बुटवल– लुम्बिनीमा ३ वर्षसम्म थन्किएका बिजुली बस बिहीबारदेखि सञ्चालनमा आएका छन्। लुम्बिनी विकास कोषले एसियाली विकास बैंकको सहयोमा प्राप्त बिजुली बस र ट्याक्सी सञ्चालनको मोडालिटी तय नगर्दा ३ वर्षसम्म बस थन्किएका थिए।
यही असोज ११ गते विश्व पर्यटन दिवसको अवसरमा बेलहियमा भएको कार्यक्रममा गृहमन्त्री बालकृष्ण खाणले बिजुली बस सञ्चालनमा ल्याउन प्रमुख जिल्ला अधिकारी भरतमणि पाण्डे र लुम्बिनी विकास कोषका कोषाध्यक्ष सिद्दिचरण भट्टराईलाई निर्देशन दिएपछि बिहीबारदेखि ५ वटा बस सञ्चालनमा आएका हुन्।
पर्यटकको सुविधाका लागि एसियाली विकास बैंक (एडीबी)ले लुम्बिनी विकास कोषलाई अनुदानमा यी सवारी साधन दिएको थियो।
बुधबार रुपन्देहीका प्रमुख जिल्ला अधिकारी पाण्डेको अध्यक्षतामा लुम्बिनी विकास कोष, स्थानीय पालिका, यातायात कार्यालय, उद्योगी तथा पर्यटन व्यवसायीका सघंसस्थाको बैठकले बिहीबारदेखि नै तत्काललाई पाँच वटा बस सञ्चालनमा ल्याउने निर्णय गरेको थियो।
बिजुली बस सञ्चालनको लागि मोडालिटी अहिलेसम्म तय नभएपछि चालक र सहचालक नेपाली सेना, नेपाल प्रहरी, सशस्त्र प्रहरी, लुम्बिनी विकास कोष र लुम्बिनी होटल संघ नेपालले एक/एक गाडीको जिम्मेवारी लिएर सञ्चालनमा ल्याइएको लुम्बिनी विकास कोषका कोषाध्यक्ष भट्टराईले जानकारी दिए।
पाँचवटा बसमध्ये एउटा बस बुटवल-भैरहवा-बेलहिया–एयरपोर्ट हुँदै लुम्बिनी, दोस्रो बस बेलहिया-भैरहवा-एयरपोर्ट हँदै लुम्बिनी, तेस्रो बस नवलपरासी-रामग्राम-भैरहवा-बेलहिया एयरपोर्ट हुँदै लुम्बिनी, चौंथो बस कपिलवस्तु-तिलौराकोटबाट लुम्बिनी र पाँचौँ बस लुम्बिनी वरिपरि सञ्चालन हुने रुट तय गरिएको छ।
बसहरु निःशुल्क रुपमा सञ्चालनमा आउने छन्। यी बसमा यात्रा गर्दा पैसा नलाग्ने व्यवस्था गरिएको छ। यो सधैँ निःशुल्क नभई अहिले चाडपर्वका समयमा आन्तरिक तथा बाह्य पर्यटकलाई टेवा पुग्ने गरी सञ्चालन गर्न लागिएको लुम्बिनी विकास कोषले जनाएको छ।
कोषले सबै विद्युतीय बस तथा भ्यानहरु भने असोज १५ गतेदेखि परीक्षण सञ्चालनमा ल्याउने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
