काठमाडौं-जेभियर इन्टरनेसनल कलेज र नाथमले पाँचौं नारायणप्रसाद स्मृति अन्तरकलेज बास्केटबल प्रतियोगिताको उपाधि सोमबार जितेका छन्। जेभियर ब्वाइज तथा नाथम गर्ल्समा च्याम्पियन बने।
ग्वार्कोस्थित आयोजक क्वेस्ट इन्टरनेसनल कलेजको कोर्टमा भएको ब्वाइज फाइनलमा जेभियरले गोल्डेनगेट इन्टरनेसनल कलेजलाई ७९–५५ ले पराजित गर्दै उपाधि रक्षा गर्यो। जेभियरका रवि पौडेलले १७ अंक योगदान गरे। जेभियर लगातार पाँचौं पटक च्याम्पियन बनेको हो।
दोश्रो क्वार्टरकाे समाप्तिसम्म गोल्डेनगेट समग्रमा ५ अंकले अगाडि थियो। पहिलो क्वाटरमा १८–१२ को अग्रता लिएको जेभियर दोश्रोमा ८–१९ ले पछि पर्यो। तेश्रोमा २६–१० र चौथोमा २७–१४ को महत्वपूर्ण अग्रता बनाउदै जेभियरले उपाधि सुनिश्चित गर्यो। उपाधिसँगै जेभियरले ५० हजार नगद पुरस्कार हात पार्यो भने गोल्डेनगेटले ३० हजार नगद पुरस्कार प्राप्त गर्यो।
गर्ल्सकाे उपाधि भिडन्तमा झरना बज्राचार्यको १३ अंक मद्दतमा नाथमले शुभश्रीलाई ३२–७ ले सहजै हराउँदै नयाँ च्याम्पियन बन्यो। विगतका चार संस्करणको उपाधि जेभियरले जितेको थियो। जेभियर पाँचौं संस्करणमा सहभागी भएन भने नाथम पहिलो पटक प्रतियोगितामा सहभागी भएको हो।
नाथमले पहिलोमा १३-०, दोश्रोमा ११–१, तेश्रोमा ६–२ र चौथोमा २–४ को प्रदर्शन गर्यो। विजेताले ३० हजार तथा उपविजेताले २० हजार नगद पुरस्कार हात पारे।
ब्वाइजमा जेभियरका तेन्जिङ सोनाम भुजेल र गर्ल्समा नाथमकी कृषा डान्डेख्या ‘मोस्ट भेलुएबल प्लेयर’ घोषित भए । दुवैले समान ५ हजार नगद पुरस्कार पाए।
विजेतालाई क्वेस्टका निर्देशक कोलिनकिरण श्रेष्ठ, बीबीए निर्देशक ज्योति शेरचन, एसोसिएट डाइरेक्टर आदर्श जोशी, आर्थिक निर्देशक रमेश कुँवर र प्रिन्सिपल उदयराज पौडेलले एक कार्यक्रमबीच पुरस्कृत गरे। बैशाख २१ गतेदेखि सुरु प्रतियोगिताको ब्वाइजमा ८ टिमले लिग कम नकआउट आधारमा प्रतिस्पर्धा गरेका थिए। गर्ल्सकाे राउन्ड रोविन लिगमा ४ टिम सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
