काठमाडौं– नेपाली कांग्रेसको केन्द्रीय कार्यालयमा आमरण अनसन बस्नेमा सर्लाही जिल्लाका नेता–कार्यकर्ता पनि थपिएका छन्।
कांग्रेस मुख्यालय सानेपामा ४ दिनदेखि जारी आमरण अनसनमा बुधबारदेखि सर्लाहीका राम गोविन्द राय पनि मिसिएका छन्। पार्टी क्रियाशील सदस्यताकै विषयलाई लिएर ७१ वर्षीय रायले पनि बुधबारदेखि आमरण अनसन सुरु गरेका हुन्।
सर्लाहीका चारवटै निर्वाचन क्षेत्रमा क्रियाशील सदस्यता वितरणमा अनियमितता भएको उनले बताए। राय १३औं महाधिवेशनमा प्रतिनिधि बनेका थिए। उनी विगतमा पार्टीको गाउँपालिका समितिका अध्यक्ष समेत बनेका थिए।
विधान विपरीत क्रियाशील सदस्यता वितरण गरिएको तथा नवीकरणमा समेत पक्षपातपूर्ण व्यवहार गर्दै नाम छुटाइएको उनको भनाइ छ।
क्रियाशील सदस्यता वितरणको विषयलाई लिएर धनुषाका नेता कार्यकर्ता ४ दिन अघिदेखि पार्टी मुख्यालय सानेपामा आमरण अनसन बसिरहेका छन्। पूर्व सांसद चन्द्रमोहन यादवको नेतृत्वमा धनुषाका तीन नेता आमरण अनसनमा बसिरहेका छन्।
क्रियाशील सदस्यताकै विवादलाई लिएर बाराका तीन जिल्ला नेताले ११ दिन अघिदेखि सानेपामा धर्ना दिइरहेका छन्। संस्थापन (पार्टी सभापति शेरबहादुर देउवा) पक्षले क्रियाशील सदस्यतामा धाँधली गरेको उनीहरुको भनाइ छ।
विगतमा महाधिवेशन प्रतिनिधि बनेका तथा स्थानीय तहका निर्वाचित कार्यकर्ताको क्रियाशील सदस्यता नवीकरण समेत नगरिएको आन्दोलनरतले बताएका छन्।
केन्द्रीय कार्यालयको मूल ढोका दुबैतर्फ भित्र/बाहिर नै प्रदेश २ का ३ जिल्लाका नेता–कार्यकर्ताले शान्तिपूर्ण विरोध जनाइरहेका छन्। आन्दोलनकारीको पक्षमा ऐक्यवद्धता जाहेर गर्न वरिष्ठ नेता रामचन्द्र पौडेल, नेताहरु प्रकाशमान सिंह, अर्जुननरसिंह केसी, डा शेखर लगायत केन्द्रीय कार्यालय पुगेका छन्।
आन्दोलनकारीलाई समर्थन गर्न बुधबार केन्द्रीय कार्यालयमा पुगेका नेता केसीले अनसनकारीलाई ढाडस दिँदै भने,‘तपाईंलाई अन्यायमा पर्न दिइने छैन। धाँधलीविरुद्ध हामी पनि लड्छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
