काठमाडौं- संकटमा परेको नेकपा (एमाले)को संकट टार्न फेरि कार्यदल ब्युँताइएको छ। आइतबार राति बालुवाटारमा भएको एमाले अध्यक्ष एवं प्रधानमन्त्री केपी शर्मा ओली र उपाध्यक्ष भीम रावलबीचको वार्ताबाट बनेको ‘वातावरण’ले कार्यदल ब्युँताएको हो।
कार्यदलको बैठक सोमबार बेलुकी सिंहदरबारमा बस्न लागेको एक सदस्यले नेपाल लाइभलाई बताए। बैठकमा वरिष्ठ नेता माधवकुमार नेपाल पक्षबाट संयोजक रावलसहितका नेताहरु सहभागी हुनेछन्। त्यस्तै, ओली पक्षबाट संयोजक सुवासचन्द्र नेम्वाङसहितका नेता सहभागी हुनेछन्।
‘हामीबीच धेरै चरणमा अनौपचारिक छलफल हुँदै आएका थिए, केही कुरा सकारात्मक भएपछि औपचारिक वैठक बस्न लागेको हो’, कार्यदलका एक सदस्यले भने।
गत जेठ ६ गते राष्ट्रिय सभाको बागमती प्रदेश अन्तर्गत रिक्त पदमा भएको उपनिर्वाचनपछि कार्यदलले गर्दै आएको एकताको पहल बिथोलिएको थियो। राष्ट्रिय सभा उपनिर्वाचनमा एमालेका तर्फबाट रामबहादुर थापा 'बादल' उम्मेद्वार थिए भने नेपाल पक्षले विपक्षी गठबन्धनका खिमलाल देवकोटालाई साथ दिएको थियो। निर्वाचनमा देवकोटा विजयी भएका थिए।
कार्यदलमा दुवैपक्षका पाँच/पाँच जना नेता रहेका छन्। कार्यदलमा ओली पक्षबाट नेम्वाङसहित विष्णु पाैडेल, शंकर पोखरेल, प्रदीप ज्ञवाली र विष्णु रिमाल रहेका छन्। नेपाल पक्षबाट रावलसँगै सुरेन्द्र पाण्डे, घनश्याम भुसाल, गोकर्ण विष्ट र रघु पन्त रहेका छन्।
गत जेठ २ गते अध्यक्ष केपी शर्मा ओली र वरिष्ठ नेता माधवकुमार नेपालबीच सिंहदरबारमा भएको वार्तापछि कार्यदल बनाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
