सरकारी गाडीमा स्काउट राष्ट्रिय संयोजक भण्डारीका आँखा

अर्थ समाचार

सविन मिश्र बिहीबार, पुस २३, २०७७ १०:२५

नुवाकोटको ककनीस्थित ककनी इन्टरनेसनल स्काउट सेन्टरको भवन। इन्सेटमा नेपाल स्काउट तदर्थ समितिका राष्ट्रिय संयोजक लोकबहादुर भण्डारी।

काठमाडौं- निजी विद्यालयका सञ्चालकसमेत रहेका नेपाल स्काउट तदर्थ समितिका राष्ट्रिय संयोजक लोकबहादुर भण्डारीले सरकारी गाडीमा आँखा लगाएका छन्। स्काउटका कार्यक्रम सञ्चालनका लागि आफू काठमाडौं जानुपर्ने र त्यसका लागि सवारी साधन आवश्यक परेको भन्दै भण्डारीले त्रिभुवन अन्तर्राष्ट्रिय विमानस्थल कार्यालयलाई दबाब दिँदै गाडी माग गरिरहेका छन्।

आफूलाई एउटा गाडी चाहिएको भन्दै भण्डारीले अर्थ मन्त्रालयमार्फत् गाडी माग गरिरहेका थिए। अर्थ मन्त्रालयले तत्काल जगेडा गाडी नरहेको र दिन नसकिने जनाएपछि उनी अन्तर्राष्ट्रिय विमानस्थल पुगेका हुन्। विमानस्थल पुगेर भण्डारी स्वयंले एउटा ५० लाख रूपैयाँ हाराहारी मूल्य पर्ने गाडी दिन दबाब दिएका हुन्।

सम्बद्ध स्रोतहरूले दिएको जानकारीअनुसार भण्डारीले शिक्षा मन्त्रालयमार्फत् गाडीका लागि दबाब दिएका थिए। तर उनले त्यहाँबाट गाडी पाउने अवस्था नभएपछि अर्थतर्फ दबाब बढाएका हुन्। 'उहाँले गाडी चाहियो भन्नु भएको छ, अर्थ मन्त्रालयको काम गैरसरकारी संस्थालाई गाडी दिने होइन,' स्रोतले भन्यो, 'तै पनि हामीले हुँदैन त भनेका छौँ तर उहाँले दिनैपर्छ भन्नुभएको छ।'

भण्डारीले सरकारले बजेट नै दिएकाले गाडी दिनु अनौठो नभएको बताए। 'सरकारले हामीलाई बजेट नै दिएको छ, सरकारी बजेट खर्च गर्न हुने, गाडी माग्न नहुने भन्ने कहाँ छ र?,' भण्डारीले भने, 'हामी ऐनबमोजिम स्थापना भएका संस्था हौँ, त्यसकारण गाडी लिन हुँदैन भन्ने छैन।'

स्काउट सम्बद्ध स्रोतका अनुसार जग्गा भाडामा लगाएरै संस्थाले राम्रो आम्दानी गरिरहेको छ। काठमाडौंको लैनचौरमा लैनचौर ब्यांक्वेट तथा अन्य संस्थाले राम्रो भाडा तिरिरहेका छन्। त्यसका अतिरिक्त अन्तर्राष्ट्रिय गैरसरकारी संस्थाको साझेदारीमा पनि यसले विभिन्न कार्यक्रम सञ्चालन गरी आम्दानी गर्ने गरेको छ।

नेपाल स्काउटमा विवाद बढेपछि तदर्थ समितिको राष्ट्रिय समितिका संयोजक भएका भण्डारीले ६ महिनाभित्र चुनाव गराउने निर्देशन कार्यान्वयन गराउन सकेका छैनन्। दुई वर्षअघि ६ महिनाभित्र चुनाव गराउने भन्दै तत्कालीन् युवा तथा खेलकुद मन्त्री जगतबहादुर विश्वकर्मासमक्ष सपथ गरेका भण्डारीले प्रदेशमा तदर्थ समिति बनाएका छन्, त्यसभन्दा तल कमिटी बनाउन सकेका छैनन भने केन्द्रीय निर्वाचन अझै एक वर्ष हुने छैन।

केपी शर्मा ओली पहिलोपटक प्रधानमन्त्री हुँदा श्रीराम लामिछानेको ठाउँमा भण्डारीलाई राष्ट्रिय संयोजक बनाइएको थियो। झापाका भण्डारी प्रधानमन्त्री केपी शर्मा ओलीसँग निकट सम्बन्ध राख्ने शिक्षा व्यवसायीमध्ये एक पर्छन्। उनी काठमाडौंको कालोपुलमा रहेको जेभियर इन्टरनेसनल कलेजका प्रिन्सिपल हुन्। उनी प्रधानमन्त्रीका स्वकीय सचिव इन्द्र भण्डारीका नातेदारसमेत हुन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।