काठमाडौं– गत भदौ १० गतेको भोटेकोशी बाढीले ऊर्जा क्षेत्रमा १ खर्ब ३२ अर्ब ८३ करोड रुपैयाँ बराबरको क्षति पुर्याएको छ । राष्ट्रिय योजना आयोगको विपद्पछिको आवश्यकता मूल्यांकन (पीडीएनए) को प्रारम्भिक प्रतिवेदनले यस्तो देखाएको हो ।
बाढीबाट रसुवा र नुवाकोटका १४ जलविद्युत् आयोजना, ६ सबस्टेसन तथा प्रसारण र वितरण प्रणालीमा क्षति पुगेको छ । प्रभावित आयोजनामध्ये सात निजी क्षेत्रका र सात नेपाल विद्युत् प्राधिकरण तथा मातहतका कम्पनीका छन् । ऊर्जा क्षेत्र पुनरुत्थानका लागि २ खर्ब १८ अर्ब ५८ करोड रुपैयाँ आवश्यक पर्ने आयोगको अनुमान छ ।
तर, क्षतिग्रस्त आयोजना कसरी पुनर्निर्माण गर्ने भन्ने टुंगो लागेको छैन । ऊर्जा मन्त्रालयका प्रवक्ता मोहनकुमार शाक्यका अनुसार पीडीएनए प्रतिवेदनपछि पुनर्निर्माण र आयोजनाको पुनः डिजाइनबारे छलफल भइरहेको छ ।
निजी ऊर्जा उत्पादकहरूले भने सरकारी विशेष प्याकेजबिना आयोजना पुनर्निर्माण कठिन हुने बताएका छन् । इप्पान सचिव विजयमोहन भट्टराईले ऋण पुनर्संरचना, थप समय र सहुलियत आवश्यक रहेको बताए । उनका अनुसार कतिपय आयोजना पुरानै स्वरूपमा निर्माण गर्दा वित्तीय रूपमा सम्भव नहुन सक्छन् ।
रसुवागढी जलविद्युत् आयोजनाले अहिले क्षतिको विवरण संकलन, बीमा दाबी र वित्तीय सम्भाव्यता अध्ययन गरिरहेको छ । पुनर्निर्माणमा थप दुई वर्ष लाग्न सक्ने र यस अवधिको आम्दानी गुम्ने भएकाले बीमाको रकमले मात्र आयोजना बनाउन कठिन हुने निजी क्षेत्रको भनाइ छ ।
आयोगका अनुसार बाढीबाट समग्र अर्थतन्त्रमा ४ खर्ब ७२ अर्ब ६६ करोड रुपैयाँ बराबरको क्षति पुगेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
