अर्थ समाचार

नेपाल ट्रष्टको कालिमाटीस्थित जग्गामा सम्झौताविपरीत १२ तले भवन बनाउने प्रयासमा थामसेर्कु

काठमाडौं- नेपाल ट्रष्टको स्वामित्वमा रहेको काठमाडौं महानगरपालिका-१३ सोल्टीमोड ताहाचलस्थित कित्ता नम्बर १८, १९ र २० को जग्गा भाडामा लिएको यति ग्रुपअन्तर्गतको थामसेर्कु ट्रेकिङले सम्झौता विपरीत १२ तलाको भवन बनाउने खेल सुरु गरेको छ।

४ रोपनी ४ आना ३ पैसा ३ दाम जग्गा ३० वर्षलाई भाडामा लिएको थामसेर्कुले दुईपक्षीय सम्झौतामा बेसमेन्ट तला, ग्राउन्ड तला र थप ४ तला गरी ६ तलाको भवन बनाउने उल्लेख गरेको थियो। तर, सम्झौता भएको ३ वर्ष हुन लाग्दै गर्दा सम्झौता विपरीत १२ तलाको भवन बनाउने गरी नक्सा तथा डिजाइन बनाएको छ।

‘थामसेर्कुले १२ तलाको नक्सा बनाउँदै काठमाडौं महानगरपालिकाबाट ट्रष्टको कार्यालयललाई थाहै नदिने गरी नक्सा पास गर्न खोजेको रहेछ,’ ट्रष्ट स्रोतले भन्यो, ‘महानगरबाट खबर आएपछि हामीले सम्झौतामा ६ तलाको भवन बनाउने उल्लेख भएको हुँदा १२ तलाको भवन निर्माणका लागि नक्सा पास नगरिदिन आग्रह गरेका थियौं। अहिले नक्सा पास गर्ने काम रोकिएको छ।’

नक्सा पास रोकिएपछि अहिले थामसेर्कुले ट्रष्टको कार्यालयमा आएर नक्सा तथा डिजाइनपासको लागि सहयोग गरिदिन आग्रह गरेको कार्यालयको भनाइ छ। तर, कार्यालयले सम्झौताको १२.१२ नम्बर बुँदामा लिज प्रस्तावसम्बन्धी कागजपत्र (एलपिडी) तथा लिज प्रस्ताव आह्वानको गोरखापत्रमा प्रकाशित सूचनामा उल्लेख भएको सबै विषयहरूसमेत यसको करारको अभिन्न अंग हुने भनी उल्लेख गरेको र बोलपत्रको कागजातमा बेसमेन्ट तला, ग्राउन्ड तला र थप ४ तलासहित ६ तलाको भवन निर्माण गर्ने भनी उल्लेख भएको हुँदा १२ तलाको भवन निर्माण अवैध हुने भन्दै नक्सा पास रोकिदिएको छ।

नेपाल ट्रष्ट कार्यालयका सहसचिव भीष्म भुसालले सम्झौतामा ६ तलाको भवन निर्माण हुने उल्लेख भएको र थामसेर्कुले १२ तलाको नक्सा पास गर्न लागेको कारण नक्सा पासको काम रोकिदिएको स्वीकार गरे। २०७४ मंसिर १४ गते भएको सम्झौतामा नक्सा तथा भवनको डिजाइन नेपाल ट्रष्टको कार्यालबाट अनुमोदन हुनुपर्ने उल्लेख छ।

यसरी सम्झौता भन्दा बाहिर गएर भवन बनाउने तयारीमा रहेको थामसेर्कुले अहिलेसम्मको जग्गा भाडा पनि तिरेको छैन।

थाकसेर्कुले भने गोरखापत्रमा सूचना प्रकाशन हुँदा जतिसक्दो जग्गाको प्रयोग गर्ने गरी काम गर्न पाउने भने सर्त राखेको र आफूहरूले सोही अनुसार भवन बनाउन लागेको ट्रष्ट कार्यालयमा बुझाएको विवरणमा उल्लेख छ।

सार्वजनिक खरिद ऐन विपरीत प्रतिस्पर्धा
सार्वजनिक खरिद ऐनले सार्वजनिक रूपमा गरिएको टेन्डरमा सामान्यतः दुईभन्दा धेरै कम्पनीका बीचमा प्रतिस्पर्धा हुनुपर्ने भन्छ। तर, नेपाल ट्रष्टले कालिमाटीको यो जग्गा दिँदा दुईवटा सीमित कम्पनीलाई मात्र प्रतिस्पर्धा गराएर दिएको थियो। दुईभन्दा कम कम्पनी प्रतिस्पर्धामा सहभागी भएमा पुनः टेन्डर गराउनु पर्ने हुन्छ।

सार्वजनिक रूपमा गरिएको टेन्डरमा दुईवटा मात्र प्रस्ताव आएको थियो। टेन्डरमा थामसेर्कु र क्लिन इन्फ्रास्ट्रक्चर प्रालि सहभागी भएका थिए। तर, ट्रष्टले उक्त टेन्डर थामसेर्कुलाई दिने निर्णय गरेको थियो। उक्त निर्णयमा ३० वर्षमा ट्रष्टले १८ करोड पाउने उल्लेख छ।

२०७४ मंसिर १४ गते सम्झौता भएको थियो। सम्झौतामा पहिलो ३ वर्षका लागि निर्माण अवधि मानेर वार्षिक ६ लाख भाडा तिर्ने उल्लेख भएपनि अहिलेसम्म कम्पनीले भवन पनि बनाएको छैन भने भाडा रकम पनि तिरेको छैन।

कुन वर्ष भाडा रकम कति?
१. पहिलो ३ वर्ष निर्माण अवधि वार्षिक ६ लाख
२. ४–८ वर्षसम्म ६१ लाख ४४ हजार
३. ९–१३ वर्षसम्म ६४ लाख ५१ हजार दुई सय
४. १४–१८ वर्षसम्म ६७ लाख ७३ हजार ७ सय ६०
५. १९ वर्ष देखि २३ वर्षसम्म ७१ लाख १२ हजार ४ सय ४८
६. २४–२८ वर्षसम्म ७४ लाख ६८ हजार ७१
७. २९–३० वर्षसम्म ७८ लाख ४१ हजार ४ सय ७५