काठमाडौँ– मधेस प्रदेश सभाका सभामुख रामचन्द्र मण्डल पदमुक्त भएका छन् ।
प्रदेश सभामा पदीय आचरण विपरीत काम गरेको भन्दै उनलाई पदमुक्त गर्ने प्रस्ताव बुधबार दुई तिहाइले पारित भएको हो ।
बुधबार मत विभाजन प्रक्रिया मार्फत निर्णयार्थ प्रस्तुत गर्दा प्रस्तावको पक्षमा ७६ जनाले मतदान गरेका हुन्। विपक्षमा भने कसैले मतदान गरेका छैनन्।
गत कार्तिक २७ गते सात दलका ६४ जना प्रदेशसभा सदस्यले मण्डल विरुद्ध प्रस्ताव दर्ता गराएका थिए। प्रस्ताव दर्ता भएपछि बैठक नबोलाइएपछि मंगलबार ३२ जना प्रदेशसभा सदस्यले बैठक आह्वान गर्न उपसभामुख बबिता राउत ईशरलाई पत्र बुझाएपछि उनले आज दिउँसो १ बजेका लागि बैठक आह्वान गरिएको थियो। तर बैठक आह्वान भए पनि सचिव अनुपस्थित तथा सदन भित्र विद्युत काटिएपछि बैठक बोलाइएको दुई घण्टाभित्र सुरु हुने अवस्था नदेखेपछि उक्त बैठकलाई स्थगित गर्दै ३ बजेर १० मिनेटका लागि पुनः बैठक आह्वान गरिएको थियो।
प्रदेशसभाका सचिव बासुप्रसाद कोइराला प्रदेशसभामा आएपछि बैठक सुरु भएको थियो तर नेकपा एमालेकी प्रदेशसभा सदस्य शारदा देवी थापाले बैठकमा सरकार पक्षबाट कोही उपस्थित नभएको भन्दै नियमापत्ति जनाएपछि बैठक १० मिनेटका लागि स्थगित भएको थियो।
पुनः बसेको बैठकमा प्रस्ताव पेश भएपछि प्रस्तावको समर्थन गर्दै केही सांसदले बोलेपछि सभामुख मण्डललाई स्पष्टिकरण दिन समय दिइएकोमा उनी अनुपस्थित भएपछि मत विभाजन प्रक्रिया सुरु गरिएको थियो।
मधेस प्रदेशमा नेपालको संविधानको धारा १६८ को उपधारा ३ बमोजिम सबैभन्दा ठूलो दलको हैसियतले तत्कालिन प्रदेश प्रमुख सुमित्रा सुवेदी भण्डारीले नेकपा एमालेका संसदीय दलका नेता सरोजकुमार यादवलाई नियुक्त गरेपछि विवाद मधेसमा राजनीतिक विवाद सुरु भएको हो। संघ सरकारले प्रदेश प्रमुख भण्डारीलाई पदमुक्त गरिसकेको छ भने बुधबार सभामुख विरुद्धको प्रस्ताव दुई तिहाइले पारित भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763536825.png)
