समाचार प्रकाशन गरेबापत् गुगलले गरेन रकम भुक्तानी, फ्रान्सले ७१ अर्ब जरिबाना सुनायाे

विश्व

नेपाल लाइभ बुधबार, असार ३०, २०७८ १६:२२

काठमाडौं- समाचार प्रकाशन गरेबापत् रकम भुक्तानी नगरेको भन्दै फ्रान्सले गुगलमाथि जरिबाना तिराउने निर्णय गरेको छ।

मंगलबार एक विज्ञप्तिमा फ्रेन्च नियामक निकायले गुगलमाथि झण्डै ६० करोड अमेरिकी डलर अर्थात् करिब ७१ अर्ब रुपैयाँ बराबरको रकम जरिबाना तिराउने निर्णय गरेको हो।

सन् २०१९ मा युरोपेली युनियनले सर्च इन्जिन तथा सोसल मिडिया प्लाटर्फममा शेयर हुने समाचार सामग्रीहरुबापत् सम्बन्धित समाचार संस्थालाई रकम तिर्नुपर्ने फैसला गरेको थियो।

सोही बमोजिम गुगलले गतवर्ष आगामी ३ वर्षभित्रमा समाचार एजेन्सीहरुलाई समाचार ‘लाइसेन्सिंग’ बापत १ अर्ब डलर भुक्तान गर्ने घोषणा गरेको थियो। तर, उक्त घोषणा पालना नगरेको फ्रेन्च नियामक निकायले जनाएको छ।

‘फ्रान्सेली समाचार एजेन्सी तथा प्रकाशकहरुसँगको सम्झौता सम्बन्धमा गरिएका धेरै प्रयासहरु गुगलले बेवास्ता गरेको छ,’ विज्ञप्तिमा भनिएको छ।

साथै फ्रान्सका समाचार एजेन्सीहरुको समाचार प्रकाशन गरेबापत् एजेन्सीहरुलाई रकम भुक्तानी गर्ने प्रस्ताव दुई महिनाभित्र पेश नगरेमा थप सजाय दिइने जनाइएको छ।

‘यदि आगामी २ महिनाभित्रमा समाचार एजेन्सीहरुलाई क्षतिपूर्तिको नयाँ प्रस्ताव नल्याएमा गुगलमाथि दैनिक ९ लाख युरो जरिबाना हुनेछ,’ विज्ञप्तिमा भनिएको छ।

फ्रान्सको एन्टिट्रस्ट एजेन्सीका प्रमुख इसाबेल डी सिल्भाले एजेन्सी तथा प्रकाशकहरुसँगको सम्झौता तथा वार्ताहरुमा गुगल असल मनसायले प्रस्तुत नभएको बताएका छन्।

‘नियामक निकायले कुनै कानूनी दायित्व तोक्दछ, तब त्यसको पूर्ण पालना गर्नुपर्दछ। तर,अनलाइनमा समाचार सामग्रीहरु प्रकाशन गरेबापत रकम भुक्तानी गर्नुपर्ने विषयका छलफलमा बस्नै अस्वीकार गर्दै आएको छ,’ उनले भने।

यता, गुगलले आफूमाथि करोडौँ डलर जरिबाना गर्ने फ्रान्सको निर्णयप्रति आपत्ति जनाएको छ। फ्रान्सेली समाचार मिडियाहरुको प्रतिनिधि संस्था एलाइन्स डे ला प्रेस्से डी इन्फर्मेसन जेनेरालेसँग आफ्नो सम्झौता भएको र ले मोन्डे तथा ले फिगारोलगायतका केही अग्रणी सञ्चार माध्यमहरुसँग पनि छुट्टै सम्झौता भएको गुगले दाबी गरेको छ।

‘हामी समग्र प्रक्रियामा असल मनसायका साथ कार्य गरिरहेका छौँ। यो जरिवानाले सम्झौतामा पुग्ने हाम्रो प्रयासका साथै हाम्रो प्लाटर्फममा समाचारले कसरी काम गर्न भन्ने यथार्थलाई अवमूल्यन गरेको छ,’ गुगलका प्रवक्ताले भनेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

साफ च्याम्पियनसिप खेलेर फ्रान्स फर्किइन् साम्बा

साफ फुटबलका खेलाडीलाई तिहारलगत्तै पुरस्कार दिने प्रधानमन्त्रीको घोषणा

टिपर दुर्घटनामा दुई भारतीय मजदुरको मृत्यु, दुईजना घाइते