काठमाडौं- चलेका कलाकारहरूको जमघट रहेको फिल्म ‘लभ सर्कल’ टेलिभिजनमार्फत् सार्वजनिक गरिने भएको छ। उक्त फिल्म यही साउन २९ गते डिसहोमबाट सार्वजनिक गर्ने तयारी गरिएको बताइएको छ। कमेडी र सस्पेन्स थ्रिलर विधामा फिल्म तयार पारिएको छ।
चपली हाइट-३ फिल्मका निर्माता अर्जुन रावल पनि हिसाब मिले टेलिभिजनबाटै भए पनि फिल्म सार्वजनिक गर्ने मुडमा छन्। तर, उनको फिल्म लभ सर्कलजस्तो थोरै बजेटमा बनेको फिल्म हैन। लागेको लगानीसमेत उठाउन नसकिने गरेर रिभिन्यु बेसमा उनी फिल्म दिन चाहँदैनन्। त्यसैले उनको फिल्म थन्किएर बसेको छ।
पहिलो लकडाउनताका रेखा थापा र सविन श्रेष्ठ अभिनित फिल्म ‘हिरो रिटर्नस्’ पनि टेलिभिजनबाट सार्वजनिक भयो। केही समय डिसहोमबाट प्रदर्शन गरेपछि अहिले भने फिल्म थन्किएको छ। उनीहरूले केही समयका लागिमात्रै पैसा तिरेर हेर्न मिल्नेगरी फिल्म प्रदर्शन गरेका थिए।
माथि उल्लिखितबाहेक अन्य केही फिल्म पनि नेटटीभी या डिसहोम जस्ता टेलिभिजन च्यानलबाट सार्वजनिक भएका छन्। यो गुणात्मक हिसाबमा भने छिमेकी देश भारतभन्दा निकै कम हो।
ठूलो पर्दाका लागि बनाइएका यी फिल्मका लागि सानो पर्दा विकल्प बनेको थियो। तर, यसले विभिन्न समस्या निम्त्यायो।
यतिबेला बलिउड पूर्णरूपमा ओटीटीमा निर्भर बनेको छ। फिल्म निर्माताहरू सानो पर्दाको सहारा लिन बाध्य छन्।
भारतमा जुन महिनामा ‘गुलाबो सितावो’ नामको फिल्म पहिलोपटक अनलाइनमा सार्वजनिक भयो। बलिउडका चर्चित कलाकार अमिताभ बच्चनको अभिनय रहेको उक्त फिल्मपछि शकुन्तला देवी, गुञ्जन सक्सेना, सडक-२ लगायतका फिल्म सानो पर्दामा प्रदर्शनमा आए।
ठूलो पर्दाका लागि बनाइएका यी फिल्मका लागि सानो पर्दा विकल्प बनेको थियो। तर, यसले विभिन्न समस्या निम्त्यायो।
भारतको एक टेलिभिजनलाई नेटफ्लिक्स इन्डियाकी कन्टेन्ट उपाध्यक्ष मोनिका शेर्गिलले दिएको अन्तर्वार्तामा सानो पर्दामा सेन्सर बोर्डका कारण समस्या झेल्नुपरेको बताएकी थिइन्। भारतमा सानो पर्दामा प्रदर्शन भएको फिल्म ‘राधे’ नेपालमा पनि सेन्सरबिना नै प्रदर्शनमा आएको थियो। सानो पर्दाका कारण हरेक देशले सेन्सरको झमेला बेहोरिरहेको शेर्गिलले बताएकी थिइन्।
त्यसो त कोभिडकै कारण धेरै मानिसले सानो पर्दा र स्ट्रिमिङ भनेको भविष्य हैन, वर्तमान हो भन्ने थाहा पाए। नेटफ्लिक्स र अमेजनको प्राइम भिडियोसँग भारतमा सबभन्दा ठूलो बजार हिस्सा रहेको छ। नेटफ्लिक्सले यो वर्ष अहिलेसम्म भारतमा १८ वटा मौलिक प्रस्तुति पस्किसकेको छ भने प्राइमले सन् २०२० भरिमा १४ वटा मौलिक प्रस्तुति पस्किने बताएको छ। डिज्ने+हटस्टारले जुलाई २४ यता हलमा रिलिज गर्न बनाइएका सातवटा चलचित्र आफ्नो सेवामार्फत् सार्वजनिक गरिने जनाएको छ।
च्याउसरी उम्रिएका ओटीटीकै कारण कन्टेन्टको अभाव हुनु स्वाभाविक हो। त्यसैले नेटफ्लिक्स, अमेजन जस्ता स्ट्रिमिङ कम्पनीहरूले आफैं फिल्म तथा सिरिज बनाउन थालेका छन्। एक सर्भेले कोभिडयताको एक वर्षमा डिज्नेले एक वर्षमा बनाउने फिल्मभन्दा २० गुणा बढी फिल्म तथा सिरिज बनेको देखाएको छ।
