फाइल तस्बिर
काठमाडौं– जेनजी आन्दोलनका क्रममा आगजनीबाट क्षतिग्रस्त भएको भाटभटेनी सुपर मार्केटको टंगालस्थित स्टोर पुनः सञ्चालनमा आउने भएको छ। पुनर्निर्माणको काम पूरा भएपछि टंगाल स्टोर सोमबार बिहान १० बजेदेखि ग्राहकका लागि खुला गर्न लागिएको हो।
भाटभटेनीका प्रमुख सञ्चालन अधिकृत पानु पौडेलका अनुसार स्टोरलाई आवश्यक पुनर्निर्माण तथा व्यवस्थापनको काम पूरा गरी पुनः सञ्चालनमा ल्याउन लागिएको हो।
आन्दोलनका क्रममा देशभर भाटभटेनीका १२ वटा स्टोरमा क्षति पुगेको थियो। तीमध्ये टंगालसहित १० वटा स्टोर पुनः सञ्चालनमा आइसकेका छन्। अब दमक र हेटौंडाका स्टोर मात्रै सञ्चालनमा आउन बाँकी छन्।
कम्पनीका अनुसार दमक र हेटौंडा स्टोरको पुनर्निर्माण पनि अन्तिम चरणमा पुगेको छ। दुवै स्टोरलाई समेत छिट्टै सञ्चालनमा ल्याउने तयारी भइरहेको छ।
‘खरानीबाट फेरि उठ्नेछौं’
भाटभटेनीका अध्यक्ष तथा प्रबन्ध निर्देशक मीनबहादुर गुरुङले आन्दोलनका क्रममा ठूलो भौतिक क्षति भए पनि कम्पनीले पुनर्निर्माणलाई निरन्तरता दिएको बताएका छन्।
उनले कठिन परिस्थितिका बीच स्टोर पुनर्निर्माणमा सहयोग गर्ने ग्राहक, कर्मचारी तथा शुभेच्छुकप्रति आभार व्यक्त गरेका छन्।
‘मनमा पीडा थियो, आँखामा आँसु थियो, आँखै अगाडिका स्टोरमा आगो बलिरहेका थिए। तर पनि हामीले राज्यप्रतिको दायित्व बिर्सिएनौं,’ गुरुङले भनेका छन्, ‘हामी एउटा निष्कर्षमा पुग्यौं– खरानीबाट फेरि उठ्नेछौं।’
१० हजारभन्दा बढी कर्मचारीको रोजगारी निरन्तर
आन्दोलनबाट ठूलो भौतिक क्षति भए पनि कम्पनीले १० हजारभन्दा बढी कर्मचारीको रोजगारीलाई निरन्तरता दिएको जनाएको छ।
कठिन परिस्थितिमा समेत कर्मचारीलाई सेवाबाट अलग नगरेको र गत वर्षको दसैं बोनससमेत कटौती नगरी रोजगारीलाई निरन्तरता दिएको कम्पनीको भनाइ छ।
‘हामीले कर्मचारीलाई रोजगारीबाट अलग गरेनौं। गत वर्षको दसैं बोनससमेत कटौती नगरी उनीहरूको रोजगारीलाई निरन्तरता दियौं,’ गुरुङले विज्ञप्तिमार्फत भनेका छन्।
कम्पनीले पुनर्निर्माणका क्रममा चौबीसै घन्टा खटिएका कर्मचारी तथा सहयोगीहरूप्रति पनि आभार व्यक्त गरेको छ।
टंगाल स्टोर सञ्चालनमा आएपछि ग्राहकलाई नियमित रूपमा आवश्यक वस्तु तथा सेवा उपलब्ध गराउने भाटभटेनीले जनाएको छ। साथै, आगामी दिनमा आधुनिक सुविधा, गुणस्तरीय सेवा तथा सहज किनमेलको वातावरण प्रदान गर्ने प्रतिबद्धता कम्पनीले जनाएको छ।
पुनर्निर्माणमा सहयोग गर्ने ग्राहक, सहयोगी संस्था, शुभेच्छुक तथा प्रतिकूल परिस्थितिमा निरन्तर खटिएका कर्मचारीप्रति कम्पनीले धन्यवाद व्यक्त गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
