तस्वीरहरुः पुष्पा थपलिया
कोरोना महामारी नियन्त्रणका लागि लगाइएको निषेधाज्ञाका कारण धेरै जना घरभित्रै थुनिए। निषेधाज्ञा खुकुलो बनेसँगै बजारतिर चहलपहल बढेको छ।
कतिपयको लागि घरभित्रै बस्दाको पट्यार मेट्ने माध्यम भएको छ, हाइकिङ। जागिरेहरु पनि शनिबारलाई रमाइलो गरी बिताउन हाइकिङ जाने गर्छन्।
विभिन्न संस्थाले शनिबार पारेर आयोजना गर्ने हाइकिङमा उपत्यकाका डाँडाकाँडा चहार्न निस्कने काठमाडौंबासीको संख्या बढ्दो छ। कतिपय भने आफैँले समूह बनाएर पनि हाइकमा निस्कन्छन्। यसरी निस्कने कोही आँखालाई शितलता प्रदान गर्न डाँडाकाँडा चहार्छन् त, कोही बढिरहेको तौल व्यवस्थापन गर्न। कोही भने हिँड्नुको मजा लिन हाइकिङमा जान्छन्।
‘हाइक फर नेपाल’ संस्थाले गरेको हाइकमा पनि त्यस्तै देखियो। कोभिड–१९ को महामारीका कारण हाइक फर नेपालले यस पटक ३० जना मात्रै घुमन्ते लिएर मुलपानीदेखि नगरकोटसम्मको हाइक आयोजना गरेको थियो।
कतै पिच गरिएको सडक, कतै कच्ची सडक र कतै गोरेटो हुँदै यात्रा अघि बढेको थियो। हाइकरहरु कसैले झाडीका कारण बाटो भुलेका थिए। कोही जुकासँग पौँठेजोरी खेलिरहेका थिए। कोही नाचिरहेका त कोही झरनासँग रमाइरहेका।
गाउँको दृश्यावलोकनको आनन्द लिन सकिने हुनाले यस्ता हाइकिङ रमाइलो हुने गर्छन्। कोही स्थानीयसँग गफिन्छन् त, कोही फोटो खिचिरहेका हुन्छन्।
नगरकोटको सडक शनिबार निकै व्यस्त थियो। अन्य दिनजस्तो गाई–बाख्रा सडकबाट चराउन लैजान सकस थियो। कतिपय त कार र बाइकहरुलाई हप्काइरहेका पनि थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
