उत्तर कोरियाली शासक किमको पुरानो (बायाँ) र बुधबारको(दायाँ) तस्बिर। जहाँ उनी पहिलाको तुलनामा दुब्ला देखिएका छन्।
काठमाडौं- उत्तर कोरियाले ७३ औं स्थापना दिवसको असर पारेर बुधबार मध्यरातमा सैन्य परेडको आयोजना गरेको छ। उत्तर कोरियाली सञ्चारमाध्यमहरुले सार्वजनिक गरेको तस्बिरहरुमा परेडमा उपस्थित सैनिकले विशेष खालको कपडा र ग्यास मास्क लगाएका थिए। उनीहरुको अनुहार पूर्ण रुपमा छोपिएको थियो।
अहिलेसम्म एकजना पनि कोरोना भाइरस संक्रमित दर्ता नगरेको उत्तरले देशमा संक्रमण नरहेको दाबी गर्दै आएको छ। तर अन्तर्राष्ट्रिय सञ्चारमाध्यमहरुले भने कोरोनाको सम्भावित जोखिमबाट बच्न त्यस्तो पहिरन सेनाले लगाएको हुन सक्ने बताएका छन्। सैनिकले विशेष खालको कपडा र ग्यास मास्क लगाएको सार्वजनिक भएसँगै कोरोना भाइरससँग लड्नका लागि उत्तरले विशेष तयारी गरेको हुनसक्ने बीबीसीले जनाएको छ।
कोरियाले यस्ता सैन्य परेडहरुमा क्षेप्यास्त्र र ठूला हातहतियार प्रदर्शन गर्दै आएको भएपनि यसपटक भने कुनै पनि क्षेप्यास्त्र र हतियार प्रदर्शन नगरेको समाचार संस्था रोयटर्सले जनाएको छ। कार्यक्रममा उत्तर कोरियाका सर्वोच्च नेता किम जोङ उन पनि सहभागी भएका थिए।
राजधानी प्योङयाङको किम इल सुङ स्क्वायरमा आयोजित परेडमा लडाकु विमानद्वारा हवाई प्रदर्शन पनि गरिएको थियो। केसीएनमा प्रकाशित तस्बिरमा किमले स्वायरको बार्दलीमा उभिएर तल परेडमा उपस्थित भएकाहरुलाई अविवादन गरिरहेको देख्न सकिन्छ।
किम पहिले भन्दा केही दुब्लो देखिएको बेलायती अनलाइन द सनले जनाएको छ। केही समय अघि किमको स्वास्थ्यलाई लिएर विभिन्न समाचारहरु सार्वजनिक भइरहँदा उनी दुब्लाएको फोटो सार्वजनिक भएको हो। किमले ४० पाउन्ड (१८.१४ केजी) भन्दा धेरै तौल घटाएको र उनले त्यसका लागि अप्रेसन गराएको हुनसक्ने द सनले जनाएको छ।
अगस्टमा प्योङयाङमा कोरियाली पिपुल्स आर्मीका कमाण्डर र राजनीतिक अधिकारीलाई अभिवादन गर्ने क्रममा किम पहिलाको तुलनामा दुब्लो देखिएका थिए।
किमका एक साथीलाई उदृत गर्दै द सनले जनाए अनुसार किम कामको तनाव, अत्यधिक रक्सी, धुम्रपान र मसलेदार खानपानका कारण मोटो भएका जनाएको छ।
५ फिट ७ इन्च उचाइका किम देशमा खाद्य संकट बढेसँगै जनताको नजरमा राम्रो देखिनका लागि दुब्लाएको अड्कल काटिएको छ। जनताले अभाव व्यहोरिरहँदा शासकले पनि त्यस्तै भोगेका छन् भन्ने देखाउनका लागि उनी दुब्लाएको हुन सक्ने समाचारमा जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
