काठमाडौं– वैशाख १५ गते दुबईबाट काठमाडौं आएको हिमालय एयरको विमानको शौचालयबाट दुई जनाले झण्डै साढे दुई किलो सुन निकाले। सुनगाभा सप्लायर्स एण्ड सरसफाइ प्रालिमार्फत् सरसफाइमा खटिएका दुई कर्मचारीले दुई किलो ३२२ ग्राम सुन शौचालयबाट निकालेका थिए।
पाँचथरको याङवरक गाउँपालिका–४ घर भएका २८ वर्षीय भीमकुमार माबो र नुवाकोटको तादी गाउँपालिका–५ का २७ वर्षीय सुमन तामाङले शौचालयभित्रको फोहोरमा फालिएको सुनका बिस्कुट निकालेका थिए।
सुनगाभा कम्पनीमार्फत् सरसफाइमा खटिएका माबोले शौचालयको फोहोरमा फालिएका सुनका बिस्कुट निकाले। विमानको फोहर जम्मा गर्ने ठाउँमा बसेका तामाङलाई बोलाएर माबोले उक्त बिस्कुट बाँडे। सुनका बिस्कुट माबो र तामाङ दुबैले आफ्नो मनि पर्समा राखे। उक्त बिस्कुट पूर्वयोजना अनुसार उनीहरुले त्रिभुवन अन्तर्राष्ट्रिय विमानस्थलबाट बाहिर ल्याएर केही व्यक्तिलाई सुम्पनु पर्ने थियो।
सोही योजना अनुसार उनीहरुले सुनका बिस्कुट लिएर विमानस्थलको फलामे गेट बाहिरिने तयारी गरे। गेट पास हुने बेला उनीहरुको स्क्रीनिङ मेसिनमा जाँच भयो। सो क्रममा माबोले टेपले बेरेर बोकेको पर्समा १ हजार १६६ र तामाङले बाकेको पर्सबाट पनि १ हजार १६६ ग्राम सुन बरामद भयो।
उक्त सुन रिसिभ गर्न विमानस्थल बाहिर कुरेर बसेका तीन जना पनि पक्राउ परे। उदयपुरको लिम्चुङबुङ गाउँपालिका–२ का २८ वर्षीय राजेश राई, दोलखाको गौरीशंकर गाउँपालिका–२ का ट्याक्सी चालक ४१ वर्षीय हेमबहादुर थापा र सुनगाभा सप्लायर्समार्फत विमानभित्र सरसफाइको सुपरभाइजरको रुपमा खटिएका सप्तरीको सुरुङ्गा नगरपालिका–४ का ३६ वर्षीय ताराकान्त चौधरी पनि समातिए।
पक्राउ परेका उनीहरुलाई विमानस्थल प्रहरीले थप कारबाही र अनुसन्धानका लागि विमानस्थल भन्सार कार्यालयलाई बुझाएको थियो। उक्त घटनाको अहिले अनुसन्धान भइरहेको र अनुसन्धानको क्रममा केही नयाँ तत्थहरु खुल्दै गएका छन्।
गोरे समूहकै सुन भएको आशंका
स्रोतका अनुसार पक्राउ परेकाहरुको बयान अनुसार बरामद सुनको नेक्सस गोरे समूहसम्म जोडिएको छ। पक्राउ परेकाहरुले साढे ३३ किलो सुन तस्करी र सनम शाक्य हत्या प्रकरणमा जोडिएर दोषी ठहर भई केन्द्रीय कारागार सुन्धारामा कैदी जीवन बिताइरहेका चुडामणि उप्रेती (गोरे) का मान्छेको नाम पोलेपछि नयाँ आशंका उब्जिएको हो।
स्रोतले नेपाल लाइभसँग भन्यो, ‘पक्राउ परेका मान्छेहरुले गोरेका भाई रमेशको समेत नाम पोलेका छन्। यद्यपि, यसको अहिलेसम्म पुष्टि भइसकेकोे छैन। हामी अनुसन्धानकै क्रममा छौं।’