फिल्म धेरै बन्नु समस्या हैन, तर पहिले हलमा लाग्दा जुन गुणस्तरको बन्थ्यो त्यो गुणस्तरको फिल्म नबन्नु समस्या हो। सुपर हिरोको कथालाई निकै रोचक ढंगले फिल्म बनाउने डिज्नेले वर्षमा १० देखि १२ फिल्म बनाउँथ्यो। अहिले नेटफ्लिक्सले मात्रै वर्षमा २५ देखि ३० वटा फिल्म आफैं बनाउँछ। साथमा अरूले बनाएका राम्रा फिल्म पनि सार्वजनिक गर्छ।
नेटफ्लिक्सको तुलनामा केही कम अमेजन, बुट लगायतका स्ट्रिमिङ कम्पनीले आफैं फिल्म र सिरिज बनाउँछ। यसरी बाढीसरह आएको फिल्म तथा सिरिजले गुणस्तरमा समस्या पार्ने नेटफ्ल्क्सि इन्डियाकी कन्टेन्ट उपाध्यक्ष शेर्गिलको भनाइ छ।
थोरै लगानीमा बनेका फिल्म र सिरिजका लागि सानो पर्दा फलदायी बने पनि फिल्मलाई उद्योगको रूपमा विस्तार गर्न यो गतिलो माध्यम नभएको छलफल क्लब हाउसलगायत अन्य सोसल मिडियामा चलिरहेका छन्।
उनका अनुसार, कन्टेन्ट धेरै त छ नै, साथै सानो पर्दाले फिल्मको गुणस्तरमा पनि प्रभाव पार्छ। ‘डिजिटल युगमा आएसँगै हामीले खिच्ने फिल्मको गुणस्तर खस्किरहेको थियो, अहिले सानो पर्दाका कारण काम चलाउन एचडी क्वालिटीमासमेत फिल्म खिच्छन्। यस्ता फिल्महरू हलमा देखाउन लायकका हुँदैनन्,’ उनको तर्क छ।
हालै अन्तर्राष्ट्रिय जगतमा यही कुरालाई इंगित गर्ने घटना घटेको छ। मार्वल इन्टरटेनमेन्ट जुन डिज्नेको एउटा अंग हो, यसले विवाद निम्त्याएको छ। ‘ब्ल्याक विडो’ नामको फिल्मकी मुख्य अभिनेत्री स्कारलेट जोन्सनले वितरक कम्पनी डिज्नेमाथि मुद्दा हालेकी छन्। मुद्दाका कारण सानो पर्दामा आएर रोकिएको छ।
उनले मार्वल इन्टरटेनमेन्टसँगको सम्झौतामा हलमा प्रदर्शनपछि आएको हिस्सा अनुसार तलब मागेकी रहिछन्। कम्पनीले त्यो समयमा उनको सर्त माने पनि पछि सम्झौतामा नभएको सानो पर्दाको स्ट्रिमिङ पनि राखेछ। सम्झौता अनुसार विश्वभर धेरैभन्दा धेरै स्क्रिनमा प्रदर्शन गर्ने भनिए पनि फिल्म प्रदर्शन भएको दिन नै ओटीटीमा राखेछ। डिज्नेको अहिलेसम्म धेरै कमाइ गर्ने स्ट्रिमिङ फिल्म ब्ल्याक विडो नै भए पनि कूल कमाइको तुलनामा यो निकै कम रकम हो। यही कारण उनी मुद्दा हाल्न बाध्य भइन्।
महामारीपछि फर्कने ठाउँ फिल्म हल नै हो। नायिका रेखा थापा फिल्मका लागि हलको विकल्प नरहेको बताउँछिन्। उनका अनुसार जबसम्म हल चल्दैन, फिल्म क्षेत्र चलायमान बन्नै सक्दैन। सानो पर्दामा देखाइएको फिल्मले केही समय राहत देला तर फिल्मलाई उद्योगको रूपमा विस्तार गर्न भने नदिने उनको बुझाइ छ।
त्यसैले थोरै लगानीमा बनेका फिल्म र सिरिजका लागि सानो पर्दा फलदायी बने पनि फिल्मलाई उद्योगको रूपमा विस्तार गर्न यो गतिलो माध्यम नभएको छलफल क्लब हाउसलगायत अन्य सोसल मिडियामा चलिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
