काठमाडौं- हालै उपप्रधानमन्त्रीबाट बाहिरिएका ईश्वर पोखरेलले महासचिवको रुपमा भूमिका खेल्नुपर्ने आवश्यकता आइपरेको बताएका छन्। शुक्रबार पदमुक्त भएका उनले आइतबार फेसबुकमा स्टेटस लेख्दै प्रधानमन्त्री केपी शर्मा ओलीले पार्टीमा भूमिका खेल्न मन्त्रिपरिषद्बाट बाहिर राखेको आशय व्यक्त गरेका छन्।
‘२०७७ फागुन २३ गतेको सर्वोच्च अदालतको फैसलापछि एमाले- माओवादी पार्टीहरूको पूर्वस्थिति कायम रहन पुगेका कारण म पुन: एमालेको महासचिव रहन पुगेको छु। यो अवस्थामा मैले बुझेको छु- म पार्टीको महासचिव भएर पुन: भूमिका खेल्नुपर्ने आवश्यकता आइपरेको छ। पार्टीका आदरणीय अध्यक्ष तथा सम्माननीय प्रधानमन्त्री केपी शर्मा ओलीसित यस सम्बन्धमा कुराहरू भएका छन्। उहाँले मलाई परिस्थितिको गम्भीरताबारे बताउँदै आउनुभएको पनि छ र मैले उहाँको अन्तरआशयलाई राम्ररी बुझ्ने प्रयत्न पनि गर्दै आएको छु’, पोखरेलले लेखेका छन्।
उनले अहिले कतिपयले भन्ने गरेजस्तो ‘सबैतिर छ पार्टी - तर कहीँ पनि छैन पार्टी’ जस्तो अवस्थालाई बदल्नुपर्ने चुनौती रहेको बताएका छन्। यो बदल्ने अभियान सञ्चालन गर्ने संस्थाको महासचिव भएर आफूले भूमिका खेल्नुपर्ने उनको भनाइ छ।
‘दुर्भाग्य नै हो - यतिवेला पार्टीभित्रको एकतामा पनि संकट देखापरेको छ। यसबाट पार्टीलाई जोगाउनुपर्ने आवश्यकता छ। चुनौतीहरू थुप्रै किसिमका छन्। राष्ट्रिय राजनीतिमा अस्थिरताका झन्झवातका आशंकाले मानिसहरूमा त्रास सिर्जना गराउन खोजिँदैछ। आर्थिक विकास र समृद्धिको अभियानलाई कमजोर पार्ने, राष्ट्रिय स्वाभिमान र स्वतन्त्रताको विषयलाई कमजोर बनाउने, मुलुकलाई अराकता र अस्तव्यस्ततातर्फ धकेल्ने, सामाजिक सद्भावलाई विथोल्ने आदि दुस्प्रयत्नहरू हुँदैछन् र ती प्रवृत्तिलाई प्रश्रय दिन भित्र/बाहिरबाट प्रयत्न भइरहेको कुरालाई बुझ्न सकिन्छ’, उनको भनाइ छ।
पोखरेलले सरकारमा रहेका बेला आफूबाट र आफ्नो नेतृत्वमा भएका सबै कामहरू सम्वन्धित ठाउँमा औपचारिक अभिलेखहरूमा सुरक्षित रहेको बताएका छन्।
‘यसबीच कोभिड संक्रमणको महामारीका समयमा मैले ‘उच्चस्तरीय समन्वय समिति’ र ‘कोभिड १९ संकट व्यवस्थापन केन्द्र’ मा संयोजकका हिसाबले भूमिका खेल्ने काम गरेँ। त्यसबेलाको जटिलतासित गाँसिएर उठेका/ उठाइएका कुराहरूलाई म कहिल्यै बिर्सन सक्तिन’, उनको भनाइ छ।
यो पनि पढनुहोस्
विवादै-विवादको अर्को नाम ईश्वर पोखरेल
मन्त्रिपरिषद् पुनर्गठन : ईश्वर पोखरेललाई कारबाही!
उपप्रधानमन्त्री नै बिनाविभागीय, प्रधानमन्त्रीलाई भने ८ वटा मन्त्रालय
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
