काठमाडाैं– बकिंघम प्यालेसले मेगन मर्केलले राजपरिवारका सदस्यमाथि लगाएको ‘रंगभेद’ को आरोपलाई गम्भीर रुपमा लिएको जनाएको छ। शीर्ष राजपरिवारका सदस्यहरुको ‘क्राइसिस मिटिङ्ग’पछि वक्तव्य जारी गर्दै रंगभेदको आरोपलाई गम्भीर रुपमा लिएको जनाइएको हो।
अमेरिकी टेलिभिजनकर्मी ओप्रा विन्फ्रीसँगको अन्तर्वार्ताको क्रममा बेलायती राजकुमार ह्यारीकी पत्नी मेगनले अन्तर्वार्ताको क्रममा मेगनले रंगको कारण नै आफ्नो छोरा आर्चीलाई राजदरवारले राजकुमारको उपाधि नदिएको आरोप लगाएकी थिइन्।
‘मेगनले उठाएको विषयमा गम्भीर रुपमा लिइएको छ। कुनै पनि घटना वा कुराकानीको स्मरण भिन्न हुन सक्छ। यो विषयलाई निजी रुपमा सम्बोधन गरिने छ,’ प्यालेसले भनेको छ।
दरबारले ह्यारी, मेगन र आर्ची जहिले पनि परिवारको अति प्रिय सदस्य रहने जनाएको छ। ‘ह्यारी र मेगनका लागि पछिल्ला केही वर्ष निकै चुनौतिपूर्ण रहेको थाहा पाउँदा परिवार निकै दुःखी भएका छाैं,’ विज्ञप्तिमा भनिएको छ,‘ उनीहरु जहिल्यै परिवारको अति प्रिय सदस्य हुन र रहने छन्।’
यसअघि मेगनले गर्भवती भएको बेलामा आफ्नो छोरा आर्चीलाई रङकै कारण शाही उपाधी र सुरक्षा नदिइएको आरोप लगाएकी थिइन्। ‘जब म गर्भवती थिए त्यो बेला नै चर्चा सुरु भइसकेको थियो आर्चीले शाही सुरक्षा पाउँछन् वा पाउँदैनन्। आर्चीलाई शाही उपाधि प्रदान नगर्ने र त्यो भन्दा आर्चीको छालाको रङ कति कालो हुन्छ भनेर चर्चा हुन्थ्यो,’ मेगनले अन्तर्वार्तामा भनेकी थिइन्।
राजकुमार ह्यारीले ओप्रालाई छोरा आर्चीको छालाको रंगबारे चासो व्यक्त गर्नेमा हजुरआमा र हजुरबुवा (महारानी एलिजाबेथ द्वितिय र द ड्युक अफ एडिनर्बह) नरहेको स्पष्ट पारेका थिए।
बेलायती राजपरिवारमा आधुनिककालमा मेगन पहिलो ‘मिक्स्ड रेस’ सदस्य हुन्। उनले अन्तर्वार्तामा रंगभेदको आरोप लगाएपछि त्यसमा प्रतिक्रिया दिन दरबारमाथि दबाब बढेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
