काठमाडौं– अभिनेता पल शाह (पूर्णविक्रम शाह) जोडिएको बलात्कार घटनामा पीडित भनिएकी नाबालिग गायिकाले अदालतमा बकपत्र गर्ने क्रममा बयान फेरेसँगै 'ट्वीस्ट' आएको छ।
जिल्ला अदालत तनहुँमा आइतबार बयानको क्रममा नाबालिग गायिकाले पलले बलात्कार नगरेको भनेर बयान दिएसँगै घटनाले नयाँ मोड लिने आकलन भइरहेको छ।
त्यसक्रममा उनले प्रहरीले जबरजस्ती आफूलाई हस्ताक्षर गर्न लगाएको तथा उजुरी दिनका लागि दबाब दिएको बयान दिएको स्रोतले नेपाल लाइभलाई जानकारी दियो।
नाबालिग बाहेकको बकपत्र अन्योलमा
आइतबार नाबालिग गायिकाको बयान सकिएपछि आज उनका बुवासहित अन्यको बकपत्र गर्ने तयारी थियो। तर बकपत्र केही समय नहुने देखिएको छ। बयान रोकिने भएसँगै मुद्दा थप केही समय चल्ने देखिएको छ।
तनहुँ जिल्लाका सरकारी वकिल कार्यालयका प्रमुख रामचन्द्र शर्माले आज भोलि नै अन्यको बकपत्र हुने सम्भावना न्यून रहेको नेपाल लाइभसँग बताए।
आगामी वैशाख ३० गतेका लागि तय भएको स्थानीय तह निर्वाचनका लागि अधिकृतहरु खटिएर जानु पर्ने भएसँगै जाहेरीकर्तासहित अरु साक्षीको बकपत्र आज भोलिमै हुने सम्भावना कम रहेको उनको भनाइ छ।
'निर्वाचनका लागि अधिकृतहरु खटिएर जानुपर्ने र अरु साक्षीहरु झिकाए पनि बकपत्र हुने सम्भावना कम भएकाले आज भोलि नै बकपत्र हुँदैन' शर्माले भने। अब बकपत्र वैशाख ३० को निर्वाचनपछि मात्र हुन सक्ने सम्भावना रहेको उनको भनाइ छ।
अदालतले चाहेमा अन्य साक्षीलाई झिकाउन वा उनीहरु उपस्थित भएमा बकपत्र गरेर निर्णयमा पुग्ने उनको भनाइ छ।
बकपत्र सरकारी साक्षीको रुपमा पेस गर्नु पर्नेमा पीडित भनिएको पक्ष 'होस्टाइल' भएको आशंका गरिएको अदालत स्रोतको भनाइ छ।
नाबालिग गायिकालाई बलात्कार गरेको आरोपमा पक्राउ पूर्जी जारी भएपछि गत फागुन १५ गते प्रहरीसमक्ष आत्मसमर्पण गर्दै शाह जिल्ला प्रहरी कार्यालय, तनहुँमा उपस्थित भएका थिए। तनहुँमा बलात्कार कसुरमा अनुसन्धान भइरहेका बेला नवलपरासी पूर्वमा समेत शाहले बलात्कार गरेको भन्दै जाहेरी परेको थियो। दुवै घटनाको पीडित उही नाबालिग थिइन्।
१६ वर्षभन्दा कम उमेरकी नाबालिगलाई बलात्कार गरेको पाइएको भन्दै शाहलाई १२ देखि १४ वर्षसम्म माग दाबी गर्दै दुबै अदालत (तनुहँ र नवलपुर)मा मुद्दा दायर भएको छ। दुबै अदालतले शाहलाई पुर्पक्षका लागि कारागार पठाउने आदेश दिए। हाल उनी तनहुँ कारागारमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773072269.png)
-1773054140.png)
-1773053162.png)
-1764146706.png)
-1772777462.png)
