन।

बिहीबार एक ट्विटमा मस्कले मानवताको सहयोग गर्न आफूले ट्विटर खरिद गरेको बताएका थिए। ‘मैले ट्विटर प्राप्ती गर्नुको कारण यो हो कि सभ्यताको भविष्यका लागि साझा डिजिटल ‘टाउन स्क्वायर’ हुनु जरुरी छ, जहाँ हिंसाको सहारा नलिइ, स्वस्थ रूपमा विश्वासको विस्तृत दायरामा बहस गर्न सकिन्छ,’ मस्कले भनेका थिए।

मस्कले यसअघि नै ४४ अर्ब अमेरिकी डलरमा ट्विटर किन्ने सम्झौता गरेका थिए। तर पछि मस्क उक्त सम्झौताबाट ‘ब्याक’ भएपछि ट्विटर उनीविरुद्ध अदालत गएको थियो।

अदालतले मस्कलाई अक्टोबर २८ (शुक्रबार)सम्म खरिद सम्झौता गर्ने समयसीमा दिएको थियो। अदालतले तोकेको समयसीमा अगावै मस्कले ट्विटरको स्वामित्व लिएका हुन्।

मस्कले बिहीबार मात्रै आफ्नो ट्विटरको बायो परिवर्तन गर्दै ‘चिफ ट्विट’ लेखेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एक किलो एकसय ग्राम सुनसहित एकजना पक्राउ

एनपीएल पहिलो खेलः विराटनगर किङ्स कहाँ चुक्यो?

मलेसियामा बाढीका कारण एक लाख भन्दा बढी मानिस विस्थापित