काठमाडौं– सन्तान नभएका दाम्पत्य जोडीको संघर्ष र समाजले दिएको मानसिक दबाबलाई केन्द्रमा राखी सर्ट फिल्म ‘निःशब्द’ निर्माण भएको छ । आज शुक्रवार यस सर्ट फिल्मको फस्टलुक पोस्टर सार्वजनिक गरिएको छ। फस्टलुक दर्शकलाई कौतुहलता जगाउने किसिमको बनेको छ ।
सेलिब्रेटी टाइम्सको ब्यानरमा निर्माण भएको यस फिल्ममा ओजस्वी विक्रम विष्ट, मिसेल घिमिरे र दिवस नाथको अभिनय देख्न सकिनेछ। मण्डला थियटर र कान्तिपुर फिल्म एकेडेमीमा अध्ययन गरेका उनीहरुलाई निर्देशक रामजी ज्ञवाली यस कथाका विभिन्न पात्रमा अभिनय गराएका हुन् ।
फिल्मका लेखक, निर्देशक तथा निर्माता रामजी ज्ञवाली हुन्। छायांकन शंकल्प भुजेलले, सम्पादन नहकुल खड्काले, साउन्ड डिजाइन भरत कंडेलले र कलर ग्रेडिङ राजेन्द्र मोक्तानले गरेका छन्।
हाल पोस्ट–प्रोडक्सनको अन्तिम चरणमा रहेको ‘निःशब्द’लाई निर्देशक ज्ञवालीले च्यारिटी शोमार्फत दर्शकसमक्ष ल्याउने, अन्तर्राष्ट्रिय फिल्म फेस्टिभलहरूमा पठाउने तथा अवार्ड प्रतिस्पर्धामा उतार्ने संकेत गरेका छन् । उनी भन्छन्, –‘पहिला फिल्मको सम्पुर्ण काम सकिएपछि हामी कसरी दर्शकलाई देखाउने भन्ने बिषयमा निर्णय गर्नेछौं । तर, युट्युब हाम्रो पहिलो प्राथमिकता चैं होइन ।’
‘निःशब्द’ले सन्तान नहुँदा समाज र पारिवारिक दबाबले भोग्नुपर्ने पीडा, विवशता र मौन पीडालाई पर्दामा जीवन्त पार्ने निर्माण टिमले जनाएको छ । निर्देशक ज्ञवालीका अनुसार, यो फिल्मले दर्शकलाई भावनात्मक रूपमा छोईदिनेछ र समाजलाई सोच्न बाध्य पार्नेछ। ज्ञवाली फेरी भन्छन्, –‘सर्ट फिल्ममा ठुलो फिल्ममा जस्तो सहजै कथा भन्नलाई समय हुँदैन । हामीले छोटो समयमा केहि बोल्दैछौं । दर्शकले छोटो कथामा धेरै कुरा वुझ्नेछन् ।’
अधिकांश प्रोजेक्टमार्फत कुनै न कुनै सन्देश दिन खोज्ने ज्ञवालीले समाजका विविध घटनालाई छोटा कथाहरूको माध्यमबाट प्रस्तुत गर्ने प्रयास गर्दै आएका छन्। रामजी ज्ञवालीले यसअघि निर्माण गरेका ‘रित्तो गाउँ’, ‘लापत्ता सन्तान’ र डकुड्रामा ‘मौन’ समेत प्रदर्शनको पर्खाइमा छन्। ‘निःशब्द’सहित उनका चार प्रोजेक्ट दर्शकमाझ आउन बाँकी छन्। ‘रित्तो गाउँ’ ले राष्ट्रिय तथा अन्र्तराष्ट्रिय अवार्डहरु प्राप्त गरिरहेको छ भने विभिन्न फेस्टिवलहरुमा प्रदर्शन भइरहेको छ ।
एक दशक लामो पत्रकारिता यात्रापछि फिल्म निर्देशनमा होमिएका ज्ञवालीले यसअघि ‘डार्कमुन’, ‘एक लभर’, ‘हनिमुन’, ‘आराध्या’ र ‘लिलामी’लगायतका चर्चित म्युजिक भिडियो निर्देशन गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
