काठमाडौं- स्थायी कमिटी सदस्य एवं पूर्वअर्थमन्त्री सुरेन्द्र पाण्डेमाथि भएको दुर्व्यवहारको विषयले नेकपामा फेरि एकपटक विवाद चर्किएको छ। नेकपाभित्र यसअघि भएका कर्णाली विद्रोह, मन्त्रिपरिषद् पुनर्गठन, राजदूत नियूक्ति र पर्साका मुकेश चौरसिया हत्यालगायतका घटनापछि पाण्डेमाथि भएको दुर्व्यवहारको घटना थपिएको हो।
पार्टीमा यसअघि भएका विवाद यथावतै छन्। विवाद सल्टिन नसक्दा पार्टी बैठक समेत सहज रुपमा बस्न सकेको छैन। अब बस्ने सचिवालय बैठकमा यसअघिका विवादसँगै पाण्डेमाथि भएको दुर्व्यवहारको घटना पनि थपिने भएको छ। पार्टी विवाद सल्टनेभन्दा एकपछि अर्को विवाद थपिँदै गएपछि पार्टीमा जटिलता थपिएको हो। यसै विषयलाई लिएर अब बस्ने बैठकमा नेताहरुबीच पक्ष विपक्षमा भाँडिएर विवाद चर्किने देखिएको छ।
पाण्डेमाथि भएको दुर्व्यवहारको विषयलाई लिएर अध्यक्ष पुष्पकमल दाहाल ‘प्रचण्ड’‚ वरिष्ठ नेता माधवकुमार नेपाल‚ झलनाथ खनाल‚ नारायणकाजी श्रेष्ठ र वामदेव गौतम दुर्व्यवहारको विपक्षमा उभिएका छन् भने अर्कातिर अर्का अध्यक्ष केपीशर्मा ओली‚ ईश्वर पोखरेल‚ रामबहादुर थापा ‘बादल’ र विष्णु पौडेल भएकाले विवाद झनै बल्झने देखिएको छ।
ओली पक्षका नेताहरुले प्रचण्ड-नेपाल पक्षका नेताहरुलाई कार्यक्रममा अवरोध गर्नुका साथै जनताको बहुदलीय जनवाद (जबज) कार्यक्रम विभिन्न क्षेत्रमा गर्दै आएका छन्। यसअघि प्रदेश १ का नेतासँग अध्यक्ष ओलीसहित सचिवालय सदस्य ईश्वर पोखरेलले ‘जबज’को बहस वडा कमिटीसम्म लैजान जुममार्फत् भर्चुअल बैठक गरेका थिए।
लगत्तै पोखरेलले काठमाडौं जिल्लाका ओली निकट नेताहरुको भेलालाई सम्बोधन गरेका थिए। शनिबार मदन भण्डारी स्पोर्ट्स एकेडेमी नामको ब्यानरमा जबजको बहस कार्यक्रम कर्णाली प्रदेशको राजधानी सुर्खेतमा गरिएको थियो। यसैगरी शनिबार नै चितवनको राप्ती नगरपालिकाको नगर कमिटी बैठकमा पूर्वअर्थमन्त्री एवम् पार्टी स्थायी कमिटी सदस्य समेत रहेका पाण्डेलाई ओलीनिकट नेता कार्यकर्ताले दुर्व्यवहार गरेका थिए।
नेपालनिकट मानिने पाण्डेलाई उनीहरूलाई कार्यक्रममा बोल्दाबोल्दै नाराबाजी गरी दुर्व्यवहार गरेका थिए। आफूलाई ओलीनिकट नेता/कार्यकर्ताहरुले गैरराजनीतिक चरित्र देखाएको भन्दै पाण्डेले आक्रोश पोखेका छन्। राजनीतिसँग कुनै स्वार्थ नभएका व्यक्तिहरूले कार्यक्रममा मदन भण्डारी फाउण्डेसन जिन्दावाद, राजनेता केपीशर्मा ओली जिन्दावाद, पार्टी एकता जिन्दावादका नारा लगाउँदै कार्यक्रम अवरोध गरेको उनले ताएका छन्।
पार्टी नेता पाण्डेलाई बोल्दा बोल्दै सुनियोजित रुपमा अवरोध गरी अभद्र व्यवहार गरेको भन्दै छानबिन गरी कारबाही गर्न वरिष्ठ नेता नेपालले माग गरेका छन्। शनिबारै एक विज्ञप्ति जारी गर्दै नेपालले सभ्य, सुसंस्कृत एवं समुन्नत समाज निर्माण गर्न हिँडेको कम्युनिस्ट पार्टीमा यस्ता हर्कत नसुहाउने बताएका छन्।
यस्तै अर्का वरिष्ठ नेता झलनाथ खनालले पूर्वअर्थमन्त्री पाण्डेले कार्यक्रममा बोल्दाबोल्दै अनधिकृत रुपमा प्रवेश गरी केही अराजक व्यक्तिहरुले अभद्र व्यवहारप्रति निन्दा गरेका छन्। उनीमाथि भएको गैरजिम्मेवारपूर्ण घटनाको खनालले भर्त्सना गरेका छन्।
यस्तै पार्टी प्रवक्ता नारायणकाजी श्रेष्ठले शनिबारै सामाजिक सञ्जालमा लेख्दै पाण्डेमाथि सुनियोजित दुर्व्यवहारको भर्त्सना गरेका छन्। यस्तो खालको व्यवहारलाई प्रोत्साहित गरेर कम्युनिस्ट आन्दोलनमात्रै नभई कसैको हित नहुने भन्दै श्रेष्ठले चेतावनी दिएका छन्।
तर, ओली निकट केन्द्रीय सदस्य गोकुल बाँस्कोटाले सामाजिक सञ्जाल ट्विटरमा लेख्दै पाण्डेमाथि भएको दुर्व्यवहारलाई होहल्ला गरिरहनुको कुनै अर्थ नभएको बताएका छन्। गलत विचारविरुद्ध लड्न सही विचार नै पर्याप्त हुने भन्दै चितवन घटनाको बाँस्कोटाले बँचाउ गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
.JPG)
.jpg)