सुन तस्करको आरोपमा प्रतिवादी रहेका गोरेका भाइ रमेश उप्रेती अन्तर्राष्ट्रिय प्रहरी संगठन इन्टरपोलको सहायतामा दुबईमा पक्राउ परेका थिए। उनलाई गत पुसमा मात्रै नेपाल ल्याइएको थियो। त्यसपछि मोरङ जिल्ला अदालतमा उपस्थित गराइएको थियो। मोरङ अदालतले २ लाख धरौटीमा रिहा गर्न आदेश दिएपछि उनी रिहा भएका थिए। अहिल उनैले पुनः सुन तस्करी गरेको आरोप लागेको छ।
पटक–पटक तस्करी, चौंथो पटकमा पक्राउ
सरसरफाईका कर्मचारीलाई प्रयोग गरेर पटक पटक सुन तस्करी हुने गरेको अनुसन्धानबाट खुलेको छ। प्रहरी स्रोतका अनुसार यसअघि उनीहरुले तीन पटकसम्म यही शैलीमा सुनको तस्करी गरेको खुलेको हो। स्रोतले भन्यो, ‘यसअघि सानो परिणाममा तीन पटकसम्म यही शैलीमा सुन तस्करी गरिएको रहेछ। चौंथो पटकमा उनीहरु पक्राउ पर्न सफल भएका हुन्।’
विभिन्न अनुसन्धान र विभिन्न व्यक्तिहरुसँको संवादबाट यो कुरा पुष्टि हुने आधारहरु देखिएको स्रोतको भनाइ छ। यता, भन्सार कार्यालयले पनि अनुसन्धानबाट उनीहरुले यसअघि पनि यही शैलीमा सुन तस्करी गरेको खुलेको छ।
तीन जनाको बयान सकियो
पक्राउ परेका पाँचै जनाको अनुसन्धान गरिरहेको भन्सार कार्यालयले तीन जनाको बयान लिइसकेको छ। विमानस्थल भन्सार कार्यालयका प्रमुख भन्सार प्रशासक महेश भट्टराईले तीन जनाको बयान सकिएको र दुई जनाको बयान गर्ने क्रममा रहेको नेपाल लाइभलाई बताए।
उनीहरुले नयाँ नयाँ सामाजिक सञ्जाल प्रयोग गरी त्यसमार्फत् नै कुराकानी गरेर तस्करी गर्ने गरेको खुलेको छ। ‘अधिकांश कारोबार तथा तस्करीको कुराकानी सामाजिक सञ्जालमार्फत् नै हुने गरेको देखिएको छ। एकले अर्को व्यक्तिलाई नचिन्ने तर, फलानो हुलिया गरेको व्यक्तिलाई सामान दिनु भन्ने मात्रै गरेको देखियो’ भट्टराईले भने।
दुबईबाट सुन ल्याउने को थिए?
प्रहरीले विमानको शौचालयको फोहोरमा सुन राखेको निकाल्ने र उक्त सुन रिसिभ गर्नेसम्मका पाँच जनालाई पक्राउ गरेको थियो। तर, उक्त सुन विमानको शौचालयको फोहोरमा राख्ने व्यक्ति को थिए भन्ने न प्रहरीले पत्ता लगायो न अहिले भन्सारले नै पत्ता लगाएको अवस्था छ।
दुबईबाट सुन ल्याएका व्यक्तिले पूर्वीयोजना अनुसार नै शौचालयको फोहोरमा सुन फ्याँकेर हिँड्ने र सरसफार्ईका कर्मचारी गएर उक्त सुन विमानस्थलबाट पास गराउने योजना देखिन्छ। सोही अनुसार सुन ल्याएका व्यक्ति सबै यात्रु ओर्लिएपछि अन्तिममा शौचालयको फोहोरमा सुन फालेर ओर्लिएको हुनसक्ने अनुमान गरेर अनुसन्धान अघि बढाइएको छ। यद्यपि, अहिलेसम्म उनको पहिचान हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
