काठमाडौं- ड्युटीमा खटिएका प्रहरी निरीक्षक (इन्स्पेक्टर)लाई ‘तपाईंको हिसाब किताब हुन्छ’ भन्दै धम्की दिने गण्डकी प्रदेशका प्रदेशसभा सांसद मेखलाल श्रेष्ठले उक्त बोलीप्रति आफूलाई कुनै पश्चाताप नरहेको बताएका छन्।
शनिबार पोखरामा निषेधाज्ञा कार्यान्वयनका बेलामा उनको भीडसहितको टोलीलाई इन्स्पेक्टर श्याम थापा मगरको टोलीले रोकेका थिए। त्यसपछि सांसद श्रेष्ठले इन्स्पेक्टर मगरलाई धम्की दिएका थिए।
इन्स्पेक्टरलाई धम्की दिएको भिडियो सामाजिक सञ्जालमा भाइरल भएको छ। बर्दीको इन्स्पेक्टरलाई धम्की दिएपछि नेपाल लाइभले सांसद श्रेष्ठको प्रतिक्रिया लिएको छ। जहाँ उनले उक्त शब्दप्रति कुनै पश्चाताप नभएको बताएका छन्।
यस्तो छ सांसद श्रेष्ठको भनाइ
अहिले सांसदले धम्की दिए भनेर बाहिर आएको छ त्यो धम्की होइन। हिसाब किताब हुन्छ भनेर त भन्नु परेन र? माननीयलाई छेक्या छ। म फलना हो भन्दापनि छोड्या छैन मैले कुट्छु, पिट्छु त भन्या छैन नि। हिसाब किताब हुन्छ भन्न त पाइयो होला नि। सभ्य नै शब्द होला नि त्यो त?
मैले घुच्याएर लडाइँझगडा गरेको होइन। म फलाना हो भन्दापनि ठेलेपछि हिसाब किताब हुन्छ भन्नुलाई अन्यथा लिन भएन। हिसाब किताबलाई अन्यथा बुझ्नु भएन। मैल बढी हुने होइन भनेको छु, अरु केही भनेको छैन। यो धम्की नै होइन।
म चाहिँ पिसाब फेरर आएको थिएँ। त्यहाँ धर्नामा जाने हो भन्दाखेरी उसले त मलाई सलाम गरेर छाड्नुपर्ने हो। तर रोके। त्यत्रो मासमा हिसाब किताब हुन्छ भनेको धम्की हुन्छ र? त्यत्रो मासले घेरिरहेको छ। त्यहाँ पनि धम्की हुन्छ? त्यो भिडियो हेर्नुपर्यो नि।
हिसाब किताब छ भनेकोमा मलाई कुनै पश्चाताप छैन। किनभने बाटोमा नर्मल टाइममा भेट्दा भनेको होइन। आन्दोलनमा जाँदाको घटना हो। माननीयलाई छेक्नुपर्ने आवश्यक नै थिएन। घरभित्र पसेर पिसाब फेरेर निस्केको देखिराख्दा पनि छेक्न मिल्छ ? इलेक्टेड माननीयमाथि जुन व्यवहार भएको। तपाईंले गरेको व्यवहार नोटिसमा आयो भन्नलाई हिसाब किताब भनेको हो । यसमा कुनै दुरासय कुनै दुराभाव राखेर भनेको होइन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
