(तस्बिर साभार: पिए मिडिया)
लन्डन- ब्रिटिश महारानी एलिजाबेथ द्वितीयले सत्तारुढ कन्जरभेटिभ पार्टीकी नयाँ नेता मेरी एलिजाबेथ ट्रस (लिज ट्रस) लाई बेलायतको नयाँ प्रधानमन्त्री नियुक्त गरेकी छिन्।
मंगलबार स्कटल्याण्डको बाल्मोरल क्यासलमा भेटपछि महारानीले कन्जरभेटिभ पार्टीका लिज ट्रसलाई प्रधानमन्त्री पदमा नियुक्त गरेकी हुन्।
मार्गरेट थ्याचर र टरिजा मेपछि ब्रिटेनको प्रधानमन्त्री हुने ट्रस तेश्रो महिला हुन्। यसअघि प्रधानमन्त्री बोरिस जोनसनले ब्रिटिश महारानीसमक्ष आफ्नो पदबाट राजीनामा दिएका थिए।
संसद्मा सत्तारुढ दलको नेता भएकाले महारानीले ट्रसलाई नयाँ प्रधानमन्त्री नियुक्त गरेकी हुन्।
९६ वर्षीय महारानी एलिजाबेथ द्वितीयको कार्यकालमा नियुक्त हुने ट्रस १५ औं ब्रिटिश प्रधानमन्त्री हुन्, तर बाल्मोरल दरबारमा नियुक्ति पाउने पहिलो प्रधानमन्त्री।
यसअघिका सबै प्रधानमन्त्रीहरुलाई लन्डनस्थित बकिङ्घम दरबारमा महारानीले नियुक्ति दिएकी थिइन्। तर, यसपटक स्वास्थ्यको कारणले उनी स्कटल्याण्डमै बसिरहेको राजदरबारले जनाएको छ।
सत्तारुढ दलको नयाँ नेता
सत्तारुढ कन्जरभेटिभ पार्टीका १४१,००० भन्दा बढी सदस्य तथा सांसदहरुले गरेको मतदानबाट लिज ट्रस दलको नेता छनोट भएकी हुन्।
विवादै विवादमा घेरिएका प्रधानमन्त्री बोरिस जोनसनले गत जुलाई महिनामा पदबाट राजीनामा दिने घोषणा गरे पछि सत्तारुढ दलको नयाँ नेता छाने प्रक्रिया सुरु भएको थियो।
लिज ट्रसले खसेको मतको ५७ प्रतिशत मत पाएकी थिइन् भने ऋषि सुनकले ४२ प्रतिशत मत पाएका थिए। सोमबार अपरान्ह लन्डन वेस्टमिन्स्टरमा उक्त घोषणा गरिएको थियो।
उक्त घोषणापछि बोल्दै ट्रसले आफूले ऊर्जाको बढ्दो मूल्यसँग जुध्न र राष्ट्रिय स्वास्थ्य सेवा (एनएचएस) मा सुधार गर्ने कामलाइ प्राथमिकता दिने बताइन्।
बेलायतको अक्सफोर्डमा जन्मिएकी ४७ वर्षीय ट्रसले अक्सफोर्ड विश्व विद्यालयबाट स्नातक अध्ययन पूरा गरेकी छन्। उनी सन् २०१० मा पहिलो पटक ब्रिटिश संसद्, हाउस अफ कमन्स, मा निर्वाचित भएकी थिइन्।
उनले शिक्षा, वातावरण, अन्तर्राष्ट्रिय व्यापार तथा परराष्ट्रमन्त्रीको रुपमा काम गरिसकेकी छन्। उनका श्रीमान मान ह्यु ओ लियरी एकजना लेखापाल हुन्। उनीहरुका दुइ छोरी छन्।
‘महंगी अरु बढ्न सक्ने’
नवनियुक्त प्रधानमन्त्री ट्रसले करका दर नबढाउने बरु कर कटौती गर्ने जनाएकी छन्। तर, त्यसले गर्दा महंगी अरु बढ्न सक्ने जानकारहरु बताउँछन्।
‘कर कटौती गरे पछि बजारमा पैसा बढी आउँछ, तर सामानहरु नपाउँदा महंगी अरु बढ्न सक्छ’, लण्डनमा बसोबास गर्ने एकजना आर्थिक विश्लेषक विकल चन्द्र आचार्यले भने, ‘कोभिडको समयमा ब्रिटेनको केन्द्रीय बैंकले ‘क्वान्टिटेटिभ इजिङ्ग’ (धेरै पैसा छापेर बजारमा पठाउने काम) गरेको थियो। त्यसले पनि महंगी बढाएको हो।’
बेलायतमा अहिले महंगी झन्डै ११ प्रतिशत ले बढेको छ, जुन जी-७ मुलुकहरुमध्ये सबैभन्दा बढी हो। रुस-युक्रेन युद्धका कारण ऊर्जाको मूल्य बढेकाले महंगी २० प्रतिशत नाघ्न सक्ने अनुमान गरिएको छ।
‘केन्द्रीय बैंकले व्याजदर बढाउँदै लगेको छ जसले गर्दा मोर्गेज (घर किन्न ऋण लिए वापत बैंकलाई तिर्नु पर्ने मासिक किस्ता) बढ्दै गएको छ। ब्रिटेनमा श्रमिकहरुको अभाव छ, पौण्डको मूल्य घटिरहेको छ र ब्रेक्जिटका नकारात्मक असरहरु पनि देखिएका छन्। त्यसैले आगामी दिनहरु ब्रिटिश जनताका लागि कठिन हुने देखिन्छन्’, आचार्यले भने।
‘प्रधानमन्त्री ट्रसले विद्युत र खाना पकाउने ग्याँसको मूल्य बढ्न नदिन ऊर्जा व्यापार कम्पनीहरुलाई लाखौं पौण्ड अनुदान दिने बताएकी छन्। तर, त्यसले दिगो समधान दिँदैन। वैकल्पिक ऊर्जाका लागि सरकारले लगानी बढाउन ढिला भै सकेको छ’, आचार्यले थपे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
