काठमाडाैं- नेपाल टेलिकमले ग्राहकको सुविधालाई ध्यानमा राखी उपलब्ध गराइरहेको विभिन्न प्याकेजसहितको अफरलाई परिमार्जन गरी समर अफरअन्तर्गत थप सुविधा उपलब्ध गराएको छ। कम्पनीले पहिलेदेखि उपलब्ध गराइरहेको अधिकांश प्याकेजलाई निरन्तरता दिएको छ।
नयाँ सुविधाअन्तर्गत अब प्रतिदिन ५५ रुपैयाँमा दुई जीबी डेटा प्रयोग गर्न सकिनेछ। त्यसैगरी लकडाउन अफरको रुपमा उपलब्ध प्रतिदिन बिहान ५ बजेदेखि बेलुकी ५ बजेसम्म ३९ रुपैयाँमा उपलब्ध हुने एक एमबीपीएस 'डे टाइम अनलिमिटेड अफर'लाई निरन्तरता दिइएको छ। लकडाउन अफरअन्तर्गतको 'बोनस अन रिचार्ज' अफरलाई भने हटाइएको टेलिकमले जनाएको छ।
नेपाल टेलिकमले सञ्चालनमा ल्याएको भीओएलटीई सेवा प्रयोग गर्न चाहने ग्राहकका लागि एक पटकका लागि उपलब्ध हुने १०० मिनेट निःशुल्क भ्वाइस कल सुविधालाई यथावत राखिएको छ। उक्त सुविधा २८ दिनभित्र प्रयोग गर्न सकिन्छ।
कम्पनीले उपलब्ध गराइरहेको कर्पोरेट युजर ग्रुप (सीयूजी) अफरलाई पनि थप आकर्षक बनाइएको छ। कम्पनीले पहिलेदेखि नै उपलब्ध गराइरहेको प्रिपेडतर्फ २०० र पोस्टपेडतर्फ ५०० रुपैयाँको प्याकेजमा उपलब्ध हुने डेटा भोल्युम थप गरिएको जनाएको छ। अब प्रिपेडमा २०० रुपैयाँको प्याकेजअन्तर्गत उक्त ग्रुपमा पहिलेदेखि नै उपलब्ध अनलिमिटेड कल, १०० मिनेट अन नेट (नेपाल टेलिकमको नेटवर्कमा प्रयोग गर्न सकिने) र १० मिनेट अफ नेट (अन्य नेटवर्कमासमेत प्रयोग गर्न सकिने) भ्वाइस तथा ५० वटा अन नेट एसएमएस सुविधाका साथै जुनसुकै समय प्रयोग गर्न सकिने एक जीबी डेटासमेत उपलब्ध हुनेछ।
त्यसैगरी सीयूजी ५०० पोस्टपेडअन्तर्गत पहिलेदेखि नै उपलब्ध अनलिमिटेड कल, ५०० मिनेट अन नेट र ५० मिनेट अफ नेट भ्वाइस तथा १०० वटा अन नेट एसएमएस र ३० वटा अफ नेट एसएमएस सुविधाका साथै जुनसुकै समय प्रयोग गर्न सकिने पाँच जीबी डेटासमेत उपलब्ध हुने जनाएको छ।
सीडीएमएबाट जीएसएममा रुपान्तरण हुने ग्राहकका लागि सुविधा
टेलिकमले हाल प्रयोगमा रहेका सीडीएमए सेवाका प्रयोगकर्ताहरुलाई जीएसएम नेटवर्कमा रुपान्तरण गर्ने योजनाअन्तर्गत सीडीएमए प्रिपेड र सीडीएमए पोस्टपेड प्रयोगकर्ताका लागि निःशुल्क सिमका साथै निःशुल्क भ्वाइस, निःशुल्क डेटा प्याकेज र निःशुल्क एसएमएस सुविधा उपलब्ध गराउने भएको छ। यसका लागि सीडीएमए प्रयोगकर्ताले नजिकको नेपाल टेलिकमको कार्यालयमा गएर आफ्नो पुरानो रिमकार्ड बुझाउनुपर्नेछ।
सीडीएमए मोबाइल (पोस्टपेड र प्रिपेड) का लागि नयाँ जीएसएम (पोस्टपेड र प्रिपेड) नम्बर उपलब्ध गराइनेछ। यसैगरी सीडीएमए फिक्स्ड (पोस्टपेड र प्रिपेड) का लागि नयाँ जीएसएम पोस्टपेड नम्बर उपलब्ध गराइनेछ।
सीडीएमए प्रिपेडबाट जीएसएम प्रिपेडमा रुपान्तरण भएका मोबाइल ग्राहकहरुले छ महिनासम्म निःशुल्क रुपमा मासिक ३०० मिनेट अन नेट (नेपाल टेलिकमको नेटवर्कमा प्रयोग गर्न सकिने) भ्वाइस कल गर्न, चार जीबी डेटा चलाउन र ३०० वटा अन नेट एसएमएस पठाउन सक्ने छन्। त्यसैगरी जीएसएम पोस्टपेड मोबाइलमा रुपान्तरण हुने ग्राहकले नि:शुल्क रुपमा मासिक ४०० मिनेट अन नेट र ५० मिनेट अफ नेट (अन्य नेटवर्कमासमेत प्रयोग गर्न सकिने) भ्वाइस कल गर्न, छ जीबी डेटा चलाउन र २०० वटा अन नेट एसएमएस गर्न सक्ने छन्। आगामी पुस महिनासम्ममा जीएसएममा रुपान्तरण हुने सीडीएमए पोस्टपेड ग्राहकहरुलाई मासिक रेन्टल शुल्क छुट दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
