‘यो कुरा कसैले सुनेको छ/छैन यकिन भएन, मैले ट्विटरबाट राजीनामा दिएँ’

विश्व

नेपाल लाइभ सोमबार, मंसिर १३, २०७८ २३:२७

काठमाडौं- ट्विटरका सहसंस्थापक तथा प्रमुख कार्यकारी अधिकृत (सीईओ) ज्याक डोर्सीले राजीनामा दिएका छन्। उनले सोमबार आफ्नो टिमलाई इमेल पठाउँदै ट्विटरको सीईओ बाट राजीनामा दिएको घोषणा गरेका हुन्।

आफ्ना सहकर्मीहरूलाई पठाएको इमेल उनले सामाजिक सञ्जाल ट्विटसमेत गरेका छन्। उनले लेखेका छन्, ‘यो कुरा कसैले सुनेको छ/छैन यकिन भएन, मैले ट्विटरबाट राजीनामा दिएँ।’

सन् २००६ मा ट्विटरको स्थापना गरेका डोर्सी सन् २००७ मा सीईओ नियुक्त भएका थिए। डोर्सीले सीईओको भूमिका न्याय गर्न नसक्ने भन्दै अन्य दुई सहसंस्थापक इभ विलियम्स र बोर्ड सदस्य फ्रेड वील्सनले उनलाई सन् २००८ मा सीईओ पदबाट हटाएका थिए। तर, सन् २०१५ मा उनी पुनः ट्विटरको सीईओको रुपमा फर्किएका थिए।

उनले ट्विटरमा पर्याप्त समय नदिएको भन्दै लगानीकर्ताहरुले गत वर्षदेखि प्रश्न उठाएका थिए। सोह्र वर्षपछि आफूले ट्विटर छाड्ने समय आएको उनले आफ्नो इमेलमा उल्लेख गरेका छन्। सीईओ पद छाडे पनि डोर्सी आगामी वर्षसम्म ट्विटरको बोर्ड सदस्यको रुपमा सक्रिय हुने छन्। अन्य सामाजिक सञ्जाल कम्पनीसँग प्रतिस्पर्धा गर्दै ट्विटरले सन् २०२३ सम्ममा आफ्नो आम्दानीलाई दोब्बर बनाउने घोषणा गरेको छ।

डोर्सीले ट्विटरबाहेक पेमेन्ट प्रोसेसिङ कम्पनी क्वायरको पनि नेतृत्व सम्हालिरहेका छन्। उनको राजीनामापछि ट्विटरका सीईओ भारतीय मूलका पराग अग्रवाल नियुक्त भएका छन्। सोमबारदेखि अग्रवालले ट्विटरको सीईओ को जिम्मेवारी सम्हालेका हुन्।

अग्रवाल ट्विटरमा १० वर्षदेखि कार्यरत छन्। उनी सन् २०१७ देखि प्रमुख प्रविधि अधिकृतका रूपमा कार्यरत थिए। भारतको चर्चित आईआईटी बम्बेका विद्यार्थी अग्रवालले ट्विट गर्दै आफ्नो नयाँ भूमिकाबारे उत्साहित रहेको प्रतिक्रिया दिएका छन्।

‘हामीलाई अहिले विश्वले नै हेरिरहेको छ। यो जानकारीबारे धेरै मानिसको धेरै खाले धारणा हुन सक्छ किनकी उनीहरु सबैले ट्विटर र हाम्रो भविष्यप्रति चासो राख्छन्,’ अग्रवालले ट्विटमा लेखेका छन्।

यता, डोर्सीले उनीमाथिको विश्वास रहेको बताएका छन्। अग्रवालले पनि डोर्सीलाई धन्यवाद दिएका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सिरहामा मदिरा तस्करी गर्ने गाडीको ठक्करबाट सशस्त्रका सईको मृत्यु

कीर्तिपुरका २० स्थानमा उत्साहपूर्वक मतदान जारी

एसिसी यू-१९ एसिया कपमा‌ नेपालले बंगलादेशसँग खेल्दै